GAYO na yine̱ Kriste̱n i ta oteten a mitakisan o walea la su la ńo̱ṅo̱n a boso. Ba bena ba ta ba camane̱ belēdi ba mpoṅ ba keki o bo̱bise̱ na wana diwanje̱ o myemba. (1 Yohane 2:18, 19; 2 Yohane 7) Moto mō̱ nu ta nu belabe̱ ná Diotrefe a ta be̱ a to̱po̱ “byala ba bobe” te̱nge̱ne̱ ńamuloloma Yohane na bane̱, a banga pe̱ kasa bonasango bena ba ta be̱n, na bangane̱ pe̱ na ba bena ba ta ba pula bola nika. (3 Yohane 9, 10) Be bete̱medi nde be ta ponda Yohane a tiledino̱ Gayo. Leta ńamuloloma a tilino̱ o mbu ma lambo ka 98 P.A., le o Betiledi ba Grikia ba Kriste̱n, di biane̱ pe̱ ka “Kalat’a Yohane ni londe̱ ilalo.”

To̱na mitakisan Gayo a tano̱ a be̱ne̱, a bengi bolea Yehova na jemea. Ne̱ni a lee̱le̱no̱ be̱ lao la jemea e? Ońola nje jangame̱nno̱ bupe̱ eyembilan a Gayo we̱nge̱ e? Ne̱ni kalat’a Yohane e mongwane̱no̱ biso̱ o bola nika e?

Mutiled’a kalat’a Yohane ni londe̱ ilalo a bele̱ mo̱me̱ne̱ ná “mutudu” to̱so̱ mudun a moto. Nika e ta e dongame̱n ná mun’ao ńa mudī ńandolo Gayo embe mo̱ ka ńamuloloma Yohane. Yohane a bele̱ Gayo ná “ńa ndolo ńena na to̱ndino̱ na mbale̱.” Denge̱ Yohane a makwala ná a pite̱ ná ja la bwam l’eyobo la Gayo le bwam kapo̱ ka ja lao la bwam la mudī. A se̱ jo̱nge̱le̱ la bwam na musesako pe̱ e!—3 Yohane 1, 2, 4.

Gayo a ta nde angame̱n be̱ mombwedi nika ná mutudu o mwemba, nde leta di si malangwa nika na bwē. Yohane a sesi Gayo ońola kasa lao la bonasango to̱na ba tano̱ nde mo̱ be̱n. Yohane a langi nika ka lambo di mabole̱ mboṅ ná Gayo e jemea, kana ede̱mo a kasa la be̱n e tano̱ e we̱le̱ bautu ba Loba tobotobo.—Bbot. 18:1-8; 1 Tim. 3:2; 3 Yohane 5.

Byala ba Yohane ba musesako ońola ede̱mo a kasa la bonasango ya Gayo be malee̱ ná Kriste̱n i ta be̱ yala o malo̱ndo̱, jasumwe̱ wuma ńamuloloma Yohane a tano̱, wala o myemba, ye̱ke̱i te̱ ban bonasango bena ba ta be̱ bala o ma malo̱ndo̱ ba langwedi Yohane nje ba tano̱ ba kusa owo. Pondapo̱ tongwea na nika nde Yohane a tano̱ a kusa mibia jombwea min myemba.

Baboledi ba lomabe̱ ba ta nde ba to̱ndo̱ ja na bonasango. Mandabo ma re̱nt ońola be̱n ma ta ma be̱ne̱ dina la bobe, ma si ta mombwea bato bwam, ma be̱ pe̱ bepolo  ba bedangwedi ba mbamba. Bonasango ba lomabe̱ ba ta so̱ ba bolane̱ dibie̱ ná ba je na mako̱m, na yine̱ Kriste̱n i lomabe̱, to̱so̱ na bonasango ba makase̱ babo̱ o mamboa mabu yete̱na e we̱li be̱.

Yohane embe̱ Gayo ná a bate lee̱le̱ ede̱mo a kasa la be̱n, ebanja ńamuloloma a ta a baise̱ mo̱ ná a “boṅsane̱ babo̱ [be̱n] lo̱ndo̱, kana yangame̱nno̱ oboso ba Loba.” O mi mińa boṅsane̱ la be̱n lo̱ndo̱ di ta nde di pula kwala boṅsane̱ la babo̱ nje ye̱se̱ e mapule̱ o bwam ba walane̱ lo̱ndo̱ oboso natē̱ ba po̱ owe̱ni beno̱ o wala. E me̱ne̱ne̱ ná nika nde Gayo a tano̱ a bola, kana ban ba bolino̱ Yohane mboṅ a ndolo na jemea a lee̱le̱no̱.—3 Yohane 3, 6.

