KANA la so̱ngo̱ di ta di be̱ne̱ epol’ao bupisane̱ Mbend’a Mose. Nde bato o ponda Yesu ba ta ba lańse̱ y’eboledi kańena ba tano̱ nde ba nikana so̱ngo̱ o bamse̱ to̱ njik’eyala e busi moto o mudumbu. Y’eboled’a mbamba e ta nde ná e bateye byala ba moto ngińa, nde Yesu a lingise̱ nika ngedi iba. O diwengisan okwe̱le̱ nde ná: “Ese̱le̱ eyal’ańu e be̱ nde na: E, e; ke̱m, ke̱m.”​—Mat. 5:33-37; 23:16-22.

Kalati Theological Dictionary of the New Testament ni makwaleye̱ ońola male ma peńa mo̱ ná: “Ko̱lo̱ngo̱ne̱ la Bonayuda la kana so̱ngo̱ o bamse̱ eyala te̱ e busi moto o mudumbu” di ta ngińa jita, nika e me̱ne̱ne̱ o Talmud, kalati Baju ba tilino̱ o kombe̱ myeka na beboledi babu; e ta e kika njika kana la so̱ngo̱ di ta be̱ di kasabe̱ na njika mo̱ di si ta di kasabe̱.

Seto̱ Yesu buka te̱ nde a ta a te̱me̱ te̱nge̱ne̱ ben beboledi. K’eyembilan, mot’a myango ńa Bonayuda Flavius Yose̱f a to̱pedi ońola ebas’a Bonayuda ná: “Ba ta ba langa kana la so̱ngo̱ ka beto̱pedi ba mpoń, o pula kwala ná to̱ nu ńena ba si madube̱no̱ ná a si pandi Loba dina, a kwesabe̱ muka.” Betiledi ba Bonayuda be si wu na mudī-musangi, nde be biane̱ ka dibie̱ la Sirach to̱ l’Ecclésiastique, (23:11) be bamse̱ ná: “Nu te̱ ńena nu makane̱ so̱ngo̱ a te̱nge̱ne̱ mbenda.” Yesu pe̱ a te̱m te̱nge̱ne̱ yen eboledi ya wamse̱ la kana la so̱ngo̱. Di ko̱lo̱ngo̱ne̱ te̱ o to̱po̱ mbale̱ ponda ye̱se̱ di si me̱nde̱ o le̱le̱me̱ o kana so̱ngo̱ ná ba dube̱ biso̱.