1. Nje bayedi be Kriste̱n bangame̱nno̱ se̱le̱ bakise̱ obiana bana babu ba madubisabe̱ e?

BLOSOM BRANDT a malangwa nje ye̱se̱ e tombi obiana a madubisabe̱. Mo̱ ná: “Nika e no̱ngi myo̱di eyeka na tano̱ na langwea papa na mama ná na mapula o dubisabe̱, babo̱ pe̱ ba ta be̱ ba kwalisane̱ mba nika, ponda iwo̱. Ba ta ba pula be̱ mbaki ná na bi bodilo ba bedomsedi na tano̱ na pula no̱ngo̱. O sukan, bo buńa bwe mweńa buka me̱se̱ o longe̱ lam bo timbi po̱ o 31 má Elaṅe̱ 1934.” O nin we̱nge̱, bayedi be Kriste̱n ba be̱n mulemlem ma ńo̱ngi o jongwane̱ bana babu o no̱ngo̱ bedomsedi ba dibie̱. Timbise̱ la dubise̱ ombusa to̱ jindise̱ la mo̱ esibe̱ njo̱m le ná di takise̱ mulatako ma muna na Yehova. (Yak. 4:17) Nde bayedi be dibie̱ ba mabola ná ba be̱ mbaki ná bana babu be ńai ni dongame̱n o bambe̱ m’bē̱ ma be̱ mokwed’a Kristo obiana ba madubisabe̱.

2. (a) Njika mitakisan mō̱ baboledi b’ebondo ba so̱ino̱ e? (b) Nje di malano̱ jombwea o din jokwa e?

² Baboledi ba bebondo bō̱ ba so̱i ná jita la beso̱mbe̱ be  oteten a 17 la mbu na 22, bena ba kokedi nde na bayedi be Kriste̱n ba si bedi o dubisabe̱. O jita la ngedi, ben beso̱mbe̱ be mukea o ndongame̱n na no̱ngo̱ pe̱ dongo o dikalo. Be me̱ne̱ nde babo̱me̱ne̱ ka Mboṅ a Yehova. Nde, ońola njo̱m iwo̱ te̱nge̱ be makiṅakiṅane̱ ná be bake̱ babo̱me̱ne̱ na Yehova, be dubisabe̱ pe̱. Nje ye njo̱m a nika e? Ngedi iwo̱, bayedi nde ba mindise̱ babo̱. O din jokwa, di mala jombwea mambo mane̱i mena meki bayedi bō̱ be Kriste̱n o jongwane̱ bana babu ná ba ńake nate̱na dubise̱.

3. Njika myuedi bayedi ba Blosom ba tano̱ ba baise̱ na babo̱me̱ne̱ e?

³ Bayedi ba Blosom di kwaledino̱ o dongo laboso ba ta ba baise̱ na babo̱me̱ne̱ nga mun’abu ńa muto ā moto nu dongame̱n o so̱ṅtane̱ beteledi na bodilo ba nje ye dubise̱. Ne̱ni bayedi beno̱ ná ba bia nga muna ā moto nu dongame̱n o bake̱ mo̱me̱ne̱ na Yehova e?

4. Ne̱ni byanedi ba Yesu be o Mateo 28:19, 20 be mongwane̱no̱ bayedi ke̱ ba mokwe̱le̱ bana babu e?

⁴ Langa Mateo 28:19, 20. Ka nje te̱ di kwaledino̱ o jokwa di se̱le̱, Bibe̱l e si mabola mimbu moto angame̱nno̱ dubisabe̱. Nde bayedi ba no̱ngi te̱ ponda o dutea o nje timbise̱ la bato bokwedi di mapulano̱ kwala, nika ńe ná e be̱ babo̱ muse̱ṅ. Eyal’a Grikia e tukwabe̱ ná ‘timbise̱ matumba [to̱so̱ “bato,” NW] bokwedi’ o Mateo 28:19, e bambe̱ nde jo̱nge̱le̱ la jokwe̱le̱ bato na janda ná ba timbe bokwedi. Mokwedi e nde moto nu mokwe̱ na nu maso̱ṅtane̱ belēdi ba Yesu, nu no̱ngi pe̱ bedomsedi o bupe̱ be belēdi. Bayedi be Kriste̱n be̱se̱ bangame̱n so̱ jokwe̱le̱ bana babu botea mūtu, ná bongwane̱ babo̱ o timba bokwedi ba dubisabe̱ ba Kristo. Ye mbale̱ ná mwe̱nge̱ ma muna mu titi moto nu dongame̱n ońola dubise̱. Nde Bibe̱l e malee̱ ná nate̱na mo̱me̱ne̱ bana basadi be ná ba so̱ṅtane̱ na to̱ndo̱ pe̱ mbal’a Bibe̱l.