Ba be̱n ba ta nde bangame̱n be̱ bamuloloma b’ebol’a Sango, ba lomabe̱ na Yohane, to̱so̱ baboledi ba bebondo. Nje ye mbale̱ ye nde ná ban be̱se̱ ba ta nde be̱ bala o malo̱ndo̱ o bola mboṅ a myango ma bwam. Yohane a kwali ná: “Ebanja ońola di dina nde ba busino̱.” (3 Yohane 7) Yohane a ta nde a wa tuba dina la Loba (ombwa mwemba 6), ben byala ná “ońola di dina” be makwalea nde dina la Yehova. Omo̱ń a me̱se̱ ba bonasango pe̱ ba ta nde belongi ba mwemba ma Kriste̱n, e ta so̱ yangame̱n ná ba kuse bekasedi ba wea. Ye nde nje Yohane a tilino̱: “Jangame̱n kasa yi ńai a bato ná di boleye mbale̱ mwemba na babo̱.”—3 Yohane 8.

Yohane a si tiledi Gayo buka te̱ o timbise̱le̱ mo̱ masoma. Yohane a ta pe̱ nde a pula jongwane̱ mo̱ o lembe̱ mitakisan ma ngińa mō̱. Ońola njo̱m iwo̱ te̱nge̱, elong’a mwemba ma Kriste̱n ewo̱ e belabe̱ ná Diotrefe e si ta e pula kasa bonasango ba ta ba po̱ ka be̱n. E keka pe̱ o bangane̱ bane̱ ná ba kase babo̱.—3 Yohane 9, 10.

Esibe̱ penda, Kriste̱n a jemea i si wusa to̱ndo̱ ja na Diotrefe to̱ e be̱ nde ná nika e wusa we̱le̱ be̱. A ta a to̱ndo̱ be̱ ńaboso o mwemba, a si ta a kasa n’edube nje e ta e wa na Yohane, a to̱po̱ pe̱ byala ba bobe ońola ńamuloloma na bane̱. To̱na Yohane a si bele̱no̱ mo̱ ná mulēd’a lobango, Diotrefe a ta a te̱nge̱ne̱ byanedi ba ńamuloloma. Ńo̱ng’a Diotrefe ńa be̱ ńaboso na bedangwedi bao ba bobe be lee̱le̱ si be̱ lao la jemea. Eyembilan a bobe ya Diotrefe e lee̱le̱ ne̱ni bato be kumba na bena ba to̱ndi be̱ baboso beno̱ ná ba wana diwanje̱ o mwemba. Yohane a kwalisane̱ Gayo, nde seto̱ buka te̱ mo̱, nde na biso̱ pe̱ ná: “O s’embilane̱ nje ye bobe.”—3 Yohane 11.

O diwengisan na Diotrefe, Yohane a to̱pedi ońola Kriste̱n ni ta ni belabe̱ ná Demetrio k’eyembilan a bwam. A tili ná: “Be̱se̱ ba mabola Demetrio mboṅ a bwam na mbale̱ mo̱me̱ne̱ pe̱; biso̱ pe̱ di mabola mboṅ, nde o bi ná mboṅ asu ńe mbale̱.” (3 Yohane 12) E me̱ne̱ne̱ biana Demetrio a ta a be̱ne̱ ńo̱ng’a jongwane̱ la Gayo, na ná kalat’a Yohane ni londe̱ ilalo pe̱ ńongwane̱ o bola la ni mboṅ. Pondapo̱ Demetrio mo̱me̱ne̱ nde a bake̱ Gayo di leta. Ka mō̱ nu lomabe̱ na Yohane, to̱so̱ muboled’ebondo, pondapo̱ Demetrio a bati we̱le̱ byala Yohane a tilino̱ ngińa.

