Mo̱ o no̱ngi ponda o langa Njongo a Betatedi i tombi e? Ombwa te̱ nga we ná walabe̱ myuedi mi bupe̱:

Njika mambo mane̱i jeno̱ ná di bola o lo̱ngo̱ ńai a bwam e?

Je ná di te̱me̱ ná sim, jalea kalat’asu ńa myenge o mo̱ń. Jangame̱n soa we̱i ńai a bwam. Di tele̱ te̱ mudumbu na mungo̱ngi masu ńai a bwam o lo̱ngo̱, je ná di we̱le̱ lo̱ngo̱ na doi la mo̱ń.​—w17.11, dip. 5.

Nje e mubisane̱ jombwea bete̱medi na mangea ma mindi ma diwutamea o Israel e?

Mindi ma diwutamea mi ta mutoba na ńai mi mapomane̱no̱ o so̱be̱. Moto a wusa so̱ pomane̱ so̱ diwutamea na bo̱bise̱ la ńolo.​—w17.11, dip. 14.

Ońola nje jabea la diko̱ti la Loba tongwea na Yesu leno̱ jabea di peti jeno̱ ná di kusa e?

Di mabola biso̱ dipita la longe̱ la bwindea, na dipita la te̱me̱ wonja na bobe na kwedi. Ońola ndolo a be̱ne̱nno̱ mbot’a Adam, Loba a lom Yesu o sunga biso̱ niponda di tano̱ di dia bato ba bobe.​—wp17.6, map. 6-7.

Ne̱ni Myenge 118:22 mi makikano̱ bepumbwedi ba Yesu e?

Yesu a ta a bangabe̱ ka Mesia, a bwabe̱ pe̱. Nde ná a be̱ “Dale la tongo,” a ta angame̱n pumbwabe̱le̱.​—w17.12, map. 9-10.

Ndand’a mbia ńa Mesia e wu nde na mun’a boso e?

Ponda iwo̱ bambambe̱ ba Yesu ba yabe̱ nde na mun’a boso, nde seto̱ ponda ye̱se̱. David a si ta mun’a Yese ńaboso; nde Mesia a wu nde o edu’a mo̱ David.​—w17.12, map. 14-15.

Njika bete̱sedi bō̱ b’eboled’a do̱kita be maso̱be̱ o Bibe̱l e?

Bupisane̱ Mbend’a Mose, bato bena ba ta ba be̱ne̱ maboa mō̱ ba ta bangame̱n pandisabe̱ etum. Bato ba ta bangame̱n jo̱ke̱le̱ madiba ke̱ ba tapi mbimba. Mbenda e ta e kwala ná ndabo a dū e po̱te etum, lobi pe̱ di kudumane̱, muna pe̱ endabe̱ mińa lo̱mbi ombusa yabe̱ lao, ebanja maya ma makoka na bo̱bise̱ la ńolo ni ponda.​—wp18.1, dip. 7.

Ońola nje yangame̱nno̱ ná Kriste̱n e to̱nde mo̱me̱ne̱ e?

Di to̱nde munasango asu ka biso̱me̱ne̱. (Marko 12:31) Bome ba “to̱nde bito babu ka mańolo mabu mo̱me̱ne̱.” (Efe. 5:28) Ye mbale̱ ná moto e ná a be̱ne̱ne̱ mo̱me̱ne̱ ndolo ni si te̱nge̱n.​—w18.01, dip. 23.

Njika matanga jeno̱ ná di po̱ngo̱ o ńaka o mudī e?

Jangame̱n jokwa Eyal’a Loba, di dutea o nje jokono̱ na we̱le̱ pe̱ mo̱ o ebolo. Di tele̱ pe̱ milema na mo̱nge̱le̱ masu ná di kuse jongwane̱ la mudī-musangi, na jemea pe̱ kasa jongwane̱ la bane̱ na timbise̱le̱ pe̱ babo̱ masoma.​—w18.02, dip. 26.

Ońola nje eboled’a langa la ngengeti to̱ ya miso̱ mane̱i e titino̱ mbad’a bwam ńa bia kie̱le̱ e?

Njo̱m ye ńai na ńai, nde ńa mom ńe nde ná Bibe̱l e mabanga beboledi bebane̱.​—wp18.2, map. 4-5.

Njika mweńa jemea la bebeledi o da omboa moto leno̱ e?

Jemedi te̱ bebeledi, di we̱ ná di londise̱ eyal’asu. (Mye. 15:4) Di si tonse̱ dikaki esibe̱ njo̱m a bwam. Mukasedi a tuse̱ ńolo o jipe̱ da.​—w18.03, dip. 18.

Njika belēdi bome ba te̱se̱be̱ beno̱ ná bokwa na Timoteo e?

Timoteo a ta a be̱ne̱ ponda ońola bato, a ta pe̱ a we̱le̱ mambo ma mudī oboso. A tuse̱ ńolo o ebol’a bosangi, a we̱le̱ pe̱ o ebolo belēdi okono̱. A bengi longa mo̱me̱ne̱, a se̱me̱ye̱ omo̱ń a mudī ma Yehova. Batudu na bape̱pe̱ be ná ba bupe̱ eyembilan ao.​—w18.04, map. 13-14.