5, 6. (a) O njika mimbu Bibe̱l e makwalano̱ ná Timoteo a dubisabe̱ e? (b) Ne̱ni bayedi be ye̱ne̱ beno̱ ná bongwane̱ bana babu ńai a bwam e?

⁵ Timoteo a ta nde mokwedi nu no̱ngi bedomsedi ba bolea Loba ke̱ a dia eso̱mbe̱. Ńamuloloma Paulo a kwali ná Timoteo oko mbal’a Betiledi botea mūtu. To̱ná Timoteo a kokedino̱ nde o mbia mwabedi o dube̱, ńango na ńango ńa mbambe̱ bena ba ta nde ngo̱n a Bonayuda ba ta ba de̱ mo̱ ndol’a Betiledi o mulema. Nika ńongwane̱ mo̱ o be̱ne̱ dube̱ le ngińa. (2 Tim. 1:5; 3:14, 15) O bodun ba lambo ka 20 ma mbu, Timoteo a ta ā mokwed’a Kristo nu dongame̱n o be̱ne̱ beto̱ti ba tobotobo o mwemba.​—Bebolo 16:1-3.

⁶ Ye mbale̱ ná bana be̱se̱ ba titi ńai po̱; bō̱ ba mapomane̱ o joua buka bane̱. Bō̱ ba maso̱ṅtane̱ mbale̱, ba no̱ngo̱ bedomsedi ba dibie̱, ba pula pe̱ o dubisabe̱ ke̱ ba dia eso̱mbe̱. Bō̱ pe̱ ba me̱nde̱ nde be̱ ńai ni dongame̱n ońola dubise̱ ke̱ ba mákoka pe̱te̱ eyeka. Bayedi bangame̱n so̱ be̱ ye̱ne̱ ná ba si ńakisane̱ bana babu ná ba dubisabe̱. O diwengisan, bongwane̱ nde mō̱ ńabu te̱ ná a ńake bupisane̱ ne̱ni ngud’ao e madie̱le̱no̱ mo̱. Bayedi be muńe̱nge̱ ke̱ muna a bupe̱ malea me o Minia 27:11. (Langa.) Nde ba s’angame̱n dimbea ná mpuli mabu mwe nde ná bongwane̱ bana babu o be̱ bokwedi. Bupisane̱ mun mpuli be so̱ ná ba baise̱ na babo̱me̱ne̱ ná, ‘Mo̱ mun’am a mábe̱ne̱ so̱ṅtane̱ di dongame̱n o bake̱ mo̱me̱ne̱ na Loba, na dubisabe̱ pe̱ e?’

7. Mo̱ moto angame̱n nde se̱le̱ bia to̱ti la belēdi ba Bibe̱l te̱ denge̱ a madubisabe̱ e? Bola beteledi.

⁷ Mpuli ma bayedi mwe nde ná bokwe̱le̱ bana babu ná ba be̱ne̱ eyoto e bam ya so̱ṅtane̱ di mongwane̱ babo̱ o bake̱ babo̱me̱ne̱ na Loba. E te̱nge̱ne̱ pe̱ nika. Nde nika e si mapula kwala ná muna angame̱n nde se̱le̱ bia to̱ti la belēdi ba Bibe̱l te̱ denge̱ a mabake̱ mo̱me̱ne̱ na Loba, a dubisabe̱ pe̱. Ombusa dubise̱, bokwedi be̱se̱ bangame̱n benga ńaka o be̱ne̱ so̱ṅtane̱ di te̱nge̱n la Loba. (Langa Kolose 1:9, 10.) Njika dime̱ne̱ la so̱ṅtane̱ so̱ di mapule̱ e?

8, 9. Njika belēdi jeno̱ ná di busane̱ o myango ma Paulo na mutated’a ndabo a beboa e?

