E me̱ne̱ne̱ ná ke̱m. Diabolo a si kwalisane̱ Eva ná a dedi te̱ epuma Loba a bangane̱no̱ mo̱, ńol’ao nde e mawo̱, nde mudī mao mu benga be̱ longe̱ wuma ipe̱pe̱. Satan, a kwalisane̱ nde Eva tongwea na ńama-bwaba ná a dedi te̱ epum’a bo bwele, ‘a si mawo̱’ tomtom. A ta nde a pula kwala ná a mabenga be̱ longe̱, a bwane̱ longe̱ la bwam muńe̱nge̱ o wase, a die̱le̱ pe̱ longe̱ lao ka pula lao.​—Bbot. 2:17; 3:3-5.

Yete̱na belēdi be kwedi ba mudī mu si mawo̱ ka nje te̱ be maleabe̱no̱ we̱nge̱ be si wu o Ede̱n, owe̱ni so̱ be wuno̱ e? Di titi ná di kwala na mbaki. Di bi ná mowe̱ ma mpoṅ me̱se̱ ma bumbisabe̱ o mpupe ma mińa ma Noa. Belēdi ba mpenga to̱ bō̱ ba bebasi be s’ongi o mpupe, o sumo te̱ Noa na mbia mao bena ba ta bowe̱ Loba o mbadi ńe bosangi.

E me̱ne̱ne̱ so̱ biana belēdi ba mudī mu si mawo̱ ka nje te̱ be maleabe̱no̱ nin we̱nge̱ be botedi nde ombusa mpupe. Ponda Loba a to̱bise̱no̱ bwambo o Babel, bato pe̱ ba pambilane̱ “o wase ńe̱se̱,” ye̱ke̱i te̱ balane̱ jo̱nge̱le̱ ná moto a be̱n mudī mu si mawo̱. (Bbot. 11:8, 9) E be̱ to̱ njika ponda be belēdi ba mpoṅ be botedino̱, je ná di be̱ mbaki ná “sango a lobango,” Satan Diabolo, nde a wan mo̱ e pe̱ muńe̱nge̱ o je̱ne̱ ná be lań wuma ye̱se̱.​—Yohane 8:44.