MULOPO MA JOKWA 5
MWENGE 108 Ndol’a jemea ńa Loba
Minam di be̱nno̱ ońolana Yehova a to̱ndi biso̱
“Kristo Yesu a po̱i o wase o sunga babobe.”—1 TIM. 1:15.
O DIN JOKWA
Di me̱nde̱ je̱ne̱ ne̱ni diko̱ti di mawaneano̱ biso̱ tombwane̱ na ne̱ni jeno̱ ná di timbise̱le̱ Yehova masoma.
1. Nje jeno̱ ná di bola ná di bwese̱ Yehova muńe̱nge̱ e?
DUTEA te̱ ná o boli moto jabea la tobotobo lena di do̱li le pe̱ mweńa jita. E se̱ ndutu o me̱nde̱no̱ bwa yete̱na nu moto a pimbi nde mo̱ o ko̱bat’ao, a s’o̱nge̱le̱ pe̱ mo̱ to̱ buńa! O mune̱ mudi, o me̱nde̱ be̱ muńe̱nge̱ ke̱ nu moto a bolane̱ di jabea o mbad’a bwam nde a timbise̱le̱ pe̱ masoma ońol’ao. Belēdi be nde ná nje e? Yehova a boli Mun’ao ońol’asu. E se̱ muńe̱nge̱ Yehova a me̱nde̱no̱ be̱, ke̱ di timbise̱le̱ masoma ońola di jabea la tiki na ońola ndol’ao ni tute̱le̱ mo̱ o bola diko̱ti!—Yohane 3:16; Rom. 5:7, 8.
2. Nje di me̱nde̱no̱ je̱ne̱ o din jokwa e?
2 Na ponda je̱ ná di botea je̱ne̱ diko̱ti ka jabea di be̱nno̱ bwam o kusa. E be̱ nde biana di pimbi nde di jabea la Loba o ko̱bati. Je muńe̱nge̱ o be̱ne̱ di jabea, nde e yo̱ki be̱ biana di we̱le̱ nde mo̱ o wuma di si me̱ne̱no̱ mo̱ to̱ di si mo̱nge̱le̱no̱ pe̱ mo̱. Ná nik’e si po̱ye̱ biso̱, ponda na ponda te̱ jangame̱n timbise̱le̱ masoma ońola nje Loba na Kristo ba bolino̱ ońol’asu. Din jokwa le ná longwane̱ biso̱ o bola nika. Di me̱nde̱ kwalea ne̱ni di matombwane̱no̱ ońola diko̱ti we̱nge̱ na ne̱ni jeno̱ ná di tombwane̱ mo̱ o kie̱le̱ ni maye̱. Di me̱nde̱ pe̱ je̱ne̱ ne̱ni jeno̱ ná di timbise̱le̱ masoma ońola ndol’a Yehova, tobotobo o pond’a Jo̱nge̱le̱ la kwed’a Yesu.
NE̱NI DI MATOMBWANE̱NO̱ TATAN
3. O njika mbadi di matombwane̱no̱ jabea la diko̱ti tatan e?
3 Di nitombwane̱ jabea la diko̱ti la Kristo. K’eyembilan, kana Yesu a wedino̱ ońol’asu, Yehova a malakise̱ mawuse̱ masu. A titi eto̱m o lakise̱ biso̱. Nde a mapula bola nika. Mulo̱nge̱ myenge̱ a lo̱ngi ná: “Ebanja wa, a Sango, we bwam o le̱le̱m o lakise̱.”—Mye. 86:5; 103:3, 10-13.
4. Ońola nja Yehova a bolino̱ diko̱ti e? (Lukas 5:32; 1 Timoteo 1:15)
4 Bato bō̱ ba mo̱nge̱le̱ ná ba si dongame̱n o kusa lakise̱ la Yehova. Na mbale̱, to̱ mō̱ ńasu a si dongame̱n. Ńamuloloma Paulo a ta a so̱ṅtane̱ ná a “si dongame̱n belabe̱ ńamuloloma.” A bati pe̱ ná: “Ońola nded’a Loba nde neno̱ nje neno̱.” (1 Kor. 15:9, 10) Jate̱le̱ te̱, Yehova a malakise̱ biso̱. Ońola nje e? Seto̱ ońolana di dongame̱n, nde ońolana a to̱ndi biso̱. Yete̱na o mabwa ndutu ná o si dongame̱n ná o lakisabe̱, o̱nge̱le̱ ná Yehova a boli nde diko̱ti, seto̱ ońola bato ba te̱m na sim, nde ońola babole̱ bobe bena ba mate̱le̱.—Langa Lukas 5:32; 1 Timoteo 1:15.