Ońola nje Yohane ome̱le̱no̱ Gayo ná a benge lee̱le̱ ede̱mo a kasa la be̱n nde ke̱ a ta a nibola nika e? Mo̱ Yohane e̱n nde ná a bate bola Gayo ngiń’a mulema e? Nga ńamuloloma a bo nde bo̱ngo̱ ná Gayo e ná a si bole pe̱ nika ońolana Diotrefe a ta a keka o busise̱ o mwemba Kriste̱n ye̱se̱ i ta i kasa be̱n e? E be̱ to̱ ne̱ni, Yohane a boli Gayo mbaki tongwea na kwala ná: “Nu nu mabole̱ bwam a wu nde na Loba.” (3 Yohane 11) Nika ńe nde njo̱m ni peti ńa bola bwam na benga bola nika.

 Mo̱ leta la Yohane di bati tute̱le̱ Gayo o benga kasa be̱n e? E, e me̱ne̱ne̱ nika, kana kalat’a Yohane ni londe̱ ilalo e kombabe̱no̱ o muso̱ngi ma kalati i longi Bibe̱l, nde e bolabe̱ pe̱ o jembe̱ bane̱ ná ‘bembilane̱ nde nje ye bwam.’

Di si bi tobotobo ońola munasango asu ńa kwaṅ Gayo. Nde je ná di busane̱ belēdi jita o yi son a so̱ṅtane̱ ya longe̱ lao di be̱nno̱.

Baboso, o dime̱ne̱ diwo̱ te̱nge̱, dongo lasu dinde̱ne̱ di kusi nde so̱ṅtane̱ tongwea na bajemea bemedi o wala o bepolo bepe̱pe̱ ná ba bīse̱ biso̱ mo̱. Ye mbale̱ ná seto̱ belongi be̱se̱ ba mwemba ma Kriste̱n we̱nge̱ nde be male̱ o malo̱ndo̱ o bepolo b’etum o langwa myango ma bwam. Nde, kapo̱ ka Gayo je ná o nin mbadi to̱ nine̱ di sue̱le̱ na jembe̱ be̱n ka muboled’ebondo na munj’ao. To̱so̱ je ná di bola bonasango na bonańango ba male̱ te̱ dikalo owe̱ni ńo̱ng’a bate̱ dikalo ńeno̱ jita oteten ekombo asu to̱so̱ o ekombo epe̱pe̱ nje e mapule̱ babo̱. Ońola nika di “wiye̱ o kasa be̱n.”—Rom. 12:13; 1 Tim. 5:9, 10.

Be londe̱ beba, di si be̱ mańaka nin we̱nge̱ yete̱na o ngedi iwo̱ yena ye pasa mitakisan mi mombweye̱ doi la byanedi mi wu o mwemba. Bō̱ ba ta ba te̱nge̱ne̱ doi la byanedi la Yohane, name̱ne̱ pe̱ na la ńamuloloma Paulo. (2 Kor. 10:7-12; 12:11-13) Nje so̱ jangame̱nno̱ bola yete̱na bō̱ basu be nika oteten a mwemba e? Paulo a boli Timoteo malea ná: “Mūt’a Sango a s’angame̱n tanga mutango, a be̱ nde muyao na be̱se̱, a bie lee̱ na tuna ńolo, ome̱le̱ bate̱nge̱ne̱ mo̱ na yō̱.” Di lee̱le̱ te̱ jalea la ńolo, to̱ oboso ba mikumwan nde, bate̱nge̱ne̱ biso̱ bō̱ be ná ba tukwa bedangwedi babu son na son. Yehova pe̱ “e ná a bola babo̱ bate̱le̱ o so̱ṅtane̱ mbale̱.”—2 Tim. 2:24, 25.

Be londe̱ belalo, bonasango ba maboleye̱ Yehova na jemea to̱na mitakisan bangame̱n o sesabe̱, ebol’abu ya jemea pe̱ yembabe̱. Ye̱ke̱i te̱ ńamuloloma Yohane embe̱ Gayo na bola pe̱ mo̱ mbaki ná e o bola nje ye bwam. Batudu pe̱ we̱nge̱ mulemlem bangame̱n bupe̱ eyembilan a Yohane tongwea na jembe̱ bonasango na bonańango abu ná ba si “wo̱lo̱.”—Yes. 40:31; 1 Tes. 5:11.

Na 219 ba byala buka te̱ o Betiledi ba Grikia, kalati ńamuloloma Yohane a tiledino̱ Gayo nde ńe ni wuto buka ye̱se̱ o Bibe̱l. Na mbale̱ ńe muse̱ṅ jita we̱nge̱ ońola Kriste̱n.