Bonasango ba ta o Bete̱l ba boli ebolo buka mbu mō̱ o longa ndabo a elimb’a dikalo ńa WBBR o Staten Island, o Ńu Yo̱rk. Ba se̱le̱ nde pawa wuma denge̱ ba malonga bolongi bonde̱ne̱ ońola baboledi na ndabo nipe̱pe̱ ońola belongisan. Ponda ba bo̱le̱no̱ y’ebolo, bonasango ba botedi lata belongisan be mapule̱ ońola camane̱ la myango o elimb’a dikalo. Nde jita la mitakisan mipe̱pe̱ mi ta, ba tano̱ bangame̱n buka.

Bonasango ba so̱i ná tese̱ la mom ma ante̱n ńa ndabo a elimb’a dikalo di ta ndutu. Ni ante̱n ńa bwaba ba 91 ma meta e ta ńangame̱n sumbabe̱ nde e kakabe̱ oteten a bebongo beba be be̱n mute̱ ma 61 ma meta. Nged’a boso bonasango ba tese̱no̱ mo̱ mambo ma si dango bwam. Nde kana ba tano̱ ba lakisane̱ jongwane̱ la Yehova, ba timbi tongwe̱le̱. Calvin Prosser, nu ta o y’ebolo, mo̱ ná: “Di tongwe̱le̱ te̱ o tese̱ mo̱ nged’a boso, di wusa sesa biso̱me̱ne̱ di kwala ná, ‘Ombwa te̱ nje di bolino̱!’” Ba bonasango ba sesi nde Yehova ońolana ongwane̱ babo̱, nde mitakisan mabu mi si suwedi owa.

Ebol’a camane̱ la mye̱ndi na elimb’a dikalo e ta nde e wa botea, e si ta pe̱ to̱ bu o janda belongisan be mapule̱ ońola nika. Bonasango ba kusi so̱ nde elongisan e matombe̱le̱ bwambo ba mábolane̱no̱ yena e ta e be̱ne̱ 500 ba watt, yena moto mō̱ nu ta babo̱ o mbasan a tano̱ a lule̱. O mulopo ma janda ekase̱ doi, ba bolane̱ nde ye ya telefon a musinga. Bulu bō̱ bonasango ba domse̱ ná ba makekise̱ be belongisan be̱se̱ bena be si ta die̱. E ta e pula babo̱ mwe̱ndi ba macamane̱no̱, bonasango ba lo̱ngi so̱ nde myenge ma Janea. Mō̱ ńabu, Ernest Lowe a mo̱nge̱le̱ bo buńa na son a lo̱. Mo̱ ná ke̱ be o lo̱ngo̱, Mukaisedi  Rutherford, b ńena nu sengi elo̱ng’abu o elimb’ao ya dikalo o Brooklyn etum a lambo ka 25 ma kilometa, a bele̱ babo̱ o telefon.

Munasango Rutherford a langwedi babo̱ ná: “Bińo̱ embe̱ y’eto̱ise̱. Lo malo̱ngo̱ nde ka dibemba la singi!” Bonasango ba bo iso̱n ba pomane̱ kwese̱ elongisan e matombe̱le̱ bwambo, nde ba so̱ṅtane̱ ná elimb’abu ya dikalo e madangwa, ba ta pe̱ mbaki ná be ná ba botea camane̱ myango na elimb’a dikalo.

O 24 ma Ngo̱nde̱, 1924, o pond’a tele̱ la camane̱ la myango na elimb’a dikalo, munasango Rutherford a kwali ná y’elimb’a dikalo ye nde ońola “myam ma Janea la Mesia.” A teleye̱ ná janda la y’elimb’a dikalo le nde ná “yongwane̱ bato be̱se̱ o so̱ṅtane̱ Bibe̱l na mweńa ma ponda jeno̱ we̱nge̱.”

Di camane̱ la myango na elimb’a dikalo ka nged’a boso di tongwe̱le̱ jita. O 33 ma mbu mi bupe̱, ba bolane̱ WBBR jita o camane̱ mambo ma bebokedi na elimb’a dikalo.