5. Mo̱ e te̱nge̱n ná mō̱ ńasu o̱nge̱le̱ ná a dongame̱n o kusane̱ Yehova ndedi e? Bola beteledi.
5 To̱ mō̱ ńasu a s’angame̱n jo̱nge̱le̱ ná a dongame̱n kusa nded’a Yehova to̱ e be̱ nde ná ye mimbu jita a maboleano̱ mo̱. Mbale̱ ńe nde ná, Yehova a mabwane̱ jemea lasu muńe̱nge̱. (Bon. 6:10) A boli nde Mun’ao ka jabea seto̱ ka musawedi ońol’ebol’asu. Yete̱na di kwali ná di be̱n bwam o kusa ni ndedi to̱ ná di dongame̱n ná Yehova ombweye biso̱ o mbad’a tobotobo, e me̱nde̱ nde be̱ biana je nde kwala ná Yesu a wedi nde tete.—Ombwa Galatia 2:21.
6. Ońola nje Paulo a bolino̱ ebolo na ngińa o ebol’a Yehova e?
6 Paulo a ta a bia ná a si wusa bola to̱ lambo lena di wusa leneye̱ mo̱ nded’a Loba. Ońola nje so̱, a bolino̱ ebol’a Yehova na ngińa ńe̱se̱ e? Seto̱ o lee̱ ná a dongame̱n o kusa ndedi, nde o timbise̱le̱ Yehova masoma ońola nded’ao a si boledino̱. (Efe. 3:7) Kapo̱ ka Paulo, di mabenga bolea Yehova na ko̱di, seto̱ ońolana di mo̱nge̱le̱ ná nik’e me̱nde̱ bola ná di be̱ne̱ bwam o kusa nded’ao, nde ońolana di matimbise̱le̱ mo̱ masoma ońola ni ndedi.
7. O njika mbadi nipe̱pe̱ di matombwane̱no̱ diko̱ti tatan e? (Roma 5:1; Yakobo 2:23)
7 Mbadi nipe̱pe̱ di matombwane̱no̱ jabea la diko̱ti tatan ńe nde ná je ná di be̱ne̱ mulatako ma batabata na Yehova. a Ka nje te̱ jokwa di se̱le̱ di lee̱no̱, ponda di yabe̱no̱, di si ta di be̱ne̱ mulatako na Loba. Nde ońolana diko̱ti di bolabe̱, je ná di be̱ “musango na Loba,” je so̱ ná di sisea be̱be̱ na mo̱.—Langa Roma 5:1; Yakobo 2:23.
8. Ońola nje jangame̱nno̱ timbise̱le̱ Yehova masoma ońola edube di be̱nno̱ o kane̱ e?
8 Jombweye tongo diwo̱ la mulatako masu na Yehova, nika ńe nde edube di be̱nno̱ o kane̱ mo̱. Yehova a masenga mika ma baboledi bao ponda ba mako̱to̱me̱no̱ mwemba nde a masenga pe̱ mi ma mō̱ ńasu te̱. Muka mu malo̱ko̱ biso̱ mu bola pe̱ biso̱ musango ma teten, nde seto̱ di tombwane̱ buka te̱ nde muka mu mawaneano̱ biso̱. Mwe ná mouse̱ mulatako masu na Loba. (Mye. 65:3; Yak. 4:8; 1 Yohane 5:14) Niponda a tano̱ o wase, Yesu a ta a kane̱ ponda ye̱se̱ ońolana a ta a bia ná Yehova a masenga na ná muka mu me̱nde̱ jouse̱ mulatako mao na Sango ao. (Lukas 5:16) Di matimbise̱le̱ masoma ná o eyot’a jabea la Yesu, je ná di be̱ mako̱m ma Yehova nde di kwalisane̱ pe̱ Mo̱ o muka!
NENI JENO̱ NÁ DI TOMBWANE̱ O KIE̱LE̱ NI MAYE̱
9. Ne̱ni diko̱ti di me̱nde̱no̱ wanea baboledi ba Yehova ba jemea tombwane̱ o kie̱le̱ ni maye̱ e?
9 Ne̱ni baboledi ba Yehova ba jemea ba me̱nde̱no̱ tombwane̱ jabea la diko̱ti o kie̱le̱ ni maye̱ e? Yehova a me̱nde̱ bola babo̱ longe̱ la bwindea. Bato jita ba mo̱nge̱le̱ ná nik’e titi ná e we̱le̱ be̱ ońolana ye lokoli la mimbu bato ba benama ba mawo̱no̱. Nde mwano ma Yehova ma bebaedi ońola mbel’a moto mu ta nde ná bato ba be̱ longe̱ o bwindea. Adam a si bole te̱ bobe, ke̱ to̱ moto a si madutea ná longe̱ la bwindea le nde lambo la betańsedi. To̱ná longe̱ la bwindea leno̱ ná le̱ne̱ne̱ ponda iwo̱ ka lambo la betańsedi, nika pe̱ nde mususedi mwena Yehova a sawono̱ ná di we̱le̱ be̱ne̱ di dipita—jabea la Mun’ao ńa ndolo, pe̱ le nde lambo la betańsedi.—Rom. 8:32.
10. Nje bokisabe̱ na mido̱ngi mipe̱pe̱ ba menge̱le̱no̱ e?
10 To̱ ná longe̱ la bwindea leno̱ nde ońola kie̱le̱ ni maye̱, Yehova a mapula ná di duteye ońol’ao botea tatan. Bo̱kisabe̱ ba me̱nge̱le̱ longe̱ o mo̱ń niponda ba me̱nde̱no̱ die̱le̱ mwemba na Kristo. (Bbī. 20:6) Mido̱ngi mipe̱pe̱ mi menge̱le̱ longe̱ o paradisi o wase wuma take na ndutu ba si me̱nde̱no̱ pe̱ be̱. (Bbī. 21:3, 4) Mo̱ we nde mō̱ ńa mido̱ngi mipe̱pe̱ nu be̱n dipita la longe̱ la bwindea o wase e? Bo bowe̱n bo titi bosadi kobisan na longe̱ o mo̱ń! Yehova a weki nde bato ba benama o be̱ longe̱ o wase. Longe̱ o wase di me̱nde̱ bola ná di be̱ bonam na mbale̱.
11-12. Njika minam mō̱ di me̱nde̱no̱ be̱ne̱ o Paradisi jeno̱ musunga o je̱ne̱ e? (Ombwa pe̱ maduta.)
11 Dutea te̱ ne̱ni longe̱ lo̱ngo̱ di me̱nde̱no̱ be̱ o Paradisi o wase. O si me̱nde̱ pe̱ taka ońola maboa to̱ kwedi. (Yes. 25:8; 33:24) Yehova a me̱nde̱ lo̱nde̱ ńo̱ng’ango̱ te̱ ni te̱nge̱n. Njika mambo o me̱nde̱no̱ to̱ndo̱ o jokwa bola e? Mo̱ o me̱nde̱ to̱ndo̱ jokwa mambo jombwea ńama e? Nga o me̱nde̱ nde to̱ndo̱ o jokwa joba elongisan a musiki e? To̱ o jokwa o duta e? Ye̱ke̱i te̱ ńo̱ng’a bapo̱nge̱ maduta ma milongi, balonge̱ milongi, na base̱ myonda e me̱nde̱ be̱. Na mbale̱, e me̱nde̱ pe̱ pula bato ba bi bole̱ bebolo ka jipe̱, lule̱ belongisan b’ebolo na sabangane̱ myonda ma mbonji. (Yes. 35:1; 65:21) We te̱ longe̱ o bwindea, o me̱nde̱ be̱ne̱ ponda o bola ma mambo me̱se̱ na buka nika.
