MO̱, O másenga bobe o dikala lena o si mapulano̱ pe̱ be̱ longe̱ e? Ke̱ we so̱ ná o so̱ṅtane̱ nje Adriana a tano̱ a senga. A ta a be̱ne̱ diboa la mo̱nge̱le̱; mulema mu ta so̱ mo̱ ndutu ponda ye̱se̱, a si be̱ne̱ pe̱ ńo̱ng’a to̱ lambo.

Jombweye pe̱ eyembilan a mot’a Yapan mō̱ nu belabe̱ ná Kaoru, ńena nu ta nu bongwa bayedi bao bena ba ta ba mádune̱, ba boa pe̱. A tele̱ye̱ ná: “O ni ponda, mitakisan ma wum’am y’ebolo mi ta mi buka mba. Na ponda, na si ta pe̱ na be̱ne̱ ńo̱ng’a da, na si ta pe̱ to̱ na we̱le̱ ko̱ iyo̱ bwam. Na botedi so̱ o jo̱nge̱le̱ ná mitakisan mam mi me̱nde̱ bo̱ yete̱na na wedi.”

Mot’a Nijeria mō̱ nu belabe̱ ná Ojebode a kwali ná: “Na ta na bwa ndutu ponda ye̱se̱, ńai ńena na tano̱ nde na pula jeya; na kumo so̱ o wasa ne̱ni neno̱ ná na bwa ńolo.” Nje ye bwam ye nde ná, Ojebode, Kaoru, na Adriana ba si bo ńolo. Nde, be̱be̱ na 800 000 la bato be mabwa ńolo mbu te̱.

Dongo dinde̱ne̱ la bato ba mabwe̱ ńolo le nde bome; jita labu di bo iso̱n o baise̱ jongwane̱. Yesu a kwali ná baboedi bangame̱n wala o do̱kita. (Lukas 5:31) O masenga so̱ te̱ bobe o dikala lena o mapulano̱ bwa ńolo, son o si bwa iso̱n o baise̱ jongwane̱. Jita la bato ba be̱n diboa la mo̱nge̱le̱ ba so̱i ná jongwane̱ la do̱kita le ná di bola ná ba senge bwam, ba we̱lisane̱ pe̱ diboa labu. Ojebode, Kaoru, na Adriana ba kusi jongwane̱ la do̱kita, tatan ba malembe̱ diboa labu bwam buka ponda ni tombi.

Mado̱kita me ná ma bolane̱ myanga to̱ jakwalisane̱ di majesane̱ bwam to̱ mo̱me̱ne̱ bebane̱, o bolea diboa la mo̱nge̱le̱. Bato bena ba be̱n diboa la mo̱nge̱le̱ ba be̱n ńo̱ngi ná mbia na mako̱m mabu ba so̱ṅtane̱ babo̱, ba be̱ we̱lisane̱, ba bongwe na sue̱le̱ pe̱ babo̱. Diko̱m di buki me̱se̱ moto te̱ eno̱ ná a be̱ne̱ le nde Yehova Loba, nu mawane̱ jongwane̱ dinde̱ne̱ tongwea n’Eyal’ao Bibe̱l.

Ponda iwo̱ e mapula ná bato ba be̱n diboa la mo̱nge̱le̱ ba no̱nge myanga pond’a bwaba, to̱ ná ba tukwe bede̱mo babu ba longe̱. Nde yete̱na o be̱n diboa la mo̱nge̱le̱, we ná o pite̱ kie̱le̱ ni maye̱ ńe bonam, kapo̱ ka Ojebode. A kwali ná: “Na menge̱le̱ belondisedi ba Yesaya 33:24, ni bīse̱ ponda to̱ moto o wase a si me̱nde̱no̱ pe̱ kwala ná ‘Na si jai bwam.’” Kapo̱ ka Ojebode, kusa lo̱ko̱mea o dikaki la Loba la “was’a peńa,” wuma “sese” e si me̱nde̱no̱ pe̱ be̱. (Bebīsedi 21:1, 4) Din dikaki di mapula kwala ná maboa ma mo̱nge̱le̱ ma si me̱nde̱ pe̱ be̱. Besengedi bo̱ngo̱ ba ndutu be me̱nde̱ bo̱ ná bambam. To̱ buńa pe̱ o si me̱nde̱ “jo̱nge̱le̱ [ses’ango̱] to̱ dutea mo̱ o mulema.”​—Yesaya 65:17.