⁸ Myango ma longe̱ la mbia mō̱ ma ńo̱ṅo̱n a boso me ná mongwane̱ bayedi nin we̱nge̱. (Bebolo 16:25-33) O lo̱ndo̱ lao di londe̱ maba, o lambo ka 50 P.A., Paulo a pe̱pe̱le̱ bato ba Filipi. Niponda ba tano̱ owo nde bā na mwenj’ao ń’ebolo Silas ba damabe̱le̱no̱ ońola njo̱m ni si te̱nge̱n, ba we̱le̱be̱ pe̱ o beboa. Nde oteten a bulu, mińangadu mi ta mi soa na ngińa, eyot’a ndabo a beboa e soa, mo̱mbe̱ me̱se̱ ma telame̱. Nde mutated’a ndabo a beboa a bo bo̱ngo̱ ná bato ba beboa ba bo̱mbi, a pula bwa mo̱me̱ne̱, na Paulo a bele̱ mo̱ na doi la mo̱ń ná a s’e̱nse̱ mo̱me̱ne̱ sese. Paulo na Silas ba langwedi mo̱ na bona bao be̱se̱ Eyal’a Loba. Nje ndol’a mbale̱ jombwea Yesu ba tano̱ bokwa e tute̱le̱no̱ babo̱ o bola e? Ba dubisabe̱ esibe̱ jindea. Nje min myango mi mokwe̱le̱no̱ biso̱ e?

⁹ E me̱ne̱ne̱ biana o kwaṅ mutated’a ndabo a beboa a se̱le̱ nde be̱ sonj’a bila ńa Roma. A si ta so̱ a bia Eyal’a Loba. Ná a be̱ne̱ eyoto you ya so̱ṅtane̱ la Betiledi, a ta angame̱n jokwa belēdi ba bosoboso ba Bibe̱l, a so̱ṅtane̱ nje be̱ la muboled’a Loba di mapulano̱ kwala, a no̱ngo̱ pe̱ bedomsedi o bupe̱ belēdi ba Yesu. E si no̱ngi pond’a bwaba, so̱ṅtane̱ lao la belēdi ba bosoboso ba mbale̱ na ndol’a nje a tano̱ okwa ba tute̱le̱ mo̱ o dubisabe̱. Ye̱ke̱i te̱ a bengi ńaka o so̱ṅtane̱ ombusa dubise̱ lao. Bupisane̱ yen eyembilan, nje wangame̱nno̱ bola ke̱ mun’ango̱ a langwedi wa ná a to̱ndi Yehova, a mapula pe̱ o dubisabe̱ e? We ná wese̱le̱ ná a kwalisane̱ batudu o mwemba ná bombweye nga ā ńai ni dongame̱n ońola dubise̱. * Mulemlem ka bane̱ bokwedi ba dubisabe̱, a me̱nde̱ benga ńaka o so̱ṅtane̱ la mwano ma Loba o longe̱ lao le̱se̱, na o bwindea.​—Rom. 11:33, 34.

10, 11. (a) Njika jo̱nge̱le̱ bayedi bō̱ ba be̱nno̱ e? (b) Nje e mawaneye̱ muna betatedi ba mbale̱ e?

¹⁰ Bayedi bō̱ ba mo̱nge̱le̱ ná ye bwam ná mun’abu ńa mome to̱ ńa muto a se̱le̱ nde walane̱ esukul’ao oboso, a be̱ne̱ pe̱ ebol’a bwam denge̱ a madubisabe̱. Ban bayedi be nde o pulea bana babu bwam, nde nika nde e me̱nde̱ jongwane̱ mun’abu ná a tongwe̱le̱ na mbale̱ e? Nika ńe mulatako na Betiledi e? Ne̱ni Yehova a mapulano̱ ná di bolane̱ longe̱ lasu e?​—Langa Mulangwedi 12:1.

