1. Bupisane̱ Maleaki 3:16, njika kalati Yehova eno̱ tila e, nje pe̱ e bambe̱no̱ e?

 YE WE̱NGE̱ lokoli la mimbu Yehova eno̱ tila kalati po̱ ńa tobotobo. Ni kalati e bambe̱ mina ma bato. Dina laboso lena di maso̱be̱ oten le nde la Abel, muboled’a Yehova ńa jemea ńaboso. * (Lukas 11:50, 51) Na ponda, Yehova a bati mina o ni kalati. O nin we̱nge̱ lodun la mina lo maso̱be̱ oten. O Bibe̱l, ni kalati e belabe̱ ná “kalat’a jo̱nge̱le̱,” na “kalat’a longe̱.” O din jokwa, di me̱nde̱ nde bolane byala ná “kalat’a longe̱” o kwalea ońola ni kalati.”​—Langa Maleaki 3:16; Bbī. 3:5; 17:8.

2. Ba nja ba be̱n mina mabu ma tilabe̱ o kalat’a longe̱ e, nje pe̱ jeno̱ ná di bola ná dina lasu di so̱be̱ oten e?

² Ni kalat’a tobotobo e be̱n mina ma be̱se̱ bena ba mowe̱ Yehova na bo̱ngo̱, na maladi, na bena ba to̱ndi dina lao. Ba be̱n dipita la be̱ne̱ longe̱ la bwindea. Dina lasu pe̱ le ná di tilabe̱ o ni kalati yete̱na di be̱n mulatako ma bo̱ibo̱i na Yehova, mwena mu se̱medi o eyot’a jabea la diko̱ti la Mun’ao, Yesu Kristo. (Yohane 3:16, 36) Biso̱ be̱se̱ di mapula ná dina lasu di so̱be̱ o ni kalati, e be̱ ná di be̱n dipita la be̱ longe̱ o mo̱ń to̱ o wase.

3-4. (a) Mo̱ di me̱nde̱ kusa longe̱ la bwindea ońolana dina lasu di tilabe̱ o kalat’a longe̱ e? Bola beteledi. (b) Nje di me̱nde̱no̱ je̱ne̱ o din jokwa na o di lena di mabupe̱ e?

³ Mo̱ nik’e mapula nde kwala ná be̱se̱ bena ba tilabe̱ mina o ni kalati ba me̱nde̱ kusa longe̱ la bwindea ye̱ke̱i  te̱ e? Di maso̱ jalabe̱ o byala bena Yehova a kwalisane̱no̱ Mose bena be o Bebusedi 32:33. Yehova mo̱ ná: “To̱ nja nu boli bobe lingise̱ mba, mo̱ nde na madimse̱no̱ o kalat’am.” Nika e malee̱ so̱ ná mina me o ni kalati me ná ma dimsabe̱, to̱ sumwabe̱, ye nde biana Yehova a se̱le̱ nde tila mo̱ na diwindi. (Bbī. 3:5) Jangame̱n bola me̱se̱ ná dina lasu di benge so̱be̱ oten natē̱ di tilabe̱ na tinte.

⁴ Nika ńe ná e bola ná di baise̱ biso̱me̱ne̱ myuedi mō̱. K’eyembilan, nje Bibe̱l e makwalano̱ jombwea ba bena ba tilabe̱ mina o ni kalati na ba bena ba si tilabe̱ mina oten e? Njika ponda ba bena ba tilabe̱ mina oten ba me̱nde̱no̱ kusa longe̱ la bwindea e? Ne̱ni e me̱nde̱no̱ be̱ ońola ba bena ba wedi esibe̱ babo̱ bia Yehova e? Mo̱ mina mabu pe̱ me ná maso̱be̱ o ni kalati e? Di me̱nde̱ so̱ malabe̱ ma mi myuedi o din jokwa na o di lena di mabupe̱.

BA NJA BA TILABE̱ MINA O “KALAT’A LONGE̱” E?

5-6. (a) Ka nje te̱ Filipi 4:3 e mabonde̱no̱, mina ma ba nja me o kalat’a longe̱ e? (b) Njika ponda mina mabu ma me̱nde̱no̱ tilabe̱ o kalat’a longe̱ o bwindea e?

⁵ Ba nja ba tilabe̱ mina o “kalat’a longe̱” e? Ná jalabe̱ mi myuedi jombweye pat’a mabo̱to̱ ma bato matanu. Oteten a ba bato o be̱n ba bena ba tilabe̱ mina o kalat’a longe̱, na ba bena ba si tilabe̱ mina oten.

⁶ Dibo̱to̱ laboso le nde ba bena ba po̱so̱be̱ o janea na Yesu o mo̱ń. Mo̱ mina mabu me o kalat’a longe̱ o nin we̱nge̱ e? E. Bupisane̱ byala bena ńamuloloma Paulo a langwedino̱ ‘mako̱m mao m’ebolo’ o Filipi, mina ma bo̱kisabe̱ bena ba belabe̱ o janea mwemba na Yesu, me o kalat’a longe̱. (Langa Filipi 4:3.) Nde ná mina mabu ma benge so̱be̱ oten, bangame̱n benga be̱ jemea. