Mo̱ ye wa ndutu ponda iwo̱ o jo̱nge̱le̱ nje weno̱ wa jokwa e? Nik’e mapo̱ye̱ biso̱ be̱se̱ ponda na ponda te̱. Nje jeno̱ ná di bola e? Po̱ngo̱ ndimbisedi ńa mato̱ti ma mweńa.

Niponda weno̱ jokwa, te̱me̱ ponda na ponda te̱ o maka mato̱ti ma mweńa. Nika nde Paulo ongwane̱no̱ bonasango na bonańango ao o bola ke̱ ba mombwea leta lao. A tili ná: “Mom ma lambo ma nje e kwalabe̱ mwe nde na.” (Bon. 8:1) Na be byala, ongwane̱ basengedi bao o so̱ṅtane̱ nje a tano̱ a pula kwala, na je̱ne̱ mulatako mwe o mato̱ti me̱se̱ a kwalino̱.

We ná o te̱se̱ ponda yen ebe dom la minuti o su la jokwa lo̱ngo̱, o dutea o mato̱ti ma mweńa wokono̱. O titi te̱ ná wo̱nge̱le̱ mo̱, ombwa milopo misadi to̱ mulo̱ṅ ma byala maboso ma dongo te̱ ná nika ńongwane̱ wa o jo̱nge̱le̱ ma mato̱ti. Woko te̱ lambo la peńa, keka timbise̱le̱ mo̱ na byala bo̱ngo̱ ba wame̱ne̱. O po̱ngi te̱ ndimbisedi ńa mambo ma mweńa, nik’e mongwane̱ wa ná wo̱nge̱le̱ mo̱ na bo̱bise̱ la ńolo, o me̱nde̱ pe̱ bata so̱ṅtane̱ ne̱ni weno̱ ná o we̱le̱ nje wokono̱ o ebolo o longe̱ lo̱ngo̱.