Yete̱na kriste̱n ńangame̱n o no̱ngo̱ bedomsedi ońola betatedi bao, ńangame̱n nde bola nika bupisane̱ betesedi ba Bibe̱l. Be bete̱sedi be mate̱nge̱ne̱ bolane̱ la belongisan ba bila, ka ngadi, to̱so̱ belongisan bepe̱pe̱, o tata mo̱me̱ne̱ te̱nge̱ne̱ bane̱ bato. Jombweye te̱ ben bete̱sedi:

O miso̱ ma Yehova, longe̱—tobotobo longe̱ la moto—le tiki. Mulo̱nge̱ myenge David a ta a bia ná Yehova nde “e tongo a longe̱.” (Mye. 36:10) Ońola nika so̱, kriste̱n e no̱ngi te̱ bedomsedi ba tata mo̱me̱ne̱ to̱ mabe̱ne̱ mao, ńangame̱n bola me̱se̱ me o ngud’ao ná e si koma maya.​—Ndim. 22:8; Mye. 51:16.

To̱ ná yeno̱ mbale̱ ná to̱ njika elongisan ye ná e bola ná o kome maya, ngadi mo̱ ńe pe̱le̱pe̱le̱ o bwa moto, e be̱ na o boṅsane̱ to̱ ke̱m. * Ombusa nika pe̱, mwibedi nu po̱i e owas’a malinga ponda a me̱ne̱no̱ ná wa pe̱ o be̱n ngadi, a mabata nde jońa na malinga kańena maya me ná ma sukane̱ komabe̱.

Ponda Yesu a kwalisane̱no̱ bokwedi bao ná ba no̱nge po̱ o bulu bo sukan ba longe̱ lao o wase, jo̱nge̱le̱ lao di si ta lombwea tata la babo̱me̱ne̱. (Lukas 22:36, 38) Nde Yesu a kwalisane̱ nde babo̱ ná ba no̱nge po̱ ońola belēdi a tano̱ a pula o lee̱ babo̱ te̱nge̱ne̱ njo, to̱ e be̱ nde ná dimuti di po̱i janane̱ babo̱ na belongisan ba bila. (Lukas 22:52) Ombusa  Petro bolane̱ po̱ o ke̱ toi la mūt’a prisi ninde̱ne̱, Yesu a kwalane̱ mo̱ ná: “Timbise̱le̱ po̱ ango̱ o ebambu.” Denge̱ Yesu a mato̱po̱ nin mbal’a dibongo, ńe nde bete̱sedi be madie̱le̱ bokwedi bao nate̱na we̱nge̱: “Be̱se̱ ba mano̱nge̱ po̱ ba mawo̱ nde na po̱.”​—Mat. 26:51, 52.

Bupisane̱ Mika 4:3, tumba la Loba “di me̱nde̱ lule̱ njomb’abu mabao, mo̱ngo̱ mabu pe̱ mawe̱ndi ma mumbwa.” Yen eyemban a kriste̱n a mbale̱ ye mulatako na din jome̱le̱ la Paulo di tutabe̱le̱ na mudī-musangi ná: “O si timbise̱le̱ to̱ moto bobe ońola bobe.  . . E we̱li te̱ be̱, bola to̱ nje lo dongame̱nno̱ bola o mańu mudi na lo be̱ musango na bato be̱se̱.” (Rom. 12:17, 18) To̱na ndutu ye̱se̱ i kweledi Paulo, name̱ne̱ pe̱ na “ndutu na bato ba ndumban,” a bupe̱ byala bao ombusa, to̱ buńa a si we̱le̱ betatedi bao omo̱ń a bete̱sedi ba Bibe̱l. (2 Kor. 11:26) O mulopo ma nika, a lakisane̱ nde Loba na dibie̱ di mabuse̱ o Eyal’ao—dibie̱ lena “di buki bewesan ba bila.”​—Mul. 9:18.

Kriste̱n i mano̱ngo̱ longe̱ mweńa jita buka miam. “Longe̱ la moto di si tingam o bema bao, to̱ a be̱ne̱ nde njoasoa.” (Lukas 12:15) Ońola nika so̱ yete̱na eyem’a le̱le̱ e si wengisane̱ mo̱nge̱le̱ ma mot’a jiba nu be̱n ngadi, kriste̱n ńa dibie̱ e mabupe̱ bete̱sedi be o ben byala ba Yesu ná: “Lo si banga kusa bobe.” Ye ná e be̱ bwam ná nu nu mapule̱ no̱nge̱ so̱t’ango̱, o bole pe̱ mo̱ na loki le̱se̱. (Mat. 5:39, 40; Lukas 6:29) * O ka mbale̱, mbad’a bwam ńa tata biso̱me̱ne̱ ńe nde ná di be̱ jangwa. Di pandise̱ te̱ biso̱me̱ne̱ na “kumb’a longe̱”, di biane̱ pe̱ na myoyo masu ma mboa ka Mboṅ a Yehova i to̱ndi musango, je ná di sambise̱ye̱ biso̱mo̱me̱ne̱ bato ba jiba.​—1 Yohane 2:16; Min. 18:10.

Kriste̱n e mabola doi la mulema la bane̱ edube. (Rom. 14:21) E po̱i te̱ o biane̱ ná elong’a mwemba e kombe̱ ngadi o tata mo̱me̱ne̱ te̱nge̱ne̱ bane̱ bato, nika ńe ná e takise̱ dongo la bonasango, to̱so̱ be̱ babo̱ eso̱njisan. Ndolo e matute̱le̱ biso̱ o se̱le̱ pulise̱ bwam ba bane̱ buka basu, to̱ e be̱ nde ná jangame̱n jese̱le̱ nje di be̱nno̱ bwam o bola.​—1 Kor. 10:32, 33; 13:4, 5.

Kriste̱n i mapo̱ngo̱ miwe̱n o be̱ eyembilan a bwam. (2 Kor. 4:2; 1 Pet. 5:2, 3) Ombusa mo̱ kusa malea ma Bibe̱l, kriste̱n ńena ni mabenge̱ kombe̱ ngadi o tata mo̱me̱ne̱ te̱nge̱ne̱ bato bape̱pe̱ ńe ná e we̱le̱ so̱ngo̱be̱le̱ ka ni titi eyembilan a bwam. Ye ná e we̱le̱ be̱ ná e si dongame̱n o be̱ne̱ m’bē̱, to̱so̱ be̱ne̱ eto̱ti ya tobotobo o mwemba. Mulemlem pe̱ na kriste̱n ni mabambe̱ ngadi o ebol’ao. E wusa pe̱te̱ be̱ bwam o wasa ebolo epe̱pe̱! *

Mbadi kriste̱n e mapo̱so̱no̱ tata mo̱me̱ne̱, mbia mao, na mabe̱ne̱ mao ńe nde o ka mbale̱ to̱ti di mombweye̱ mo̱me̱ne̱; mulemlem pe̱ na mpo̱so̱ko̱ mao m’ebolo. Nde bete̱sedi ba Bibe̱l be mabonde̱ dibie̱ la Loba na ndol’ao ońol’asu. Bupisane̱ be bete̱sedi, kriste̱n you i mano̱ngo̱ bedomsedi ná i si be̱ne̱ ngadi ońola betatedi babu te̱nge̱ne̱ bato bape̱pe̱. I bi ná ba bena ba malakisane̱ Loba tongwea na die̱le̱ longe̱ labu mulatako na bete̱sedi ba Bibe̱l, nde ba me̱nde̱ be̱ne̱ betatedi ba mbale̱ na ba bwindea.​—Mye. 97:10; Min. 1:33; 2:6, 7.