O Madibe̱dibe̱ 1924, Bokwe̱ Bibe̱l ba ta ba be̱ne̱ jako̱to̱ne̱ dinde̱ne̱ o Kolumbus, o Ohio. Bokwe̱ Bibe̱l ba ta ba wa o wase ńe̱se̱, ba sengi pe̱ bekwali n’eyem’a Arabik, Inglisi, Fre̱nsi, Jaman, Grikia, Hungarian, Italia, Lithuania, Polish, Russia, leme̱ la Skandinavia, na Ukrainia. Bekwali bō̱ be ta be sengabe̱ o elimb’a dikalo, bonasango ba ta pe̱ ba baise̱ ńuspepa po̱ ni ta ni belabe̱ ná Ohio State Journal ná e tile bolangi ba buńa te̱ ba di jako̱to̱ne̱.

O buńa ba Ngisu 24 ma Madibe̱dibe̱, buka 5000 la bukedi ba no̱ngi dongo o dikalo o mundi owe̱ni jako̱to̱ne̱ di tano̱. Ba bake̱ lambo ka 30 000 ma kalati ba botea pe̱ lokoli la mokwa ma Bibe̱l. Njongo a Betatedi e bele̱ bo buńa ná “dongo la jako̱to̱ne̱ dinde̱ne̱ di bwesane̱ muńe̱nge̱ buka me̱se̱.”

Lambo dipe̱pe̱ la mweńa o di jako̱to̱ne̱ di ta nde ná Donesu 25 ma Madibe̱dibe̱, ke̱ munasango Rutherford e o tombise̱ ekwal’ao ewo̱, na ngiń’a mulema ńe̱se̱, a langi dipapa lena di ta di be̱ne̱ njo̱m ni numabe̱ badiedi b’ebasi. A kwali ná badiedi ba politik, ba bebasi na ba ńunga “ba meka bato o bia mbale̱ jombwea Janea la Loba lena Loba a me̱nde̱no̱ bolane̱ o namse̱ mbel’a moto.” A bati pe̱ ná ba bome ba “kasi Bebokedi ba  Bekombo, ba makwala pe̱ ná ‘tongwea na mo̱ nde Loba a madie̱le̱no̱ wase.’” E ta e pula Bokwe̱ Bibe̱l ngiń’a mulema o wala langwea bato mu mwe̱ndi.

Ke̱ e mabola ebongolo ya ne̱ni di jako̱to̱ne̱ dinde̱ne̱ di tapino̱ bato, Njongo a Betatedi po̱ e kwali ná: “Di jako̱to̱ne̱ dinde̱ne̱ la Kolumbus jouse̱ dube̱ la mu mulo̱ṅ ma Sango musadi . . . , di boli babo̱ ngiń’a mulema o buka to njika ngińa to̱ nke̱ti ma wea musingedi a wusano̱ wana te̱nge̱ne̱ babo̱.” Leo Claus, ńena ńukedi o di jako̱to̱ne̱ dinde̱ne̱, mo̱ ná: “Ombusa jako̱to̱ne̱ di ta musunga o wala bola bato ba mōnda masu ma dikalo dipapa la mu mwe̱ndi.”

O mo̱di ma Maye̱se̱, Bokwe̱ Bibe̱l ba botedi bola bato lodun la trakt Acte d’accusation contre le clergé, ni ta ni be̱ne̱ nje munasango Rutherford a to̱pino̱ o ekwal’ao. O mundi musadi ma Kleveland, o Oklahoma, Frank Johnson a bo̱le̱no̱ bola trakt, enge̱le̱ 20 ma minuti obiana bane̱ bate̱ dikalo ba mapo̱ dongame̱ne̱ mo̱. A si wusa te̱me̱ jenge̱le̱ o wuma ba me̱ne̱no̱ mo̱ ebanja bato ba mu mundi bena ba ta ba linga ońol’ebol’ao ya dikalo ba ta ba wasa mo̱ o bolane̱ mo̱ bobe. Munasango Johnson a wutame̱ so̱ nde oteten a ndabo a ebasi ni ta be̱be̱. To̱ moto a si ta oteten a ni ndabo, na mo̱ a we̱le̱ trakt oteten a Bibe̱l a mukipe̱ mitin na o be̱nji te̱. A pomane̱ busa o ni ndabo a ebasi ka nje te̱ ingedino̱. Kana a tano̱ a diane̱ son a ponda, alo so̱ o mandabo m’ebasi maba mape̱pe̱, a bola mulemlem.

