Ponda na po̱ino̱ 13 la mbu, mulatako mam na Yehova mu botedi o bo̱bo̱. Na ta nde ne̱ne̱ ná mako̱m mam m’esukulu me wonja o bola nje ye̱se̱ ba mapulano̱, mba pe̱ na ta na pula be̱ wonja ka babo̱. Na ta no̱nge̱le̱ ná bete̱sedi ba bayedi bam na ba kriste̱n be ta be walame̱n mba jita, mambo ma mudī pe̱ ma ta ma nidilea mba. Na ta na bia ná Yehova e, nde mulatako mam na mo̱ mi si ta pe̱ ngińa.

Ye mbale̱ ná na ta na benga te̱ dikalo, nde na si ta pe̱ na to̱ndo̱ mo̱. Na si ta na boṅsane̱ ke̱ na mala o dikalo, e ta so̱ mba ndutu o botea ekwali to̱ o walane̱ mo̱ oboso. Na si ta so̱ na be̱ne̱ mape̱pe̱le̱ to̱ mokwa, na si ta pe̱ to̱ muńe̱nge̱, nik’e boli so̱ ná na bate singe̱ dikalo. Na ta na baise̱ mbame̱ne̱ ná, ‘Mo̱ ne̱ni moto eno̱ ná a benga te̱ dikalo nde ke̱ le ndutu nika e?

Na po̱ino̱ 17 la mbu, ńo̱ng’am ńa be̱ wonja e bati nde be̱ bonde̱ne̱. Na no̱ngi so̱ nde masango mam na mba nasumwe̱ o mboa, nala o Ostralia. Bayedi bam ba bo ndutu jita o je̱ne̱ ne̱ni neno̱ wala. Nik’e takise̱ babo̱,  nde ba ta bo̱nge̱le̱ ná na me̱nde̱ benga bolea Yehova.

Na po̱ino̱ o Ostralia, mambo ma bati nde ńama. Na botedi o tona ndongame̱n. Na timbi nde be̱ diko̱m na beso̱mbe̱ bena ka mba, be ta be to̱ndo̱ jukea o ndongame̱n we̱nge̱, nde kie̱le̱ bala ńo̱ belam na sa ngando o mandabo ma bulu. No̱nge̱le̱ te̱ longe̱ lam la niponda, mbale̱ ńe nde ná na ta nde na be̱ne̱ mwende mō̱ oteten, mune̱ pe̱ o eboko, nde na si ta pe̱ to̱ muńe̱nge̱ to̱ wuma.

Mbu miba ombusa nika, na dongame̱n munańango mō̱ ńena esibe̱ mo̱ bia, a boli ná na boteye dutea jombwea mbadi na tano̱ na die̱le̱ longe̱ lam. Na ta nde na ja o bolongi bō̱ na bonańango bane̱i be mulamba. Di bele̱ so̱ muboled’ebondo na munj’ao Tamara o ja na biso̱ woki po̱. Niponda mom’ao a tano̱ ala jombwea mambo ma mwemba, Tamara a ta a tombise̱ ponda na biso̱, di yo̱ pe̱ mwemba. Nik’e ta e bwese̱ mba muńe̱nge̱ jita. A ta muyao jita, di ta pe̱ di kwala na mo̱ na bo̱bise̱ la ńolo. Na ta mańaka o je̱ne̱ ná moto ńena nu to̱ndi mambo ma mudī ka mo̱ pe̱ e ná a be̱ muyao nika.

Tamara a ta bokenju jita. A ta a bia tombe̱le̱ bato bape̱pe̱ ndol’ao ońola dikalo na ońola mbale̱. Mo̱ a ta muńe̱nge̱ o bolea Yehova na mulema mao mwe̱se̱, nde mba na si ta muńe̱nge̱ ońolana na si ta na bolea Yehova na ngud’am ńe̱se̱. Ebe̱yed’ao na mbadi a tano̱ bonam ba tapi mba jita. Eyembilan ao e boli ná no̱nge̱le̱ lambo diwo̱ la mweńa: Yehova a mapula ná bato be̱se̱ ba boleye mo̱ “na muńe̱nge̱ . . . na musombise̱.”—Mye. 100:2.

