Mbeu a ńolo e kwedi te̱

OKA

“O bebotedi, jo̱nge̱le̱ ná dipita to̱ diwo̱ di titi pe̱. Nje ye̱se̱ di tano̱ di be̱ne̱ e ńam o sosea la mińangadu na mpupe.”—Andrew, ńa Siera Leone.

“Ombusa mùdi munde̱ne̱, di timbi ombo’asu. To̱ lambo di si ta pe̱ di dia. Di ta di bukea. Mun’am ńa muto a num mabo̱ngo̱ o wase na mo̱ a botea jeya mbembe.”—David, ńa Îles Vierges.

YETE̱NA o monga o mbeu a ńolo, we ná o so̱ṅtane̱ ne̱ni bape̱pe̱ bena bongi ba sengino̱: mańaka, banga la jemea nje e bolane̱, pambilane̱, mutaka, na ndo̱t’a bobe. Jita la bato bena bongi o mbeu a ńolo ba be̱n mulema mu ńo̱sedi, ba wo̱ledi, ba si be̱n pe̱ to̱ ńo̱ng’a benga be̱ longe̱.

Yete̱na mbeu a ńolo e boli ná o bo̱lo̱ne̱ nje ye̱se̱ o tano̱ o be̱ne̱, wa pe̱ we ná wo̱nge̱le̱ ná o titi pe̱ ná o lembe̱ mitaka mipe̱pe̱. We ná na mo̱me̱ne̱ o botea jo̱nge̱le̱ ná e titi njo̱m ná o be̱ longe̱. Nde, Bibe̱l e matele̱ye̱ ná ye njo̱m ná o be̱ longe̱ na ná o be̱n njo̱m a bwam o be̱ne̱ dipita la kie̱le̱ ni maye̱ ńa bwam.

MBALE̱ ŃE O BIBE̱L E MABOLA BISO̱ DIPITA

Kalat’a Mulangwedi 7:8 e makwala ná: “Su la lambo di do̱li buka bebotedi bao.” Mbeu a ńolo ńe te̱ wa o ko̱ye̱ wa, we ná wo̱nge̱le̱ ná dipita to̱ diwo̱ di titi pe̱. Nde nika weno̱ po̱ngo̱ miwe̱n o longa longe̱ lo̱ngo̱ peńa, mambo me ná ma botea tukwa o mbad’a bwam.

Bibe̱l e bīse̱ ponda ńena ‘madoi ma mbembe na misea ma ndenge̱ ba si me̱nde̱no̱ pe̱ sengabe̱.’ (Yesaya 65:19) Nika e me̱nde̱ nde londa ponda wase e me̱nde̱no̱ timbisabe̱ paradisi owas’a Janea la Loba. (Myenge 37:11, 29) Mbeu a ńolo i si me̱nde̱ pe̱ be̱ tomtom. Mo̱nge̱le̱ ma ndutu na nje ye̱se̱ nika e mawanano̱ ba me̱nde̱ sumwabe̱ o bwindea, ebanja Loba la Ngum a kakane̱ ná: “Ba si me̱nde̱ pe̱ jo̱nge̱le̱ mambo ma kwaṅ to̱ dutea mo̱ o mulema.”—Yesaya 65:17.

Dutea te̱: Muwekedi a boṅsane̱ o bola ná ‘o be̱ mbaki ońola mińa mi maye̱, o be̱ne̱ pe̱ dipita,’ nika ńe nde longe̱ le musango owas’a byanedi ba ke̱nge̱nge̱ ba Loba. (Yeremia 29:11) Mo̱ bia la ni mbale̱ le ná di bola ná we̱ne̱ ná ye njo̱m ná o be̱ longe̱ e? Sally, di kwaledino̱ o dongo laboso, mo̱ ná: “Jo̱nge̱le̱ la mambo ma bwam me̱se̱ Janea la Loba di malano̱ bola ońol’asu, le ná longwane̱ wa o dimbea mambo ma bobe mena ma tombi, na we̱lisane̱ bete̱medi bo̱ngo̱ ba tatan.”

We ná o bata jokwa jombwea nje Janea la Loba di me̱nde̱no̱ bola son a ponda ońola mbel’a moto. O boli te̱ nika, we ná o be̱ mbaki ná to̱ná mbeu a ńolo e kweledino̱ wa, ye njo̱m ná o be̱ longe̱ kana weno̱ jenge̱le̱ kie̱le̱ ni maye̱, wuma mbeu a ńolo i si me̱nde̱no̱ pe̱ be̱. Nde nin we̱nge̱, Bibe̱l e mabola malea mena me ná mongwane̱ wa o lembe̱ mitakisan mi wu na mbeu a ńolo. Jombweye byembilan bō̱.

Bepasi ba Bibe̱l be mabole̱ malea ma bwam

Ko̱ iyo̱ ńai ni dongame̱n.

“Dia diwo̱ di londi na wumse̱ di do̱li, buka mā maba ma londi na ntu na bupe̱ la ngo̱.”—Mulangwedi 4:6.

Bato ba muwaso ba makwala ná ponda bato ba makusano̱ mitakisan minde̱ne̱, ba mabata senga bobe, ba be̱ne̱ pe̱ mo̱nge̱le̱ ma pungwedi yete̱na ba si kwedi iyo̱ ndongo. Ye so̱ dibie̱ ná o ko̱ iyo̱ ńai ni dongame̱n.

To̱pea ońola besengedi bo̱ngo̱.

“Ndutu ńe moto o mulema e mańo̱so̱ mo̱, nde eyal’a muyao e makenjisane̱.”—Minia 12:25.

To̱po̱ na elong’a mbia to̱ na diko̱m o lakisanno̱. O sumo te̱ lambe̱ye̱ la wa toi, mbia na mako̱m be ná bembe̱ wa na byala, ba wanea pe̱ wa jongwane̱ o be̱nno̱ ńo̱ngi. *

O̱nge̱le̱ ponda mambo ma me̱nde̱no̱ be̱ bwam.

“Nde kaponda dikaki [la Loba] biso̱ di menge̱le̱ mo̱ń a peńa na was’a peńa, bena oten nde te̱me̱ la sim di majano̱.”—2 Petro 3:13.

^ par. 18 Moto a be̱n te̱ mulema ma ndutu pond’a bwaba to̱ mutaka munde̱ne̱, ye bwam ná e̱ne̱ do̱kita.

NJONGO A BETATEDI