¹¹ Ye mweńa ná di si dimbea ná nin wase na nje ye̱se̱ ye oten ba mate̱nge̱ne̱ nje Yehova a mapulano̱ na nje a mo̱nge̱le̱no̱. (Yak. 4:7, 8; 1 Yohane  2:15-17; 5:19) Mulatako ma bwam na Yehova nde mwe betatedi be buki be̱se̱ ońola muna. Mu matata mo̱ na Satan, na nin wase na mo̱nge̱le̱ mao ma bobe. Bayedi bokwe̱le̱ te̱ muna ná esukulu na ebol’a bwam nde be mambo maboso, muna e ná o̱nge̱le̱ ná mambo ma nin wase me mweńa buka mulatako ma bwam na Yehova. Bayedi bandolo be Kriste̱n be ná ba pula ná nin wase nde ńokwe̱le̱ mun’abu ne̱ni tongwe̱le̱ e? Mbadi po̱ na mune ńa be̱ne̱ muńe̱nge̱ ma mbale̱ na bonam, ńe nde ke̱ di boli Yehova epol’a boso o longe̱ lasu.​—Langa Myenge 1:2, 3.

12. Ońola nje bayedi bō̱ ba mo̱nge̱le̱no̱ ná bana babu bangame̱n pe̱te̱ jenge̱le̱ denge̱ ba madubisabe̱ e?

¹² Ńango a muna mō̱ a lango ońola nje a si tano̱ a pula ná mun’ao ńa muto a dubisabe̱. Mo̱ ná: “Nika ńe mba iso̱n o kwala ná njo̱m a mom e ta nde ná e ná a pangabe̱ o bebokedi.” Mulemlem ka nu munańango, bayedi bō̱ pe̱ ba mabolane̱ jo̱nge̱le̱ ná e me̱nde̱ be̱ bwam ná mun’abu a dubisabe̱ nde ke̱ a mákoka eyeka, e si ya be̱ a bola bobe. (Bbot. 8:21; Min. 22:15) Jo̱nge̱le̱ la ba bayedi le nde ná, ‘Etum te̱ mun’abu a si dubisabe̱no̱, a titi ná a pangabe̱.’ Ońola nje di jo̱nge̱le̱ leno̱ la mpenga e?​—Yak. 1:22.

13. Mo̱ timbise̱ la dubise̱ ombusa di meka ná moto a si be̱ne̱ bolangi o bola Loba e? Bola beteledi.

¹³ Ye mbale̱ ná bayedi be Kriste̱n ba si me̱nde̱ jese̱le̱ bana babu ná ba dubisabe̱ ke̱ ba si bedi joua eyeka o bake̱ babo̱me̱ne̱ na Loba. Nde nika e me̱nde̱ be̱ babo̱ diwuse̱ o jo̱nge̱le̱ ná muna a si be̱n bolangi to̱ bō̱ o bola Yehova yete̱na a si bedi dubisabe̱. Ońola nje e? Ońolana seto̱ dubise̱ nde di mabole̱ ná moto a bole bolangi. Loba a mabaise̱ muna bolangi botea na ponda a mabiano̱ nje ye bwam na nje ye bobe o miso̱ ma Yehova. (Langa Yakobo 4:17.) O mulopo ma bo̱bise̱ muna ná a dubisabe̱, bayedi be dibie̱ ba mawe̱ na ngińa o bola mo̱ eyembilan a bwam. Ba mawe̱ ná botea o mińa mao ma mūtu ba de̱ mo̱ o mulema ndol’a bete̱sedi basam ba Yehova jombwea bedangwedi. (Lukas 6:40) Ni ndolo e me̱nde̱ tata muna na tute̱le̱ pe̱ mo̱ o tingame̱ na nje e do̱lisan Yehova.​—Yes. 35:8.

14. Ne̱ni batudu beno̱ ná ba sue̱le̱ bayedi be o jongwane̱ bana babu ná ba ńake nate̱na dubise̱ e?

¹⁴ Batudu pe̱ be ná ba to̱pea bwam ońola mambo ma mudī beso̱mbe̱ bangame̱nno̱ bupe̱ ná ba sue̱le̱ bayedi. Munańango mō̱ nu boledi ka paonia etum a 70 ma mbu a dia a mo̱nge̱le̱ ekwal’a bā na munasango Carle T. Rusel ke̱ a be̱n nde mbu mutoba buka te̱. Mo̱ ná: “A no̱ngi 15 minuti ná di kwaleye ońola mambo mam ma mudī na tano̱ na bupe̱.” Na mbale̱, byala ba bwam na be membe̱ be ná bongwane̱ moto o longe̱ lao le̱se̱. (Min. 25:11) Batudu be pe̱ ná ba bola ná bayedi na bana babu ba no̱nge dongo o bebolo ba Ndabo a Janea. Be ná ba bola bana bebolo bupisane̱ mimbu na ngud’abu.