Na ta na pula be̱ muńe̱nge̱ ka Tamara, nde ná na bole nika na ta nangame̱n wana mawengisan mande̱ne̱ o longe̱ lam. Nik’e no̱ngi ponda, nde na botedi wana mawengisan son na son. Na botedi o boṅsane̱ ońola dikalo; ponda na ponda te̱ na ta pe̱ na no̱ngo̱ ebol’a paonia ń’epas’a ponda. Nika ńongwane̱ mba ná na si bwa pe̱ bo̱ngo̱, na bate pe̱ be̱ne̱ye̱ mbame̱ne̱ lakisane̱. Nika na tano̱ na bolane̱  Bibe̱l jita o dikalo, ndol’am ońola dikalo pe̱ e bati nde. Son a ponda ombusa nika, na botedi o be̱ paonia ń’epas’a ponda mo̱di te̱.

Na botedi wasa be̱ mako̱m na bato be̱se̱, e be̱ beso̱mbe̱ to̱ bato ba mákokwe̱ mimbu bena be muńe̱nge̱ o bolea Yehova na mulema mwe̱se̱. Eyembilan abu ya bwam yongwane̱ mba o jombwea nje ye mweńa buka me̱se̱ o longe̱ lam, na o botea langa Bibe̱l buńa te̱. Na botedi pe̱te̱ to̱ndo̱ dikalo na mba na timba paonia ńa pond’a mususu. Ka nged’a boso ombusa mi mimbu me̱se̱ na ta na be̱ne̱ mo̱nge̱le̱ ma sibi, na be̱ pe̱ muńe̱nge̱ o mwemba.

Mbu mō̱ ombusa nika nde na dongame̱nno̱ Ale̱x, nu ta nde moto ńe muyao, nu to̱ndi Yehova na dikalo. A ta nde muboledi o mwemba, a ta pe̱ a mátombise̱ mbu mutoba o ebol’a paonia. Alex a boledi pe̱ myo̱di to̱ mininga owe̱ni ńo̱ngi e tano̱ bonde̱ne̱ o Malawi. A dongame̱n bamuloloma owo bena ba ta mo̱ eyembilan a bwam, na bena ba tute̱le̱ mo̱ o benga we̱le̱ myam ma Janea o epol’a boso o longe̱ lao.

O mbu 2003, biso̱ na Alex di bane̱, jalane̱ pe̱ ebol’a pond’a mususu oboso nate̱na we̱nge̱. Y’ebolo yokwe̱le̱ biso̱ jita la belēdi ba mweńa, Yehova a namse̱ pe̱ biso̱ o mbadi jita.

O mbu 2009, di ta di belabe̱ o bolea ka bamuloloma o Timor-Leste, nika ńe nde mundi musadi mō̱ o byondi ba Indonesia. O mulemlem ma ponda di ta mańaka na muńe̱nge̱, nde di ta pe̱ di bwa bo̱ngo̱. Myo̱di mitanu ombusa nika, na biso̱ jala o mundi munde̱ne̱ mu belabe̱ ná Dili.

Longe̱ lasu o mu mundi ma peńa di ta diwengisan jita na longe̱ lasu la kwaṅ. Di ta jangame̱n ko̱lo̱ngo̱ne̱ bose̱di, eyeme̱, da na bete̱medi ba peńa. O dikalo di ta di  dongame̱ne̱ bato bena ba ta tue jita, bō̱ bena ba salo o esukulu, bape̱pe̱ pe̱ bena ba ta owas’a mabandan. Di ta pe̱ di dongame̱ne̱ bato bena bila na njo ba sengise̱no̱ sese jita. *

