Myango me o Ndimbisedi 22:25-27 mi si mombwea tobotobo mboṅ i makwese̱ mome muka, ońolana o mi myango nu mome a máko̱ muka. Ni mbenda e ta nde ńombwea ka ni si be̱n njo̱m ńa muto. Maka to̱ti la nje ye o kwalabe̱.

Myemba mi se̱le̱ mi makwalea nde jombwea mome ńena nu nangane̱ ngo̱ndedi ni wandabe̱ “o mundi.” Nu mome a be̱n njo̱m a musonje, ebanja ni ngo̱ndedi ni wandabe̱ e malangabe̱ nde ka muto nu babe̱. Di kwale pe̱ so̱ ná nje jombwea ni ngo̱ndedi e? “E si te̱ musea o mundi.” E te̱ te̱ musea, bane̱ ba wusa senga ye̱ke̱i te̱ ba po̱ sunga mo̱. Nde e si te̱ musea. Ońola nika, e be̱n njo̱m a musonje, babo̱ babane̱ ba kwe̱m mbenda.​—Ndim. 22:23, 24.

Mbenda e mateleye̱ ben bete̱medi bepe̱pe̱: “Nde yete̱na moto a boman ngo̱ndedi ni wandabe̱ o eyidi, nde a damea mo̱, a nangane̱ mo̱, ke̱ nu mome nu nangan mo̱ mo̱me̱ne̱ nde a mawo̱; lo si bolane̱ ni ngo̱ndedi to̱ lambo, e si be̱n njo̱m ni maleneye̱ mo̱ kwedi; nje e bolan na mo̱ ye nde mulemlem ka moto nu ko̱ye̱ munasango, a bwa mo̱; ebanja nu moto a boman nde mo̱ o eyidi; ni ngo̱ndedi ni wandabe̱ e te̱ misea yen ebe, nde moto a si be̱ o sunga mo̱.”​—Ndim. 22:25-27.

O ben bete̱medi, bakaisedi ba ta ba swe̱le̱ ni ngo̱ndedi muka. Ne̱ni e? Ba ta nde ba bolane̱ jo̱nge̱le̱ ná “e te̱ misea yen ebe, nde moto a si be̱ o sunga mo̱.” E si be̱n so̱ njo̱m a musonje. Nde mome a be̱n njo̱m ná a nangane̱ muto na mińakisan, a wite̱ pe̱ musonje, ońolana “a damedi [ngo̱ndedi ni wandabe̱], a nangane̱ mo̱.”

To̱ná ni mbenda e tano̱ nde e bonde̱ ka ni si be̱n njo̱m ńa muto, mi myango mi malangwa ná bwē ná nu mome a be̱n njo̱m ná a nangane̱ ni ngo̱ndedi na mińakisan, a wite̱ pe̱ musonje. Je ná di be̱ mbaki ná bakaisedi ba ta be̱ ba ‘wasa bwambwam’ denge̱ ba mano̱ngo̱ bedomsedi be mulatako na bete̱sedi Loba a bolino̱ ná bwē ngedi na ngedi te̱.​—Ndim. 13:14; 17:4; Bbu. 20:14.