12 E se̱ muńe̱nge̱ o me̱nde̱no̱ be̱ o kasa ba ba pumbo e! (Bebolo 24:15) Keka te̱ o dutea muńe̱nge̱ o me̱nde̱no̱ be̱ne̱ o bata jokwa mambo jombwea bewekedi ba Yehova. (Mye. 104:24; Yes. 11:9) Di buki me̱se̱, e se̱ muńe̱nge̱ o me̱nde̱no̱ be̱ o bolea Yehova esibe̱ ná mulema mu kaise̱ wa! Mo̱ we be̱be̱ o bo̱lo̱ne̱ mi minam me̱se̱ buka te̱ o “bwane̱ bobe muńe̱nge̱ ma son a ponda” e? (Bon. 11:25) Tomtom! Di be̱n so̱ njo̱m a bwam o jese̱le̱ mambo mō̱ o tombwane̱ mi minam me̱se̱. O̱nge̱le̱ ná, Paradisi o wase e si me̱nde̱ benga be̱ lambo lena di menge̱le̱no̱ nde. O sukan e me̱nde̱ nde be̱ wum’asu ya boja. Di me̱nde̱ nde kusa man me̱se̱ ońolana Yehova a to̱ndi biso̱ jita kańena a boli mpo̱m mao ma Muna o wo̱ ońol’asu!
Njika minam o menge̱le̱no̱ tobotobo o Paradisi e? (Ombwa mongo 11-12)
NJE BOLA O LEE̱ NÁ O MATIMBISE̱LE̱ MASOMA OŃOLA NDOL’A YEHOVA
13. Ne̱ni jeno̱ ná di timbise̱le̱ masoma ońola ndol’a Yehova e? (2 Korinto 6:1)
13 Nje jeno̱ ná di bola o timbise̱le̱ Yehova masoma ońolana a boli biso̱ diko̱ti e? Je ná di bola ná bolea la mo̱ nde di be̱ lambo laboso o longe̱ lasu. (Mat. 6:33) Yesu a wedi “nde ońola be̱se̱, ná ba bena be longe̱ ba si be̱ pe̱ longe̱ ońol’abu mo̱me̱ne̱, nde ońola nu nu wedi ońol’abu, nu pumbo pe̱.” (2 Kor. 5:15) Ye̱ke̱i te̱ di si mapula bo̱lo̱ne̱ nded’a Yehova di si boledino̱.—Langa 2 Korinto 6:1.
14. Ne̱ni jeno̱ ná di lee̱le̱ ná di dube̱ bediedi ba Yehova e?
14 Je ná di timbise̱le̱ masoma ońola ndol’a Yehova tongwea na dube̱ bediedi bao. Neni e? Di be̱n te̱ bedomsedi jangame̱nno̱ no̱ngo̱, k’eyembilan, nate̱na njika dime̱ne̱ jangame̱nno̱ walane̱ esukulu oboso to̱ njik’ebol’a musawedi jeno̱ ná di bola, jangame̱n jombwea nje Yehova a me̱nde̱no̱ pula ná di bole. (1 Kor. 10:31; 2 Kor. 5:7) Di no̱ngi te̱ bedomsedi be se̱medi o dube̱ di be̱nedino̱ Yehova, dube̱ lasu na mulatako masu na mo̱ ba mabata be̱ ngińa. Dipita lasu la be̱ longe̱ o bwindea di mabata be̱ mbaki ońol’asu.—Rom. 5:3-5; Yak. 2:21, 22.
