YESU a ta a bīse̱ ná bokwedi bao ba me̱nde̱ bwane̱ tute̱ ńa mumbwa muńe̱nge̱ o min mińa misukan. (Mat. 9:37; 24:14) Jombweye te̱ ne̱ni byala bao be londino̱ o mbad’a tobotobo o wuma iwo̱ ya Transkarpatia, o Ukre̱n. O mindi milalo buka te̱ ma wa wuma, o be̱n 50 ma myemba na buka 5 400 la bate̱ dikalo. * Nika ná moto 1 oteten a 4 ńa baje̱ o mi mindi milale̱ e nde Mboṅ a Yehova!

Ne̱ni mōnda mabu ma dikalo mweno̱ e? Vasile, munasango mō̱ nu maje̱ o wa wuma mo̱ ná: “Baje̱ owan ba be̱n edube ońola Bibe̱l, ba to̱ndi te̱me̱ la sim, ba be̱n mulatako ma bo̱ibo̱i na mbia mabu, ba mawe̱ pe̱ na mbale̱ o jongwane̱ mō̱ na nune̱.” A bati pe̱ ná: “Ba titi jo̱nge̱le̱ diwo̱ ponda ye̱se̱ na nje di dube̱no̱. Nde o lee̱ te̱ babo̱ lambo o Bibe̱l, ba mano̱ngo̱ ponda o lambe̱ye̱ wa toi.”

Ye mbale̱ ná bonasango ba be̱n mitakisan mō̱ te̱nge̱ ke̱ e po̱i ná ba te̱ dikalo o wuma muso̱ngi ma bate̱ dikalo mu bukino̱ ma baje̱ o mundi. K’eyembilan, mwemba mō̱ mu be̱n 134 bate̱ dikalo ońola buka te̱ 50 ma milongi me o mōnda mabu! Ne̱ni bate̱ dikalo ba malembe̱no̱ ben bete̱medi e?

Jita la bonasango na bonańango ba matuse̱ mańolo o wala te̱ dikalo o bepolo ńo̱ngi ńeno̱ bonde̱ne̱. Ionash, munasango mō̱ ńa 90 ma mbu mo̱ ná: “Jalo te̱ o jaba, nika ńe moto 1 ońola milongi 2 o mōnda ma mwemba masu. Na ta be̱ nala o betika, o sumo te̱ min mińa na si be̱nno̱ pe̱ ja la bwam, na o mundi mu po̱ti 160 Km owe̱ni na tano̱ na te̱ dikalo n’eyem’a Hungaria. Bate̱ dikalo bangame̱n we̱ ná bale jongwane̱ o mine̱ myonda. Na ta be̱ na te̱me̱ nge̱ṅ 4 ya mesanedi ná na dameye masin, nde na te̱ dikalo nate̱na nge̱ṅ 6 y’ebiamu. Na ta be̱ na bola nika ngedi iba to̱ ilalo woki te̱.” Mo̱ e̱n nde biana miwe̱n mao mi ta nde ewolo e? Mo̱ ná: “Na bwane̱ ni mbad’a dikalo muńe̱nge̱ jita. Na bo muńe̱nge̱ o jongwane̱ mbia mō̱ mu ta mu po̱to̱ etum o jokwa mbale̱.”

Ye mbale̱ ná seto̱ bato be̱se̱ o mwemba nde be ná bala o ni ńai a lo̱ndo̱ l’etum. Nde be̱se̱, nate̱na mo̱me̱ne̱ ba ba mákokwe̱ mińa ba mawe̱ o tapa mōnda ma dikalo mwe̱se̱. O mbu 2017 muso̱ngi ma bato bukedi o jo̱nge̱le̱ la kwed’a Yesu o min mindi milale̱ mwe lambo ka ngedi iba muso̱ngi ma bate̱ dikalo, nika ńe nde dongo diwo̱ la maba la bate̱ dikalo o wa wuma. Mbale̱ ńe nde ná, e be̱ to̱ we̱ni jeno̱ o bolea, jangame̱n “benga be̱ ngińa o ebol’a Sango.”​—1 Kor. 15:58.