O EPOL’EKOTED’A Bibe̱l o Yerusalem, dale diwo̱ le oten lena di be̱n matila, di po̱ngo̱be̱ o pambo a ponda ńa mimbu má 700 na 600 B.P.A. Di dale di so̱be̱ nde o mulomba mō̱ ba tano̱ ba bolane̱ ka so̱ngo̱ be̱be̱ na Hebron o Israel. Ba tili nde oten ná: “Hagaf mun’a Hagav a loabe̱ na Yahweh Sabaot.” Ne̱ni man matila ma masue̱le̱no̱ Bibe̱l e? Ma malee̱ ná dina la Loba ná Yehova, lena di ta di tilabe̱ ná YHWH na litera ya Bonahebe̱r ya kwaṅ, di ta di biane̱ bwam, ba ta pe̱ ba bolane̱ mo̱ ponda ye̱se̱ o mińa ma Bibe̱l. Matila mape̱pe̱ me o milomba ma so̱ngo̱ ma malee̱ ná bato ba ta ba dongame̱n na wutame̱ oten. Ponda ye̱se̱, ba ta be̱ ba tila o bedima dina la Loba mwemba na mina ma bato mena ma be̱n dina la Loba o ńai na ńai a mbadi.

Ke̱ e o kwalea ońola ma matila, Dr. Rachel Nabulsi ńa Université ńa Georgia mo̱ ná: “Din dina ná YHWH di matimba ngedi jita. Nika ńe nde biso̱ belēdi bende̱ne̱. . . . Nje ye̱se̱ e tilabe̱ e malee̱ mweńa ma YHWH o longe̱ la Bonaisrael na Bonayuda.” Nik’e masue̱le̱ nde Bibe̱l, we̱ni dina la Loba di tilabe̱ YHWH na litera ya Bonahebe̱r di maso̱be̱no̱ lokoli la ngedi. Ponda iwo̱, mina ma bato mo̱me̱ne̱ pe̱ ma ta ma be̱ne̱ dina la Loba.

Byala ná “Yahweh Sabaot,” bena be makabe̱ o di dale be mapula nde kwala ná “Yehova ńa mamuti.” Nik’e malee̱ nde ná o sumo te̱ ná ba ta be̱ ba bolane̱ dina la Loba o mińa ma Bibe̱l, ba ta pe̱ ba bolane̱ byala ná “Yehova ńa mamuti.” Nik’e malee̱ pe̱ ná Bibe̱l e te̱nge̱n o bolane̱ byala ná “Yehova ńa mamuti,” bena be maso̱be̱ 283 ba ngedi o Betiledi ba Bonahebe̱r, tobotobo o betiledi ba Yesaya, Yeremia, na Sakaria.