MO̱ o maki ná bato jita we̱nge̱ ba mo̱nge̱le̱ ná babo̱ nde ba be̱n bwam na beto̱ti to̱ bepolo ba tobotobo e? To̱ lambo di si dongame̱n babo̱, ba mo̱nge̱le̱ nde ponda ye̱se̱ ná bangame̱n be̱ne̱ buka nika. Babe̱ne̱ i ńai a mo̱nge̱le̱ be nde bato ba mukubo na ba si bi lee̱le̱ masoma ońola mambo ba be̱nno̱. Bibe̱l e makwala ná nika nde bato ba me̱nde̱no̱ be̱ o mińa misukan.—2 Tim. 3:2.

Mbale̱ ńe nde ná seto̱ we̱nge̱ nde bato ba botedino̱ be̱ mukubo. K’eyembilan, Adam na Eva ba no̱ngi bedomsedi ba po̱so̱ na babo̱me̱ne̱ nje ye mbam to̱ bobe. Nde biso̱ be̱se̱ di mataka o njo̱m a nika we̱nge̱. Bebwea ba mbu ombusa ponda, Usia, Kiṅ’a Yuda pe̱ ta o̱nge̱le̱ ná a dongame̱n o dise̱ benumba o tempe̱l, nde nik’e si ta lambo a tano̱ a be̱ne̱ bwam o bola, nik’e ta nde diwuse̱ dinde̱ne̱. (2 Mya. 26:18, 19) Mulemlem pe̱, Farisai na Sadukai ba ta bo̱nge̱le̱ ná babo̱ nde Loba angame̱nno̱ jombwea tobotobo ońolana be nde mbot’a Abraham.—Mat. 3:9.

Di dingabe̱le̱ na bato be mukubo, bedangwedi babu be pe̱ ná be be̱ne̱ ngińa omo̱ń asu. (Gal. 5:26) Je ná di botea jo̱nge̱le̱ ná di be̱n bwam o kusa mambo to̱ beto̱ti bō̱ to̱ ná bangame̱m jombwea biso̱ tobotobo. Nde nje bola ná di si be̱ne̱ i ńai a mo̱nge̱le̱ e? Di se̱le̱ wasa so̱ṅtane̱ nje Yehova a mo̱nge̱le̱ jombwea di to̱ti. Bete̱sedi ba Bibe̱l beba be me̱nde̱ jongwane̱ biso̱.

 Yehova nde a mate̱se̱ nje di be̱nno̱ bwam o kusa. Jombweye byembilan bō̱, ba nje a te̱se̱no̱ ná di be̱n bwam o kusa:

• O ndabo a mbia, Yehova a te̱se̱ ná mome a be̱n bwam o jengane̱ muj’ao edube muto pe̱ a be̱n bwam o to̱ndo̱be̱ na mom’ao (Efe. 5:33) Mome, to̱ muto nu babe̱ a be̱n bwam o kusane̱ mwenj’ao ńa diba eto̱nd’a tobotobo a si malee̱no̱ to̱ moto nupe̱pe̱. (1 Kor. 7:3) Bayedi ba be̱n bwam o jengane̱ bana babu sengane̱. Bana pe̱ ba be̱n bwam ná ba kusane̱ bayedi babu dibongo la bwam na ndolo.—2 Kor. 12:14; Efe. 6:2.

• O mwemba, batudu ba be̱n bwam ná ba bolabe̱ edube ońol’ebol’a ntu ba mabolano̱. (1 Tes. 5:12) Nde, ba si be̱n bwam o janea bonasango na bonańango abu.—1 Pet. 5: 2, 3.

• Loba a boli manea ma wase doi o kusane̱ bato tax n’edube.—Rom. 13:1, 6, 7.

Yehova a mabola biso̱ buka nje di be̱nno̱ bwam o kusa na ndolo ńe̱se̱. Kana di sangono̱ bobe ba Adam, di ta nde di be̱ne̱ bwam na kwedi. (Rom. 6:23) Nde, ońola ndolo ninde̱ne̱ a be̱nedino̱ biso̱, Yehovah a mabola biso̱ minam njoasoa. (Mye. 103:10, 11) Di makusane̱ nde mo̱ minam seto̱ ońolana di be̱n bwam na mo̱, nde ońola nded’ao di si boledino̱.—Rom. 12:6-8; Efe. 2:8.

No̱ngo̱ jangame̱ye̱ na mbad’a je̱ne̱ la mambo ńa wase We ná o botea jo̱nge̱le̱ ná o be̱n bwam o kusa mambo mō̱ buka bane̱ Yesu a lee̱ ne̱ni yeno̱ ná e be̱ lambo di bo̱bi o bola nika ponda a bolane̱no̱ eyembilan a baboledi bena ba kusi musawedino̱ ma denario Po̱. Baboledi bō̱ ba boli ebolo buńa bwese idiba nate̱na ebiamu owas’a wei. Bape̱pe̱ ba boli nde ebolo awa po̱ buka te̱. Baboledi babosso ba kwali ná bangame̱n o kusa musawedi mu buki ma bane̱ ońol’ebolo ba bolino̱. (Mat. 20:1-16) Tongwea na yen eyembilan Yesu a lee̱ bokwedi bao ná bangame̱n bwane̱ nje ba makusane̱no̱ Loba muńe̱nge̱.

Lee̱le̱ masoma, o s’engane̱ to̱ moto lambo. (1 Tes. 5:18) Embilane̱ ńamuloloma Paulo nu si baise̱ bonasango Korinto to̱ lambo to̱ e be̱ nde ná a ta a be̱ne̱ bwam o bola nika. (1 Kor. 9:11-14)  Biso̱ pe̱ di si baise̱ moto to̱ lambo di timbise̱le̱ nde masoma ońola nje di makusane̱no̱ bato.

Sa sibise̱ la ńolo. Moto a mo̱nge̱le̱ te̱ jombwea mo̱me̱ne̱ buka nje yangame̱n, a mabotea nde jo̱nge̱le̱ ná a be̱n bwam o kusa buka je a be̱nno̱. Sibise̱ la ńolo nde di me̱nde̱ jongwane̱ biso̱ ná di si be̱ne̱ i ńai a mo̱nge̱le̱.

Muto̱ped’a mudī Daniel e nde Eyembilan a bwam ya sibise̱ la ńolo. A ta nde a wa o mbia ma bwam, a do̱lo̱, a be̱ dibie̱, a bia pe̱ bola jita la mambo nik’e wusa bola ná e̱ne̱ mo̱me̱le̱ ka moto nu dongame̱n o kusa o mambo ma tobotobo. (Dan. 1:3, 4, 19, 20) Nde, Daniel a bengi lee̱le̱ sibise̱ la ńolo y’ede̱mo nde e boli ná a be̱ tiki o miso̱ ma Yehova.—Dan. 2:30; 10:11, 12.

Di bange so̱ mukobo, nikame̱ne̱ pe̱ na wasa la bwam ba biso̱me̱ne̱, edī yena e lań o wase we̱nge̱, o diwengisan di benge bwane̱ minam ma Yehova me̱se̱ muńe̱nge̱ mena di makusano̱ nde buka te̱ ońola nded’ao di si boledino̱.