15. Ne̱ni jeno̱ ná di lee̱le̱ masoma o pond’a Jo̱nge̱le̱ la kwed’a Yesu e?
15 Mbadi nipe̱pe̱ ńe jeno̱ ná di timbise̱le̱ Yehova masoma ońola ndol’ao. Bolane̱ wo̱ki i se̱le̱ na i mabupe̱ Jo̱nge̱le̱ la kwed’a Yesu o lee̱ Yehova nate̱na njika dikala di matimbise̱le̱no̱ mo̱ masoma ońola diko̱ti. O sumo te̱ ná di maboṅsane̱ o jukea o Jo̱nge̱le̱ la kwed’a Yesu, jangame̱n pe̱ bele̱ bape̱pe̱ ná bukeye. (1 Tim. 2:4) Teleye̱ ba o bele̱no̱ nje e me̱nde̱ tombe̱ o Jo̱nge̱le̱ la kwed’a Yesu. We ná o lee̱ babo̱ sinima ye o jw.org Ońola nje Yesu a wedino̱ e? na O̱nge̱le̱ kwed’a Yesu. Batudu bangame̱n bola me̱se̱ ná ba bele̱ batemam. E se̱ muńe̱nge̱ mu me̱nde̱ be̱ o mo̱ń na o wase yete̱na mido̱ngi ma Yehova mō̱ mena mi pimbedi mi timbi o dibemba lao! (Lukas 15:4-7) O pond’a Jo̱nge̱le̱ la kwed’a Yesu, di bole me̱se̱ o somane̱, nde tobotobo ba bena ba po̱i peńa, na ba bena ba s’ukedi pond’a bwaba. Di mapula ná ba so̱ṅtane̱ ná je muńe̱nge̱ o kasa babo̱!—Rom. 12:13.
16. Ońola nje jangame̱nno̱ bata no̱ngo̱ dongo o ebol’a dikalo o pond’a Jo̱nge̱le̱ la kwed’a Yesu e?
16 Mo̱ we ná o bata walame̱ne̱ o mambo ma mudī o pond’a Jo̱nge̱le̱ la kwed’a Yesu e? Bola la nika le nde mbad’a bwam ńa timbise̱le̱ masoma ońola nje ye̱se̱ Loba na Yesu ba boledino̱ biso̱. Etum te̱ di mabatano̱ bola mambo o ebol’a Yehova, nika pe̱ nde di me̱nde̱no̱ je̱ne̱ ne̱ni a masue̱le̱no̱ biso̱, na nika lakisane̱ di be̱nedino̱ mo̱ di me̱nde̱ be̱ ngińa. (1 Kor. 3:9) O mbata na nika, bola me̱se̱ ná o bupe̱ bolanga ba Bibe̱l ońola Jo̱nge̱le̱ la kwed’a Yesu bo maso̱be̱ o kalati nisadi Jombweye Betiledi buńa te̱ to̱ o kalat’a longe̱ la kriste̱n n’ebol’a dikalo. We ná o po̱so̱ ná o mabolane̱ be bepasi ba Bibe̱l o jokwa la wame̱ne̱.
17. Nje e mabwese̱ Yehova muńe̱nge̱ e? (Ombwa pe̱ edinge̱le̱ “ Mbad’a timbise̱le̱ masoma ońola ndol’a Yehova.”)
17 Ye mbale̱ ná bete̱medi bo̱ngo̱ be ná be si bole wa epolo o bola mambo me̱se̱ din jokwa di kwaledino̱. O si dimbea ná, Yehova a si mako̱bisane̱ nje o mabolano̱ na nje bane̱ ba mabolano̱; a me̱ne̱ nde nje ye wa o mulema. E muńe̱nge̱ ke̱ a me̱ne̱ ná o matimbise̱le̱ masoma na mulema mwe̱se̱ ońola jabea lao la tiki la diko̱ti.—1 Sam. 16:7; Marko 12:41-44.
18. Ońola nje di matimbise̱le̱no̱ Yehova Loba na Yesu Kristo masoma e?
18 Buka te̱ tongwea na diko̱ti nde di makusano̱ lakise̱ la myobe masu, jeno̱ ná di be̱ mako̱m ma Yehova, di be̱ne̱ pe̱ dipita la longe̱ la bwindea. Di benge timbise̱le̱ Yehova masoma ponda ye̱se̱ ońola ndol’ao, ńena ni tute̱le̱ mo̱ o bola ná di be̱ne̱ min minam me̱se̱ ma bwam. (1 Yohane 4:19) Di timbise̱le̱ pe̱ Yesu masoma, ńena nu to̱ndi biso̱ kańena a boli longe̱ lao ońol’asu!—Yohane 15:13.
MWENGE 154 Ndolo e si be̱n su
