MUSIKI mu ta nde dongo la mweńa la bose̱di ba Israel ńa kwaṅ. Bibe̱l e makwalea ońola bato bena ba ta boka belongisan ba musiki na ba bena ba ta ba lo̱ngo̱. Dongo diwo̱ la Betiledi le nde myenge, k’eyembilan, o be̱n kalat’a Myenge, Mwenge ma bonamyenge, na Madoi ma mbembe. Ońola nika nde, kalati Music in Biblical Life e makwalano̱ ná Bibe̱l e “malee̱ edinge̱dinge̱ ya longe̱ la Bonaisrael owe̱ni musiki mu tano̱ dongo diwo̱ la bebolo ba buńa te̱.”

Musiki o longe̱ la buńa te̱. Bonaisrael ba ta boka musiki o bwam ba lee̱ besengedi babu. (Yes. 30:29) Bito ba ta boka ngo̱mo̱, ba lo̱ngo̱ na muńe̱nge̱, ba sa pe̱ ngando o ponda te̱se̱be̱ la kiṅe̱, o ponda mangando mape̱pe̱ na o ponda muso̱mbise̱ ma bebukedi ba bila. (Bak. 11:34; 1 Sam. 18:6, 7; 1 Ki. 1:39, 40) Bonaisrael ba ta pe̱ ba lo̱ngo̱ myenge o pond’a kwedi. (2 Mya. 35:25) Bupisane̱ kalati McClintock and Strong’s Cyclopedia, penda to̱ po̱ e titi ná, “Bato ba Bonahebe̱r ba ta nde bato̱nde̱ musiki bande̱ne̱.”

Musiki o ndabo a kiṅe̱. Kiṅ’a israel i ta i to̱ndo̱ musiki. Kiṅe̱ Saul a bele̱ David o ndabo a kiṅe̱ ná obeye̱ mo̱ musiki. (1 Sam. 16:18, 23) Ombusa ponda, ponda David mo̱me̱ne̱ a timbino̱ kiṅe̱, a lule̱ belongisan ba musiki, a tili myenge ma bwam, nde a bokise̱ pe̱ balo̱ngedi ońola tempe̱l a Yehova. (2 Mya. 7:6; Amos 6:5) Kiṅe̱ Salomo a ta a be̱ne̱ balo̱ngedi ba bome na ba bito o ndabo ao ńa kiṅe̱.—Mul. 2:8.

Musiki o jowe̱. Di buki me̱se̱, Bonaisrael ba bolane̱ musiki o jowe̱ Yehova. O ta o be̱ne̱ 4000 la balo̱ngedi ba ta boka musiki o tempe̱l o Yerusalem. (1 Mya. 23:5) Ba ta boka mbaka, ndinga, mindende, na mawe̱u. (2 Mya. 5:12) Nde seto̱ ban balo̱ngedi buka te̱ nde ba ta bowe̱ Yehova na musiki. E me̱ne̱ne̱ ná jita la Bonaisrael ba ta ba lo̱ngo̱ mwenge mu belabe̱ ná mwenge ma malo̱ndo̱ niponda ba tano̱ bala jowe̱ o Yerusalem. (Mye. 120-134) Mbata na nika, bupisane̱ kalati iwo̱, Bonaisrael ba ta ba lo̱ngo̱ myenge mi belabe̱ ná Hallel ma kalat’a Myenge a o pond’a da la Pasa.

Musiki mu dia mweńa jita ońola baboledi ba Loba o nin we̱nge̱. (Yak. 5:13) Di malo̱ngo̱ myenge̱ o sesa Yehova. (Efe. 5:19) Musiki mu malata biso̱ na bane̱ bonasango na bonańango. (Kol. 3:16) Mu malo̱ko̱ pe̱ biso̱ o pond’a ndutu. (Bebolo 16:25) Musiki mwe nde mbad’a bwam ńa lee̱ dube̱ na ndolo di be̱ne̱dino̱ Yehova.