Dikalo di ta di tomba bwam jita! K’eyembilan na dongame̱n mun’a muto ńa 13 la mbu nu ta nu belabe̱ ná Maria. * Ńango a ta a máwo̱, a si ta pe̱ to̱ e̱ne̱ sango ponda ye̱se̱. Kapo̱ ka bana jita ba mimbu mao, Maria a si ta a bia nje a me̱nde̱no̱ bola o longe̱. Na dia na mo̱nge̱le̱ buńa bō̱ bwena a tano̱ a tele̱ye̱ mba ne̱ni a masengano̱, nde eya mbembe. Nde e ta mba ndutu o so̱ṅtane̱ nje eno̱ kwala ońolana na si ta na to̱po̱ bwambo babu bwam. Na kane̱ so̱ Yehova, na baise̱ mo̱ ná ongwane̱ mba o jembe̱ mo̱, na mba na botea langea mo̱ bepasi ba Bibe̱l be membe̱. Mimbu to̱ mininga ombusa nika, ne̱n ne̱ni mbale̱ e tukono̱ ebe̱yed’a Maria, je̱ne̱ne̱ lao, na longe̱ lao. A timbi dubisabe̱, mo̱ pe̱ a nitombise̱ mao mokwa ma Bibe̱l. O nin we̱nge̱, Maria e nde elong’a mbia munde̱ne̱ ma baboledi ba Yehova, a bi pe̱ ná a to̱ndo̱be̱.

Yehova a namse̱ ebol’a dikalo jita o mundi ma Timor-Leste. To̱ná bate̱ dikalo jita ba dubisabe̱no̱ nde ye we̱nge̱ dom la mbu buka te̱, jita ba mabolea ka paonia, baboledi, na batutu. Bape̱pe̱ ba mabolea o o̱fis a betukwedi o bwam ná da la mudī di tukwabe̱ o leme̱ labu. Na ta muńe̱nge̱ o senga ne̱ni ba malo̱ngo̱no̱ myenge o ndongame̱n, o je̱ne̱ ne̱ni ba mańamwe̱le̱no̱ lo̱, na o je̱ne̱ ne̱ni ba mańakano̱ o mbad’a mudī.

Longe̱ lasu o Timor ná Jedu di ta diwengisan jita na longe̱ di tano̱ di be̱ne̱ o Ostralia, nde di ta muńe̱nge̱ jita. Ponda iwo̱, mutoa masu mu ta mu londa na bato ná bō, name̱ne̱ pe̱ na sue yanji na bewudu bato bandino̱ o don. Mińa mō̱ pe̱, di ta be̱ di londa n’eyididi ke̱ je o tombise̱ jokwa la Bibe̱l o son a bolongi yena e si be̱n sime̱nti o wase, na we̱ni wuba i tano̱ i ńa mīla bepolo be̱se̱. Nde to̱ na mi mitakisan me̱se̱ na ta nde na kwala ponda ye̱se̱ ná, ‘E se̱ ebolo ye bwam e!’

No̱nge̱le̱ te̱ longe̱ lam di tombi, na matimbise̱le̱ bayedi bam masoma jita ońolana ba boli me̱se̱ o jokwe̱le̱ mba mangea ma Yehova, ba sue̱le̱ pe̱ mba ponda mulatako mam na Yehova mu si tano̱ bwam. Ne̱n belondisedi ba kalat’a Minia 22:6 o longe̱ lam. Sango am na ńango am be muńe̱nge̱ ońola longe̱ lena biso̱ na Ale̱x di be̱nno̱; be muńe̱nge̱ o je̱ne̱ ne̱ni di maboleano̱ Yehova. Botea o mbu 2016, di belabe̱ o bolea o ebol’ebondo o Australasia.

Ye mba ndutu o jemba ná na si ta na to̱ndo̱ ebol’a dikalo kwaṅ. Tatan na to̱ndi mo̱ jita! Na timbi so̱ṅtane̱ ná e be̱ to̱ nje di kusino̱ o longe̱, je nde bonam na mbale̱ buka te̱ ke̱ di mabolea Loba na mulema mwe̱se̱. E, din 18 la mbu neno̱ bolea Yehova mwemba na Alex di boli ná longe̱ lam di be̱ bonam na mbale̱. Tatan na maso̱ṅtane̱ bwambwam ben byala David a kwalisane̱no̱ Yehova ná: “Be̱se̱ ba mapulise̱ diwutamea na wa ba me̱nde̱ bwa muńe̱nge̱; ba masombise̱ bebe be̱se̱, . . . Ba ba to̱ndi dina lo̱ngo̱ ba me̱nde̱ be̱ mutam.”—Mye. 5:12.