Njongo a Betatedi ńa 1 bwa Dimo̱di 1918 e ta e botea na ben byala ná: “Nje mbu má 1918 mu mawanano̱ e?” Bila Bende̱ne̱ ba wase ńe̱se̱ baboso be ta be dia ngińa o Europa. Nde nje e tombi o bebotedi ba mbu e lee̱le̱ nde biana mambo ma mala be̱ bwam ońola Bokwe̱ Bibe̱l, na ońola wase ńe̱se̱.

O 8 má Dimo̱di 1918, Sango ekombo Woodrow Wilson, o ekwal’ao o m’boko ma bapo̱so̱be̱ ba Amerika, a kiki 14 la mato̱ti e̱nno̱ mweńa o wana “musango ma te̱me̱ la sim na mu bam.” A boli jo̱nge̱le̱ ná so̱ṅtane̱le̱ langame̱n be̱ oteten a matumba, muso̱ngi ma bewesan ba bila mu wutisabe̱, na bokise̱ la “mulatako oteten a matumba” mwena mu me̱nde̱ waneye̱ “bekombo bende̱ne̱ na besadi” tombwane̱. Di “Dom la mato̱ti na mane̱i” a bolino̱ nde ma bolane̱ ombusa ponda o bokise̱ bebokedi ba matumba (Ligue des nations), na o kwalea ońola (Traité de Versailles ) ni bo̱le̱ bila ba wase ńe̱se̱ baboso.

To̱na mpungu mwena mu ta o mbu mu se̱le̱, * ye̱ne̱n nde biana Bokwe̱ Bibe̱l pe̱ be ná ba be̱ne̱ musango kana ye̱ne̱nno̱ o ndongame̱n a mbu ńa Watch Tower Bible and Tract Society.

O nin ndongame̱n ni jai o 5 má Dimo̱di 1918, jita bena ba ta ba be̱ne̱ beto̱ti na bena ba pangabe̱ o Bete̱l ba wasi ná ba die̱le̱ bebokedi. Richard H. Barber, muboled’ebondo ńa jemea, nde a ta a bola muka o tele̱ ndongame̱n. Ombusa mo̱ bola bolangi b’ebol’a mbu mutombi, na mpo̱so̱ko ma badiedi mwena mu ta nde mbu te̱ ngedi po̱, mu botea. Munasango Barber a ta a po̱so̱ Joseph Rutherford na bonasango bape̱pe̱ mutoba. Nde Lo̱ya lena di ta di sue̱le̱ bate̱nge̱ne̱ bebokedi di ta di po̱so̱ bato samba bape̱pe̱ mwemba na ba bena ba ta ba pangabe̱. Nde ba bukabe̱. Dongo dinde̱ne̱ di po̱si nde Rutherford na bajemea mutoba bape̱pe̱ o be̱ badiedi.

Bonasango jita bena bukedi ba bele̱ ni ndongame̱n ná “jako̱to̱ne̱ le bonam buka me̱se̱ ba si tano̱ ba májukea o longe̱ labu le̱se̱.” Nde muńe̱nge̱ mabu mu ta nde ma son a ponda.

Bokwe̱ Bibe̱l ba ta ba mátombise̱ myo̱di to̱ mininga o camane̱ kalati Le Mystère Accompli. Balangedi ba milema ma mbale̱ ba kasi na mulema mō̱ mbal’a Bibe̱l yena i ta i tilabe̱ oten.

E.  F.  Crist, nu ta muboled’ebondo o Kanada a lango myango ma mome mō̱ na munj’ao bena ba langi Le Mystère Accompli nde ba kasa mbale̱ ombusa woki itanu buka te̱! Mo̱ ná: “Nu mome na munj’ao be iwiye̱, be pe̱ ńaka o mbad’a bwam.”

Sango mō̱ a ta a kusa nin kalati, na mo̱ a lee̱ mo̱ mako̱m mao dibokime̱ne̱. Mwe̱ndi mao mu ta mu “tapa” mo̱. Mo̱ ná: “Na ta nde na dangwa o Third Avenue ponda na sengino̱ biana briki nde be kwedi mba o dikata, nde e ta nde kalati ‘Le Mystère Accompli.’ Na timbane̱ mo̱ omboa, na langa ńe̱se̱ na bam. . . . Noko ná, mulangwe̱ eyal’a Loba mō̱ . . . nde ango mo̱ la winda na malinga . . . Ne mbaki ná ni kalati nu moto a pimbino̱ ńongwane̱ bato  jita o be̱ne̱ dipita la longe̱ buka to̱ njika belēdi a lee̱no̱, to̱ lambo dipe̱pe̱ a bolino̱ o longe̱ lao. . . . Tongwea na malinga ma nu mulangwe̱ eyal’a Loba nde jeno̱ o sesa Loba nin we̱nge̱.”

