MO̱ O me̱ne̱ wame̱ne̱ ka moto nu bi timbise̱le̱ masoma e? Biso̱ be̱se̱ jangame̱n jombwea min myuedi. Bibe̱l e ta e bīse̱ ná o pond’asu, jita la bato ba me̱nde̱ be̱ “ba si bi masoma.” (2 Tim. 3:2) Yen ebe o mádongame̱n bato bena ba mengane̱ bane̱ ná ba boleye babo̱, to̱ bola babo̱ mambo. Ye nde biana ba me̱ne̱ nde ná ba si be̱n ńo̱ng’a timbise̱le̱ masoma ońola nje ba makusano̱. Ye̱ke̱i te̱ o so̱i ná e titi bu o dingabe̱le̱ na ninka pat’a bato.

O diwengisan, Yehova mo̱ na baboledi bao ná ba bie ‘Bola masoma.’ Jangame̱n “bola masoma ońola me̱se̱.” (Kol. 3:15; 1 Tes. 5:18) Ye nde lambo la bwam ná di bie timbise̱le̱ masoma. Di be̱n njo̱m jita o bola nika.

Njo̱m po̱ ńa mweńa di be̱nno̱ o timbise̱le̱ masoma ńe nde ná, bola la nika di mongwane̱ ná di senge biso̱me̱ne̱ bwam. Moto nu matimbise̱le̱ masoma a masenga mo̱me̱ne̱ bwam ye̱ke̱i te̱, nu nu makuse̱ masoma pe̱ a masenga bwam. Ońola nje timbise̱le̱ la masoma di mabolano̱ ná mubole̱ masoma na mukuse̱ mo̱ ba senge bwam e? Jombweye yen eyembilan: Moto a no̱ngi te̱ ponda o bolea wa lambo nika e si mapula nde kwala ná e̱n ná o dongame̱n ná a po̱nge mi miwe̱n ońol’ango̱ e? Nu moto a mombwea wa. O masenga wame̱ne̱ bwam ke̱ o so̱ṅtane̱ nika. Nika nde e tombino̱ na Rut. Boas a lee̱le̱ Rut sanga la mulema. Ye̱ke̱i te̱, nik’e bwese̱ Rut muńe̱nge̱ jita o je̱ne̱ ná moto a mombwea mo̱.​—Rut 2:10-13.

Ye mweńa tobotobo ná di timbise̱le̱ Loba masoma. Ye̱ke̱i te̱, o yo̱ki jo̱nge̱le̱ ponda iwo̱ jita la mabea ma mudī na m’eyobo a bolino̱, na mena a diano̱ pe̱ a mabola. (Ndim. 8:17, 18; Bebolo 14:17) No̱ngo̱ ponda eyeka o dutea jita la minam Loba a komedino̱ wa na bandolo bo̱ngo̱. O dutedi te̱ ońola sanga la mulema la Muweked’ango̱, o me̱nde̱ bata timbise̱le̱ mo̱ masoma, o bata pe̱ so̱ṅtane̱ nate̱na o njika dime̱ne̱ a to̱ndino̱ wa, a do̱lisanno̱ pe̱ wa.​—1 Yohane 4:9.

O si dutea buka te̱ ońola sanga lao la mulema na minam mao; bola pe̱ Yehova Loba masoma ońola bwam bao. (Mye. 100:4, 5) E kwalabe̱ ná “timbise̱le̱ la bane̱ masoma di mabola ná o be̱ bonam.”

Njo̱m nipe̱pe̱ ońola nje timbise̱le̱ la masoma di maboleano̱ wa bwam ńe nde ná di mouse̱ mulatako ma mako̱m. Biso̱ be̱se̱ di be̱n ńo̱ngi o bia ná bane̱ ba do̱lisane̱ biso̱. O timbise̱le̱ te̱ moto nupe̱pe̱ masoma ma ńo̱ngo̱ńo̱ngo̱ ońola lambo la bwam a boledino̱ wa, bińo̱ babane̱ lo mabata be̱ mako̱m ma bwam. (Rom. 16:3, 4) Mbata na nika, bato bena ba matimbise̱le̱ masoma, be be̱be̱ o jongwane̱ bane̱. Ba me̱ne̱ muyao ba malee̱le̱no̱ babo̱, babo̱ pe̱ ba lee̱le̱ bane̱ muyao. Na mbale̱, jongwane̱ la bane̱ di mawana bonam. Ye nde ka nje te̱ Yesu a kwalino̱ ná: “Bola le bonam buka kusa.”​—Bebolo 20:35.

Robert Emmons, mudied’a Universite o Kalifornia ńena nu po̱ngi muwaso ońola timbise̱le̱ la masoma, mo̱ ná: “Ná di timbise̱le̱ masoma, jangame̱n so̱ṅtane̱ ná di be̱n ńo̱ng’a mō̱ na nune̱. Ponda iwo̱ di mabola, ponda iwo̱ pe̱ di makusa.” Mbale̱ ńe nde ná, ná di be̱ longe̱ na bonam, di be̱n ńo̱ng’a bane̱ o midi jita. K’eyembilan, be ná ba bola biso̱ da to̱ myanga. (1 Kor. 12:21) Moto ńena nu bi timbise̱le̱ masoma a mabwane̱ nje  bane̱ ba maboleano̱ mo̱ muńe̱nge̱. Mo̱ o ko̱lo̱ngo̱ne̱ o timbise̱le̱ masoma ońola nje bane̱ ba maboleano̱ wa e?