Frank a timbi ná pe̱le̱pe̱le̱ owe̱ni bane̱ bonasango na bonańango ba tano̱ bangame̱n dongame̱ne̱ mo̱. A wutame̱ ombusa sap’a be̱le̱sin po̱ nde angwa pe̱ diso̱ o jombwa bato bena ba ta ba bupe̱ mo̱. Ba bato ba tombi na mutoa, nde ba s’e̱n mo̱. Ban masa ma wala, bane̱ bonasango na bonańango bena ba ta o dikalo be̱be̱ na owe̱ni Frank a tano̱, ba po̱i ba no̱ngo̱ mo̱ na babo̱ be̱se̱ bala.

Munasango mō̱ a dia a mo̱nge̱le̱ bo buńa, mo̱ ná: “Ke̱ je o jasumwe̱ o mu mundi, di tombi oboso ba ma mandabo m’ebasi malalo. Lambo ka 50 ma bato ba ta ba te̱me̱ oboso ba ndabo a ebasi te̱. Bō̱ ba ta ba langa ni trakt, bane̱ pe̱ ba lee̱ mo̱ mukipe̱ mitin ná ombwe. Mbale̱, jasumwe̱ nde o ponda ni te̱nge̱n o samba myambo! Di masoma pe̱ Yehova Loba lasu ońola betatedi bao na dibie̱ a bolino̱ biso̱ o langwa mu mwe̱ndi esibe̱ ko̱ o mā ma ba basingedi ba Janea.”

O bekombo bepe̱pe̱, Bokwe̱ Bibe̱l ba bolane̱ mulemlem a ngiń’a mulema o te̱ dikalo. O pongo a Fre̱nsi, Józef Krett a te̱ye̱ babole̱ ebolo o wum’a pula la madale bena ba wu o Poland dikalo. A ta a te̱se̱ ná a mabola ekwali e be̱n tema ná: “Bepumbwedi ba bawedi be be̱be̱.” Ponda bato ba mu mundi ba kusino̱ bebeledi, pat’a mu mundi ome̱le̱ nde bebon b’ebas’ao ná ba sukea. Jome̱le̱ lao di wan nde lambo le diwengisan. Buka 5000 la bato lukedi o y’ekwali, na ni pata mo̱me̱ne̱! Munasango Krett a bele̱ ni pata ná e ye kwalea mambo a dube̱no̱, nde nun a bangi. Ombus’ekwal’ao, Munasango Krett a boli bato kalati ye̱se̱ a tano̱ a be̱ne̱ ebanja e̱n ná be̱se̱ bena bukedi ba ta ba be̱ne̱ ńo̱ng’a Eyal’a Loba.—Amos 8:11.

O Afrika, Claude Brown a lango myango ma bwam o Gold Coast, ekombo ba mabele̱no̱ we̱nge̱ ná Ghana. Bekwali a tombise̱no̱ na kalati a bolino̱ bato bongwane̱ o pomane̱ camane̱ mbale̱ o y’ekombo. John Blankson, ńena nu ta o esukul’a pharmacie, a ta ukea o ekwal’a Munasango Brown ewo̱. A pomane̱ so̱ṅtane̱ ná a so̱i mbale̱. John a kwali ná: “Mbale̱ e boli mba na  londa na muńe̱nge̱, na kwaledi pe̱ ońol’ao na bato jita o esukul’asu.”