O sumo te̱ di pimba la kalati la nu mulangwe̱ eyal’a Loba, manea m’ekombo a Kanada pe̱ ma ta ma we̱le̱ nin kalati owas’a mwekan o 12 má Ngo̱nde̱ 1918, o njo̱m ná e mokwe̱le̱ mpungu na banga la no̱ngo̱ dongo o bila. Nika e si no̱ngi pond’a bwaba na badiedi ba Amerika pe̱ ba bola mulemlem. Baboledi ba go̱bina ba wase̱le̱ Bete̱l ńe̱se̱ na o̱fis asu o Ńu York Pennsylvania, na Kalifornia, o wasa mboṅ ná ba nume badie̱le̱ bebokedi njo̱m. O 14 má So̱ṅe̱ 1918, o̱fis a bekaisedi ńa Amerika e we̱le̱ kalati Le Mystère Accompli mwekan, o njo̱m ná busisabe̱ na camane̱ lao ba meka bato o sue̱le̱ bila, e makwe̱me̱ pe̱ mbend’a eboled’a pe̱pi.

O 7 má Emiase̱le̱ 1918, o̱fis a bekaisedi e ta e bola wonja ná Giovanni DeCecca, George Fisher, Alexander Macmillan, Robert Martin, Frederick Robison, Joseph Rutherford, William Van Amburgh, na Clayton Woodworth ba damabe̱le̱. O njo̱m ná “Na m’boṅsan, na esibe̱ wonja, ba tute̱le̱ bato o kwe̱me̱ manea, n’ekombo, na banga be̱ mo̱ jemea o sue̱le̱ milo̱ṅ ma bila ma mundi na ma madiba niponda Amerika e tano̱ o bila.” Ba botedi kaisabe̱ 5 má Eso̱pe̱so̱pe̱ 1918, nde to̱ moto a si wusa bolane̱ jo̱nge̱le̱ ná ba me̱nde̱ kwesabe̱ muka. Ońola nje e?

Lo̱ya la Amerika di bele̱ ni mbend’a eboled’a pe̱pi, ba numabe̱no̱ njo̱m ná ba kwe̱m ná, “ewesan a bila ya ngińa te̱nge̱ne̱ camane̱ la mo̱nge̱le̱.” O 16 má Emiase̱le̱ 1918, Bapo̱so̱be̱ b’ekombo ba bangi mpo̱ngulan o to̱ti la mbenda lena di wusa tate̱ ba bena ba mabusise̱ kalati i malangwe̱ “nje ye mbale̱, na mo̱nge̱le̱ ma bwam, esibe̱ musawedi.” O muka mabu ba to̱pedi tobotobo ońola Le Mystère Accompli. Bolangi ba bapo̱so̱be̱ ba Amerika bo ta bo kwala ná: “Eyembilan a bobe e buki be̱se̱ ya nin ńai a camane̱ la mo̱nge̱le̱ ye nde kalati ‘Le Mystère Accompli’ . . . Janda lao le nde ná e tute̱le̱ sonja o yaṅa njo̱m asu ńa bila . . . mbia pe̱ mi singe̱ ebol’a sonj’a bila.”

O 20 má Eso̱pe̱so̱pe̱ 1918, babakwe̱ mbako ba bako ná ba bonasango lo̱mbi ba kwedi muka o njo̱m ye̱se̱ i numabe̱ babo̱. O bone̱ bo bupe̱, mukaisedi a busise̱ mbako ao. A kwala ná: “Belēdi bena ban banumabe̱ njo̱m ba we̱no̱ na ngud’abu ńe̱se̱ o camane̱ na o lingea . . . be bobe buka epep’a sonj’a Jaman. . . . Beko̱kisedi bangame̱n be̱ ngińa.” Ombusa woki iba ban bonasango ba so̱li o ndabo a beboa ńa Atlanta, Georgia, na mbako a beboa ńa botea 10 nate̱na 20 ma mbu.

O ni ponda Bokwe̱ Bibe̱l ba ta ba kusa mitakisan minde̱ne̱. O̱fis a muwaso (FBI) e wase̱le̱  bwambwam ebol’a Bokwe̱ Bibe̱l, e busise̱ lokoli la mapapa. Bo bolangi bo lee̱ ná bonasango’asu ba ta te̱ nde ba tingame̱ o te̱ dikalo.

O leta diwo̱ a tiledino̱ O̱fis a muwaso FBI, mombwed’a post ńa Orlando, Florida mo̱ ná: “[Bokwe̱ Bibe̱l] ba mala o jo̱mbe̱ na jo̱mbe̱ mundi mwe̱se̱, ba mabola pe̱ nde nika tobotobo bulu. . . . E me̱ne̱ne̱ biana makalando ma ko̱d’abu ńa dikalo ma dia te̱ nde wea.”

