Ońola nje Yesu a to̱pino̱ byala ba David be maso̱be̱ o Myenge 22:2 obiana a mawo̱ e?

Obiana a mawo̱, Yesu a to̱pi ben byala be maso̱be̱ o Mateo 27:46 na o Marko 15:34 ná: “A Loba lam, a Loba lam, ońola nje o bangisanno̱ mba e?” Ponda a to̱pino̱ nika, Yesu a londe̱ nde byala ba David be maso̱be̱ o Myenge 22:2. E si te̱nge̱n o jo̱nge̱le̱ ná Yesu a to̱pi nde be byala ońolana Loba a caki mo̱ to̱so̱ ná a bo̱lo̱ne̱ nde dube̱. Yesu a ta a bia ná te̱ite̱i ońola nje a tano̱ angame̱n wo̱, a ta pe̱ be̱be̱ o jemea ni kwedi. (Mat. 16:21; 20:28) Yesu a ta pe̱ a bia ná o ponda kwed’ao, Yehova a si me̱nde̱ benga “dinge̱le̱ mo̱ o midi me̱se̱.” (Hiob 1:10) Yehova a sumwane̱no̱ so̱ Yesu betatedi bao, nik’e boli mo̱ epolo o lee̱le̱ ná a me̱nde̱ benga be̱ jemea to̱ oboso ba kwed’a konjo.—Marko 14:35, 36.

Ońola nje so̱ Yesu a to̱pino̱ byala ba y’epas’a Myenge e? To̱ná di titino̱ ná di kwala ná te̱ite̱i ońola nje Yesu a to̱pino̱ be byala, di keke jombwea njo̱m iwo̱. *

Ponda a to̱pino̱ be byala, yen ebe Yesu a puli nde kwala ná a si me̱nde̱ kusane̱ Yehova jongwane̱ to̱ diwo̱ o ponda kwed’ao. Yesu a ta angame̱n sawa diko̱ti esibe̱ jongwane̱ la Yehova. A ta so̱ angame̱n wo̱ ná a “keke kwedi ońola bato be̱se̱.”—Bon. 2:9.

Ponda a to̱pino̱ be byala, yen ebe Yesu a ta nde a pula duta mo̱nge̱le̱ ma bato o y’epas’a Myenge ye̱se̱. O Pond’a Yesu,  Bonayuda ba ta ba ko̱lo̱ngo̱ne̱ o kombe̱ jita la bepasi ba kalat’a Myenge o bo̱ngo̱. Moto a ta be̱ o̱nge̱le̱ te̱ ngus’a byala ba kalat’a Myenge po̱, dibokime̱ne̱ bane̱ ba mo̱nge̱le̱ nde y’epas’a Myenge ye̱se̱. Yete̱na nika nde Yesu a tano̱ a pula bola, ke̱ ongwane̱ so̱ nde bokwedi bao o jo̱nge̱le̱ bedinge̱ jita be maso̱be̱ o y’epas’a Myenge jombwea mambo ma ta mangame̱n tombe̱ o pond’a kwed’ao. (Mye. 22:8, 9, 16, 17, 19, 25) O sumo te̱ nika, myemba misukan ma ni kalat’a Myenge mi masesa nde Yehova, mi lee̱ pe̱ ná mo̱ nde e mwaned’a wase ńe̱se̱.—Mye. 22:28-32.

Ponda a to̱pino̱ be byala ba David, yen ebe Yesu a puli nde kwala ná a si boli to̱ lambo la bobe. Obiana Yesu a mabwabe̱, ba se̱le̱ nde bake̱le̱ mo̱ ná e nde muto̱pe̱ dibena. (Mat. 26:65, 66) Mwemba ma bakaisedi bande̱ne̱ mu pomane̱ nde ko̱to̱me̱ oteten a bulu, na mo̱ mu kwese̱ Yesu muka esibe̱ bupe̱ bete̱sedi ba bekaisedi. (Mat. 26:59; Marko 14:56-59) Ponda Yesu a baise̱no̱ myuedi ná “A Loba lam, a Loba lam, ońola nje o bangisanno̱ mba e?” yen ebe a ta nde a pula lee̱ ná a si boli to̱ lambo la bobe ná a bwabe̱.

