YE ETUM a ponda bola la mabea di be̱nno̱ epol’a mweńa o jowe̱ la mbale̱. Bana ba Israel ba ta be̱ ba bola byembe ka mabea, Kriste̱n pe̱ i biane̱ ka babole̱ “mabea ma sesa.” Nde, mabea mape̱pe̱ me mena ma do̱lisane̱ Loba. (Bon. 13:15, 16) Man mabea ma mawana muńe̱nge na minam, ka nje te̱ ben byembilan be malee̱no̱.

Hana, muboled’a jemea ńa kwaṅ, a ta a be̱ne̱ ńo̱ngi bwambi o be̱ne̱ mun’a mome, nde a si ta a ya. Na mo̱ a kakane̱ Yehova o muka ná yete̱na a yai mun’a mome, a “mabake̱ mo̱ Yehova o mińa ma longe̱ lao me̱se̱.” (1 Sam. 1:10, 11) Hana a timbi no̱ngo̱ deme̱, na mo̱ a ya mun’a mome a bele̱no̱ ná Samuel. Ponda Samuel ino̱ dibe̱, na Hana alane̱ mo̱ o muno̱ko̱ kaponda kakane̱ lao. Yehova a namse̱ Hana ońola edī ao ya bola na jemea la wonja. Loba abedi mo̱ bana batanu bape̱pe̱, Samuel pe̱ a timba be̱ muto̱ped’a mudī na mutiledi mō̱ ńa Bibe̱l.​—1 Sam. 2:21.

Kana Hana na Samuel, Kriste̱n pe̱ we̱nge̱ i be̱n edube o bolane̱ malonge̱ mabu ońola ebol’a bosangi ya Muweked’abu. Yesu a kakane̱ ná mabea me̱se̱ di mabolano̱ o jowe̱ Yehova ma me̱nde̱ kusa musawedi munde̱ne̱.​—Marko 10:28-30.

O ńo̱ṅo̱n a boso, Kriste̱n po̱ ńa muto ni ta ni belabe̱ ná Dorkas a ta a biane̱ ońola “bebolo ba bwam na mabea jita”​—mena a tano̱ a bola o jongwane̱ bape̱pe̱. Nde, “a ta a boa, a wo̱,” na nika e bwese̱ mwemba mwe̱se̱ ndutu. Ponda bokwedi ba sengino̱ ná Petro e o mbasan, na babo̱ ba so̱so̱me̱ye̱ mo̱ ná a pomane̱ o po̱. Dutea te̱ muńe̱nge̱ mabu ponda Petro a po̱ino̱ na mo̱ a pumbwe̱le̱ Dorkas​—nika nde e ta ka bepumbwedi baboso ba ńamuloloma mō̱! (Bebolo 9:36-41) Loba a si dimbedi mabea ma Dorkas. (Bon. 6:10) Myango ma sanga lao la mulema mi kombabe̱ o Eyal’a Loba k’eyembilan a bwam jangame̱nno̱ bupe̱.

Ńamuloloma Paulo pe̱ a lee̱le̱ mulemlem m’eyembilan a bwam ya mō̱ nu boli mo̱me̱ne̱ na pond’ao pe̱ na sanga la mulema. A kwalane̱ Bonasango bao ba Korinto o leta a tiledino̱ babo̱ ná: “Mba ne muńe̱nge̱ o bola to̱ nje na be̱nno̱, na bola pe̱ longe̱ lam le̱se̱ ońola midī mańu.” (2 Kor. 12:15) Dibie̱ la longe̱ Paulo a tano̱ a mábe̱ne̱ di boli mo̱ so̱ṅtane̱ ná, bola la wame̱ne̱ ka jabea ońola bwam ba bane̱ di malenea wa mutam​—nde di buki me̱se̱​—o mado̱lisane̱ Yehova, o kusane̱ pe̱ mo̱ minam.​—Bebolo 20:24, 35.

Na mbale̱, Yehova e muńe̱nge̱ ke̱ di mabolane̱ pond’asu na ngud’asu o lańse̱ myam ma Janea, na wanea pe̱ bonasango asu jongwane̱. Mo̱ mbadi ipe̱pe̱ ye ya sue̱le̱ ebol’a dikalo la Janea e? E! O sumo te̱ bebolo basu ba ndolo, je pe̱ ná di sesa Loba na mabea masu ma wonja. Ma mabolane̱ o sue̱le̱ ebol’a dikalo o wase ńe̱se̱, name̱ne̱ pe̱ na o jongwane̱ bamuloloma na baboledi bape̱pe̱ ba pond’a mususu ba tobotobo. O mbat’a nika, m’boṅsan na betukwedi ba kalati na sinima, sue̱le̱ la ba bena mbeu a ńolo e kweledino̱, na longa la Mandabo ma Janea ma peńa ma masuabe̱le̱ nde na mabea masu ma wonja. Je ná di be̱ mbaki ná “mudo̱le̱ mulema a me̱nde̱ namsabe̱.” Di buki me̱se̱, di mabola Yehova edube ke̱ di mabola mo̱ bema basu ba tiki.​—Min. 3:9; 22:9.