Kolone̱l po̱ ńa O̱fis a bila e tiledi O̱fis a muwaso jombwea ebol’a Frederick W. Franz, nu boledi k’elong’a Dibe̱le̱ di Madie̱le̱ ombusa ponda. Ni kolone̱l e tili ná: “F. W. Franz e ko̱di o jandise̱ lokoli la nin kalati ‘Le Mystère Accompli’.”

Charles Fekel, ńena mo̱ pe̱ a boledi k’elong’a Dibe̱le̱ di Madie̱le̱, a kusi mitakisan minde̱ne̱. Go̱bina e ta e damea mo̱ o njo̱m ná a mabane̱ Le Mystère Accompli, ba kumwa pe̱ o langa maleta mao. A ta a we̱le̱be̱ o beboa o Baltimor, Maryland, mo̱di mō̱, a langabe̱ ka “mwe̱n a moto nu singe̱ Ostria.” Kana a tano̱ a te̱ye̱ babaise̱ mo̱ myuedi dikalo na bokenju, o̱nge̱le̱ byala ba Paulo ba 1 Korinto 9:16 be makwale̱ ná: “Mbeu a ńolo na mba, ke̱ na si malangwa myango ma bwam!” *

O sumo te̱ dikalo labu la yē̱yē̱, Bokwe̱ Bibe̱l ba tili ná ba busise̱ bonasango ba ta o beboa o Atlanta, ba bola ná lokoli la bato lo sain di dipapa o sue̱le̱ babo̱. Anna K. Gardner mo̱ ná: “Di si ko̱te̱le̱ mā masu niponda ńe̱se̱ bonasango ba tano̱ o beboa, ebol’asu e ta nde ná di ko̱te̱le̱ bato ba masain dipapa. Jalo o jo̱mbe̱ na jo̱mbe̱. Lokoli la bato lo sain! Di langwedi bato di tano̱ di kwalisane̱ ná bonasango be nde Kriste̱n a mbale̱, ná ba we̱le̱be̱ nde o beboa o njo̱m ni si te̱nge̱n.”

O ni pond’a mitakisan di ta di yo̱ko̱ be̱ne̱ mako̱to̱ne̱ o jembe̱ mbia ma bonasango o mudī. Njongo a Betatedi e kwali ná: “Buka mwane̱i ma mako̱to̱ne̱ . . . ma jai mu mbu . . . Di kusi milangi ma muńe̱nge̱ o ma mako̱to̱ne̱ me̱se̱. O kwaṅ, mako̱to̱ne̱ ma ta nde ma tomba o su la loe̱ to̱so̱ o bebotedi b’epupa, nde tatan di be̱n mo̱ mo̱di te̱.”

Ba milema ma mbale̱ ba ta te̱ nde ba dia ba makasa myango ma bwam. O jako̱to̱ne̱ diwo̱, o Kleveland, Ohio, lambo ka 1 200 bato bukedi, 42 ba dubisabe̱, o muso̱ngi mabu o ta o be̱ne̱ eso̱mb’a moto yena e ta e “to̱ndo̱ Loba e be̱ne̱ pe̱ dube̱ di wusa bwese̱ mutud’a moto iso̱n.”

Kana mbu má 1918 mu tano̱ mu nipo̱ o su, Bokwe̱ Bibe̱l ba si ta ba bia nje kie̱le̱ e mawanano̱. Milongi ma Broklyn mō̱ mandisabe̱, na mulopo m’ebolo mwasumwe̱ oten, mwala o Pittsburgh, Pennsylvania. Niponda badiedi ba tano̱ ba dia o beboa, jako̱to̱ne̱ la bebokedi ba Watchtower dipe̱pe̱ di ta langame̱n ja o 4 má Dimo̱di 1919. Nje e me̱nde̱ bolane̱ e?

Bonasango asu ba bengi nde walane̱ ebol’abu oboso. Ba ta mbaki na kie̱le̱ ni maye̱ o dime̱ne̱ lena ba po̱sino̱ ka te̱xt a mbu má 1919: “Eye̱i a bwemba to̱ ewo̱ e malulabe̱ te̱nge̱ne̱ wa e si me̱nde̱ tongwe̱le̱ to̱ lambo.” (Yes. 54:17) Ba ta ba boṅsane̱ babo̱me̱ne̱ ońola diwengisan l’epańpań la mambo, lena di me̱nde̱ bate̱ jouse̱ dube̱ labu, na jembe̱ pe̱ babo̱ ońola ebolo ende̱ne̱ e ta yenge̱le̱ babo̱.