Njo̱m nipe̱pe̱ wangame̱nno̱ timbise̱le̱ masoma ńe nde ná, nika e mongwane̱ wa o soke̱ mo̱nge̱le̱ o nje ye bwam seto̱ o nje ye bobe. Bo̱ngo̱ bo̱ngo̱ bo madangwa so̱ nde k’ese̱ngwe̱n. Nik’e mongwane̱ wa o jo̱nge̱le̱ mambo ma bwam buka ma bobe. Mambo ma bwam nde o mombweano̱ jita, ma bobe pe̱ bosadi. O ko̱lo̱ngo̱ne̱ te̱ timbise̱le̱ masoma, o mako̱lo̱ngo̱ne̱ pe̱ senga wame̱ne̱ bwam, nik’e tute̱le̱ wa o bata timbise̱le̱ masoma. O we̱le̱ te̱ wame̱ne̱ mususu o mambo wangame̱nno̱ timbise̱le̱ masoma, nika e mongwane̱ wa o bola nje ńamuloloma Paulo ome̱le̱no̱ ná: “Bwa muńe̱nge̱ o Sango ponda ye̱se̱.”​—Fil. 4:4.

Timbise̱le̱ la masoma di mongwane̱ wa ná o si dutea mambo ma bobe. Ye ndutu jita ná o timbise̱le̱ masoma nde o mulemlem ma ponda pe̱ o ko̱no̱ne̱, o bwe ndutu, to̱ be̱ njongi. Bato bena ba bi timbise̱le̱ masoma ba si tingame̱ na bema. Ba mabwane̱ nje ba be̱nno̱ muńe̱nge̱, ba si mapula pe̱ to̱ be̱ne̱ buka nika.​—Fil. 4:12.

Wa kriste̱n, o bi ná ńo̱ng’a Satan ńe nde ná mitakisan o be̱nno̱ o min mińa misukan mi bwese̱ wa ndutu na bo̱bise̱ pe̱ wa. A me̱nde̱ bwa muńe̱nge̱ yete̱na o me̱ne̱ mambo o mbad’a bobe, na ná o mato̱kisane̱ pe̱ mambo me̱se̱. Yete̱na we nde ninka moto, e me̱nde̱ be̱ bato ndutu ná ba lambe̱ye̱ wa toi ke̱ we o te̱ dikalo la myango ma bwam. Timbise̱le̱ la masoma n’epum’a mudī ma Loba ba madangwa nde nduta. K’eyembilan, di mabwa muńe̱nge̱ ońola mambo ma bwam Loba a bolino̱ biso̱, di dube̱ pe̱ nje a kakane̱no̱ ońola kie̱le̱ ni maye̱.​—Gal. 5:22, 23.

Kana weno̱ mō̱ ńa baboledi ba Loba, ye̱ke̱i te̱ we jo̱nge̱le̱ diwo̱ na nje e kwalabe̱ o mun mulopo m’ekwali jombwea timbise̱le̱ la masoma. Nde to̱ na nika, o so̱ṅtane̱ ná e titi bu ponda ye̱se̱ o timbise̱le̱ masoma na je̱ne̱ pe̱ mambo o mbad’a bwam. Nde o s’ese̱le̱ ná nika e bo̱bise̱ wa. We ná o sa edi a timbise̱le̱ masoma, o kombe̱ pe̱ mo̱. Ne̱ni e? No̱ngo̱ ponda buńa te̱ o dutea ońola mambo mō̱ ma longe̱ lo̱ngo̱ ma mabole̱ ná o timbise̱le̱ masoma. O bengi te̱ bola nika, timbise̱le̱ la masoma di mabe̱ nde wa ede̱mo. O me̱nde̱ bata be̱ bonam buka ba bena ba masoke̱ mo̱nge̱le̱ o mitakisan ma longe̱. O̱nge̱le̱ mambo ma bwam Loba na bane̱ ba mabolano̱ mena ma membe̱ wa, ma mabole̱ pe̱ ná o be̱ bonam. Yen ebe we ná o botea tila mo̱. We ná o tila mambo maba to̱ malalo mena ma mabole̱ ná o timbise̱le̱ masoma buńa te̱.

Bamuwaso bō̱ bā ná “di ko̱lo̱ngo̱ne̱ te̱ timbise̱le̱ bane̱ masoma, nika ńena e tukwa mbadi bo̱ngo̱ basu bo madangwano̱, e be̱ pe̱ biso̱ lambo di bo̱bi o senga biso̱me̱ne̱ bwam.” Moto nu bi timbise̱le̱ masoma e nde moto ńe bonam. Ońola nika, so̱nge̱le̱ minam mo̱ngo̱, bwane̱ mambo ma bwam o kusino̱ muńe̱nge̱, o timbise̱le̱ pe̱ masoma ponda ye̱se̱! O mulopo ma no̱ngo̱ mambo ma bwam o kusino̱ ka mō̱ mena me nde mo̱ngo̱, “pandise̱ Yehova, ebanja e bwam.” E, “bola masoma ońola me̱se̱.”​—1 Myan. 16:34; 1 Tes. 5:18.