PONDA IWO̱, e. Jombweye te̱ eyembilan ewo̱. Kalat’a Ndimbisedi 24:14, 15 e makwala ná: “O si takise̱ muboledi o kakino̱ o bolea wa, ńena ńe mutuedi na mutakedi, to̱ a be̱ nde mō̱ ńa bonaso̱ngo̱ to̱ ńa njan ye o ekombo ango̱ na o mundi mo̱ngo̱ . . . A si ya be̱ eyane̱ Yehova ońol’ango̱, na wa o bambe̱ njo̱m a bobe.”

Myango ma ni ńai a so̱mo̱n mi biane̱ botea o ebwea mbu e londe̱ samba B.P.A. mi so̱be̱ nde o mbasan ma Asdod. Yen ebe, mi myango mena mi tilabe̱ o epas’a eloko, mi ta nde ońola muboledi mō̱ ńena nu si londe̱ dime̱ne̱ la mbolako a tano̱ angame̱n o sa. Mi makwala ná: “Mińa to̱ mininga ombusa muboled’ango̱ [muso̱mo̱ne̱] bo̱le̱ kombe̱ mumbwa, Hoshayahu mun’a Shobay, a po̱i na mo̱ a no̱ngo̱ loki la muboled’ango̱. . . . Mako̱m mam me̱se̱ mena ma ta o mumbwa mwemba na mba owas’a ebabad’a wei me ná ma bamse̱ . . . ná nje na kwalino̱ ye mbale̱. Na si boli to̱ lambo la bobe. . . . Yete̱na go̱bina e̱n ná e titi m’bē̱ mao ma bola ná loki la muboled’ao di timbisabe̱le̱ mo̱, ndedi e tute̱le̱ wa o bola nika. O titi ná o ko̱ mbuke ke̱ muboled’ango̱ a si be̱n loki lao.”

Mulangwe̱ myango mō̱, Simon Schama mo̱ ná, ni so̱mo̱n “e si makwalea buka te̱ ońola muboledi nu si be̱n dipita ná loki lao di me̱nde̱ timbisabe̱le̱ mo̱. E mabola pe̱ so̱ṅtane̱ ná muso̱mo̱ne̱ a ta a bia mambenda ma Bibe̱l, tobotobo mbenda ni tilabe̱ o kalat’a Levitiko na ńa Ndimbisedi jombwea takisabe̱ la batuedi.”