Sango a Rehabeam a ta nde Salomo, ńena ńanedi o Israel 40 ma mbu. (1 Ki. 11:42) Salomo a wedi nde o mbu 997 B.P.A. Na Rehabeam asumwe̱ o Yerusalem wala o Sikem ná o̱kisabe̱ kiṅe̱. (2 Myan. 10:1) Mo̱ we ná o bolane̱ jo̱nge̱le̱ ná a bo bo̱ngo̱ o bupe̱ matanga ma Salomo, nu ta nu biane̱ ońola dibie̱ lao dinde̱ne̱ e? Ne̱ni Rehabeam a wusano̱ bia oboso ba ponda ná mbad’ao ńa jombwea mitakisan mō̱ ma ngińa e me̱nde̱ we̱le̱be̱ o kekise̱ e?

Rehabeam a bomane̱ ná yen ebe ekombo a Israel e londi na myambo. Na ponda, bato̱pedi ba tumba ba ta ba po̱ je̱ne̱ mo̱ o kwalisane̱ mo̱ ońola mutaka mabu, bā ná: “So̱ngo̱ a ta a dilise̱ eko̱ko̱s’asu. Nde tatan wa wamse̱ bodilo b’ebolo na jamba l’eko̱ko̱so̱ so̱ngo̱ a tano̱ a bambe̱le̱ biso̱, nde di mabolea wa.”​—2 Myan. 10:3, 4.

Pondapo̱ Rehabeam e̱n nde biana endedi nde! A londise̱ te̱ mpuli ma tumba, mo̱me̱ne̱ na mbia mao, na baboledi bao ba si wusa pe̱ be̱ne̱ longe̱ labu la m’bwe̱njē̱, to̱ baise̱ tumba mabea ka nged’a boso. O mune̱ mudi pe̱, a banga te̱ londise̱ mpuli ma tumba, bato ba wusa te̱nge̱ne̱ mo̱. Nje a tano̱ so̱ angame̱n bola e? Ni Kiṅ’a peńa e se̱le̱ nde baise̱ malea ma batudu ba bato bena ba ta bato ba malea ba sango Salomo. Denge̱ Rehabeam a mabaise̱ pe̱ malea ma beso̱mbe̱ bena bā na babo̱ ba kokisane̱ mwemba. Kaponda malea ba bolino̱ mo̱, Rehabeam a no̱ngi nde bedomsedi ba tuse̱ bato, na mo̱ alabe̱ tumba ná: “Kana tete̱ a tano̱ a bola eko̱ko̱s’ańu e be̱ bodilo, mba na mabenga nde dilise̱ mo̱. Tete̱ a ta a dipane̱ bińo̱ mawopi, nde mba na madipane̱ nde bińo̱ mikasi”​—2 Myan. 10:6-14.

Njika belēdi jeno̱ ná di busane̱ oten e? E me̱ne̱ne̱ na bwē ná ye dibie̱ o bupe̱ malea ma batudu ba bato, bato bou o mudī. Tongwea na dibie̱ la longe̱ ba be̱nno̱ be ná be̱ne̱ betune̱ ba bedomsedi di no̱ngino̱, ba bola biso̱ malea ma bwam.​—Hiob 12:12.

Rehabeam a ko̱te̱le̱ sonj’a bila o janane̱ tumba lena di pawe̱. Na Yehova a kwalisane̱ mo̱ tongwea na muto̱ped’a mudī Semaya, a kwala ná: “Lo s’ala janane̱ bonasango ańu, bana ba Israel bwemba; moto te̱ a timbe ombo’ao, ebanja nika e wu nde na mba.”​—1 Ki. 12:21-24. *

A si botedi to̱ bwemba. Dutea te̱ ne̱ni nika e takise̱no̱ Rehabeam! Nje bato ba tumba ba me̱nde̱no̱ jo̱nge̱le̱ jombwea ni kiṅe̱ ni kakane̱ o ko̱kise̱ bato na “mikasi” nde ombusa ponda ese̱le̱ bato ba pamo e? (Kobisane̱ na 2 Myango 13:7.) To̱ na nika, Kiṅe̱ na milo̱ṅ mao ma bila “ba sengane̱ eyal’a Yehova, ba timba ombusa kaponda eyal’a Yehova.”

Njika belēdi di mabusane̱no̱ e? Ye dibie̱ o sengane̱ Loba to̱ e be̱ nde ná bola la nika le ná di wanea biso̱ mayaṅako. Sengane̱ la Loba di malenea do̱lisane̱ lao na minam.​—Ndim. 28:2.

Nje Rehabeam a timbino̱ bola e? A sengane̱, ese̱le̱ mwano mao ma janane̱ tumba di bokisabe̱ peńa, na mo̱ a soke̱ mo̱nge̱le̱ mao o longa mindi o matumba ma Yuda na Beńamin mena a tano̱ anea. A ta a boka mindi ma ngińa “na ngińa ninde̱ne̱.” (2 Myan. 11:5-12) Di buki me̱se̱, o pambo a ponda po̱, a bupe̱ mambenda ma Yehova. Kana Janea la dom la matumba di ta owas’a byanedi ba Yerobeam di kwedino̱ o jowe̱ la losango, jita oteten abu “ba ta ba sikime̱ye̱ doi la Rehabeam” bala o Yerusalem o sue̱le̱ jowe̱ la mbale̱. ( 2 Myan. 11:16, 17) Na nika so̱ nde sengane̱ la Rehabeam di sikime̱ye̱no̱ janea lao.