Buńa bō̱, John alo o je̱ne̱ pat’a ebas’a Anglikan po̱ a baise̱ mo̱ ná e teleye̱ te̱ mo̱ belēdi ba maloba malalo ma lati diwo̱, belēdi bena John a tano̱ a máso̱ṅtane̱ bwam ná be si se̱medi o Bibe̱l. Ni pata e pangi nde mo̱ na bekima, e kwala ná: “O titi kriste̱n; we nde ńa Diabolo. Busa!”

John a timbino̱ o mboa, a tiledi ni pata, a baise̱ mo̱ ná ba dongame̱ne̱ o wum’a ntelele o kwalea ońola belēdi ba maloba malalo ma lati diwo̱. Jalabe̱ la ni pata di ta nde so̱mo̱n ni malome̱ John omboa mudie̱le̱ esukul’a pharmacie, a po̱ino̱ owo mudie̱le̱ esukulu ue̱le̱ nde mo̱ nga a tiledi ni pata na mbale̱.

Na John alabe̱ ná: “E, sango.”

Mudied’esukulu a langwedi John ná a tileye ni pata a baise̱ mo̱ milakisan. John a tili so̱ ná:

“A sango, mulēd’am a kwalane̱ mba ná na baise̱ wa milakisan, ne be̱be̱ o baise̱ milakisan yete̱na wembi ná o malee̱ nde bato belēdi be kwedi.”

Mulēdi a ta a tańa na mo̱ a baise̱ ná, “A Blankson, nika nde o mapulano̱ tila e?”

“E, sango. Ni mbale̱ nde na mapulano̱ tila.”

“O me̱nde̱ pangabe̱. Ne̱ni weno̱ ná o to̱po̱ te̱nge̱ne̱ pata ńa ebasi yena go̱bina e masue̱le̱no̱ na jo̱nge̱le̱ ná o mabenga be̱ o esukul’a go̱bina e?”

“Nde, a sango, . . . ponda o mabolano̱ biso̱ belēdi nde di be̱ne̱ mato̱ti mō̱ di si so̱ṅtane̱no̱, di si mabaise̱ wa myuedi e?”

“E, le ná lo bola nika.”

“A sango, nika pe̱ nde e tombino̱. Nu sango a ta nde a lee̱ biso̱ Bibe̱l nde na baise̱no̱ mo̱ myuedi. Yete̱na a titi ná alabe̱ mi myuedi, ońola nje nangame̱nno̱ baise̱ mo̱ milakisan e?”

Blankson a si pangabe̱, a si tili pe̱ to̱ milakisan to̱ mō̱.

Ke̱ Njongo a Betatedi e mabola ebongol’a ebol’a mu mbu, e kwali ná: “Je ná di kwala ka David ná: “O ta o wenga mba o be̱ ngińa ná nane bwemba.” (Myenge 18:40) Mu mbu mu ta nde mbu mu membe̱, ebanja je̱n ne̱ni Sango ongwane̱no̱ biso̱. . . Baboledi bao ba mbale̱ ba te̱ dikalo na muńe̱nge̱ mwe̱se̱.”

La su la mu mbu, bonasango ba ta ba te̱se̱ ná ba malonga ndabo a elimb’a dikalo nipe̱pe̱. Ni ndabo a elimb’a dikalo e longabe̱ nde be̱be̱ na Chicago o Amerika. Ba boli ni ndabo dina di te̱nge̱n ná EYALA. Na elongisan a tombe̱le̱ bwambo e be̱n ngiń’a 5000 la watt, EYALA e wusa tombe̱le̱ mwe̱ndi ma Janea etum nate̱na o pongo a Kanada.

O mbu 1925 Loba a lom mwe̱ne̱n mongwane̱ Bokwe̱ Bibe̱l o be̱ne̱ so̱ṅtane̱ la peńa la Bebīsedi 12 la bepasi. Nik’e ta nde dale lena di so̱njise̱ bō̱. Nde jita la bape̱pe̱ di ta muńe̱nge̱ o so̱ṅtane̱ mambo ma si me̱ne̱ne̱ mena ma bolane̱ o mo̱ń, na ne̱ni nik’e tapino̱ baboledi ba Loba be o wase.