15. O njika mbadi bane̱ beno̱ ná bongwane̱ beso̱mbe̱ o mwemba e?

¹⁵ Bene̱ belongi ba mwemba pe̱ be ná be bola ná be be̱ne̱ ponda ońola beso̱mbe̱. Nika e mabaise̱ ná ba be̱ ye̱ne̱ o je̱ne̱ bońaki babu ba mudī. Pondapo̱ muna a boli jalabe̱ la bwam o mwemba, to̱so̱ a tombise̱ ekwal’ao bwam o ndongame̱n a teten a woki.  Ye pe̱ ná e be̱ ná muna a tongwe̱le̱ o lembe̱ makekisan to̱ te̱ye̱ moto dikalo o esukulu. Be̱ makwasi o sesa mo̱ na bokenju. Je pe̱ ná di te̱se̱ ná, oboso to̱ ombusa ndongame̱n di kwale n’eso̱mbe̱ ewo̱ ya mwemba o lee̱le̱ mo̱ ná di be̱n ponda ońol’ao. Na nika nde beso̱mbe̱ be maso̱ṅtane̱no̱ ná babo̱ pe̱ be nde belongi ba “jako̱to̱ne̱ dinde̱ne̱.”​—Mye. 35:18.

16, 17. (a) Njika mulatako mwe oteten a dubise̱ na kie̱le̱ ni maye̱ ńa moto e? (b) Njika muńe̱nge̱ bayedi be Kriste̱n be̱se̱ ba mawe̱no̱ o be̱ne̱ e? (Ombwa duta la bebotedi ba jokwa.)

¹⁶ Bongwa la muna “o bo̱ngo̱ na o malea ma [Yehova]” le nde eto̱ti e buki be̱se̱ muyedi ńe Kriste̱n a be̱nno̱. (Efe. 6:4; Mye. 127:3) O Israel ńa kwaṅ bana ba ta nde ba yabe̱ o tumba di bake̱ mo̱me̱ne̱ na Loba o bola jemea lao. Nde seto̱ nika nde yeno̱ o nin we̱nge̱ na bana ba bayedi be Kriste̱n. Omo̱ń a nika pe̱ muna a si mayabane̱ ndol’a Loba na ńa mbale̱. Botea o buńa ba mayabe̱no̱ bayedi bangame̱n o we̱ ná bongwane̱ babo̱ o timba bokwedi ba bake̱ babo̱me̱ne̱ na Yehova, ba dubisabe̱ pe̱. Lambo to̱ diwo̱ le mweńa buka di di titi. Omo̱ń a me̱se̱, bake̱ la ńolo, dubise̱, na bolea la Loba na jemea nde ba me̱nde̱ leneye̱ mō̱ ńasu te̱ eyemban a besungedi o pond’a ndenge̱ ninde̱ne̱.​—Mat. 24:13.

¹⁷ Blosom Brant a no̱ngino̱ bedomsedi ná a mapula dubisabe̱, bayedi bao ba mabwe̱ Loba bo̱ngo̱ ba puli o be̱ mbaki ná ā moto nu dongame̱n o no̱ngo̱ tanga le mweńa buka me̱se̱ la longe̱ lao. Ba sue̱le̱ bedomsedi bao ponda ba so̱ino̱ nika. Sango a boli lambo la bwam la mańaka o bulu bo se̱le̱ na dubise̱ lao. Blosom mo̱ ná: “A baise̱ ná biso̱ be̱se̱ di nume mabo̱ngo̱ wase, na mo̱ a kane̱. A kwalane̱ Yehova ná e muńe̱nge̱ jita ońola bedomsedi son ao ya mun’a muto a no̱ngino̱ o bake̱ mo̱ Loba longe̱ lao.” Buka 60 ma mbu ombusa ponda, Blosom mo̱ ná: “We ná o be̱ mbaki ná na si me̱nde̱ dimbea bo bulu o longe̱ lam le̱se̱!” A bayedi, bińo̱ pe̱ bwa muńe̱nge̱ na mutam o je̱ne̱ ná bana bańu ba bake̱ babo̱me̱ne̱ na Yehova, ba dubisabe̱ pe̱ o bola jemea lao.