Nde ponda Janea lao di sikime̱ye̱no̱, Rehabeam a boli lambo moto to̱ mō̱ a s’engane̱no̱ mo̱. Ese̱le̱ mbend’a Yehova ońola jowe̱ la basibi! Ońola nje e? Mo̱ ńango nu ta nde ngo̱n a Bonaamon nde a tute̱le̱ mo̱ o bola nika e? (1 Ki. 14:21) To̱ e be̱ nde ońola njika njo̱m, tumba le̱se̱ di timbi nde bupe̱ mo̱. Na Yehova ese̱le̱ ná Kiṅ’a Egipto Sisak e no̱nge jita la mindi ma Yuda, to̱ná Rehabeam a tano̱ a boka mo̱ na ngińa!​—1 Ki. 14:22-24; 2 Myan. 12:1-4.

Mambo ma bati be̱ bobe ponda Sisak a po̱ino̱ o Yerusalem, owe̱ni a tano̱ anea. O niponda nde muto̱ped’a mudī Semaya a bīse̱no̱ Rehabeam na banedi ba Yuda mwe̱ndi ma Loba ná: “Bińo̱ lo bangisan mba, mba pe̱ na mabake̱ bińo̱ o mā ma Sisak.” Nje Rehabeam a bolino̱ jombwea mu mwe̱ndi ma beko̱kisedi e? Lambo langame̱n musesako! Bibe̱l mo̱ ná: “Na banedi ba Israel na kiṅe̱ ba sibise̱ babo̱me̱ne̱, bā na: ‘Yehova a te̱m na sim!’” Na Yehova a sunga Rehabeam na Yerusalem o dibumbe.​—2 Myan. 12:5-7, 12.

Ombusa nika, Rehabeam a bengi be̱ kiṅ’a Janea la Mikondo. Obiana a mawo̱, a boli bana bao ba bome mabea jita, ná ba si te̱me̱ te̱nge̱ne̱ munańango abu Abiya, mun’ao na mutimbane̱ epol’ao ya kiṅe̱. ( 2 Myan. 11:21-23) Nika nde Rehabeam a lee̱le̱no̱ dime̱ne̱ la dibie̱ a si lee̱le̱no̱ kwaṅ.

To̱ na nje ye̱se̱ a bolino̱, Rehabeam a subi o do̱lisane̱ Loba. Bibe̱l e mato̱pea ońola Janea lao ninka ná: “A boli bobe.” Ońola nje e? Ebanja “a si ta a te̱se̱ mulema mao o pulise̱ Yehova.”​—2 Myan. 12:14.

Dutea te̱ nje nika e mapulano̱ kwala: Rehabeam a sengane̱ Loba ponda iwo̱. A boledi pe̱ tumba la Yehova mambo mō̱ ma bwam. Nde a si we̱ ná a be̱ne̱ mulatako ma bo̱ibo̱i na Yehova to̱ ńo̱ngi ninde̱ne̱ ńa do̱lisane̱ mo̱. Ońola nika nde, a kwedino̱ o bedangwedi ba bobe na o jowe̱ la losango. Nde we ná o baise̱ na wame̱ne̱ ná: ‘Niponda Rehabeam a kasino̱ beko̱kisedi ba Loba, a ta nde a tutabe̱le̱ na bane̱ nga mulema mao na ńo̱ng’ao ńa do̱lisane̱ Loba nde ba tute̱le̱ mo̱ o jate̱le̱ e?’ (2 Myan. 11:3, 4; 12:6) Ombusa ponda a timbi pe̱te̱ nde o bola nje ye bobe. E se̱ diwengisan a tano̱ na sango ńa mbambe̱, Kiṅe̱ David e! Ye mbale̱ ná David a po̱ngi jita la mawuse̱, nde longe̱ lao di lee̱le̱ ná a ta a be̱ne̱ ndolo ońola Yehova, ko̱di ońola jowe̱ la mbale̱; a  ta pe̱ ate̱le̱ na mbale̱ ke̱ a wusi.​— 1 Ki. 14:8; Mye. 51:3, Mye. 51:19; Mye. 63:2.

Je ná di busane̱ belēdi o myango ma longe̱ la Rehabeam. E te̱nge̱n ná bato ba sombweye mbia mabu na we̱ pe̱ o bolea bape̱pe̱ bwam. Nde ná di do̱lisane̱ Yehova, ka lambo laboso jangame̱n se̱le̱ sue̱le̱ jowe̱ la mbale̱, di tingame̱ pe̱ na mo̱.

Je nde ná di tongwe̱le̱ yete̱na di we̱ o tika be̱ne̱ ndolo ninde̱ne̱ ńa Yehova. Ka nje te̱ di maso̱se̱le̱no̱ wea ná i si dima, mulemlem pe̱ nde jangame̱nno̱ bola ná ndolo di be̱ne̱nno̱ Loba e si dima, tongwea na jokwa l’Eyal’ao ponda te̱, dutea o nje di langino̱, na be̱ pe̱ titimbe̱ o muka. (Mye. 1:2; Rom. 12:12) Ndolo di be̱ne̱nno̱ Yehova e me̱nde̱ so̱ jońse̱ ńo̱ng’asu ńa do̱lisane̱ mo̱ o nje ye̱se̱ di mabolano̱. E me̱nde̱ pe̱ tute̱le̱ biso̱ ponda iwo̱ yete̱na e mapula nika, o jate̱le̱ na mbale̱. O diwengisan na Rehabeam, di me̱nde̱ tingame̱ na jowe̱ la mbale̱.​—Yuda 20, 21.