Yen ebe Yesu a puli pe̱ jo̱nge̱le̱ bato ná to̱ná David mutiled’a mi Myenge a takino̱, nik’e si ta e pula kwala ná a si ta pe̱ a do̱lisane̱ Yehova. Myuedi David a baise̱no̱ mi si ta mi pula kwala ná a si ta pe̱ a be̱ne̱ dube̱. Ombusa mo̱ baise̱ mi myuedi, a lee̱le̱ ná e mbaki ná Yehova e ná a sunga baboledi bao, Yehova pe̱ a bengi o namse̱ mo̱. (Mye. 22:24, 25, 28) Mulemlem pe̱ nde e tano̱ na Yesu “Mun’a David,” to̱ná a takino̱ o ebongo a konjo, nik’e si ta e pula kwala ná Yehova a si do̱lisane̱ pe̱ mo̱.—Mat. 21:9.

Yen ebe Yesu a ta nde a lee̱le̱ ndutu ninde̱ne̱ a tano̱ a bwa ońolana Yehova a ta angame̱n sumwane̱ mo̱ betatedi bao ná a we̱le̱ lee̱le̱ jemea lao na mbale̱. Mwano ma Yehova o bebotedi mu si ta ná mun’ao a take, a wo̱ pe̱. Nik’e timbi nde pula ponda Adam na Eva ba kwe̱mno̱ Yehova. Yesu a si ta a bola to̱ lambo la bobe nde a ta angame̱n taka na wo̱ pe̱ ná alabe̱ myuedi ma Satan, na bola pe̱ longe̱ lao ka diko̱ti o bwam ba sawa nje Adam a bo̱lo̱ne̱no̱. (Marko 8:31; 1 Pet. 2:21-24) Nik’e wusa nde we̱le̱ bolane̱ buka te̱ yete̱na ka nged’a boso Yehova a sumwane̱ Yesu betatedi bao ońola pambo a ponda po̱.

Yen ebe Yesu a keki nde o jongwane̱ bokwedi bao ná ba soke̱ mo̱nge̱le̱ mabu o njo̱m ni boli ná Yehova ese̱le̱ ná a bwabe̱ o ni mbadi. * Yesu a ta a bia ná kwed’ao ka mot’ebwan o ebongo a konjo e me̱nde̱ be̱ eso̱njisan ońola bato jita. (1 Kor. 1:23) Bokwedi bao ba soke̱ so̱ te̱ mo̱nge̱le̱ mabu o njo̱m a kwed’ao mo̱me̱ne̱, nik’e wusa jongwane̱ babo̱ o je̱ne̱ Yesu seto̱ ka mot’ebwan, nde ka musungedi. (Gal. 3:13, 14.)

E be̱ to̱ njika njo̱m ni tute̱le̱ Yesu o to̱po̱ be byala, a ta a bia ná tongwea na kwed’ao a me̱nde̱ londise̱ jemea la Yehova. Ombusa mo̱ pase̱le̱ byala ba mi Myenge, Yesu a bati ná: “Me̱se̱ ma dom.” (Yohane 19:30; Lukas 22:37) Ponda Yehova a se̱le̱no̱ sumwane̱ Yesu betatedi bao ońola son a ponda, Yesu a kusi epolo o londise̱ mambo me̱se̱ a tano̱ angame̱n bola o nin wase. A kusi pe̱ epolo o londise̱ me̱se̱ mena ma ta ma tilabe̱ ońol’ao “o mbend’a Mose na o bato̱pedi ba mudī na o myenge.”—Lukas 24:44.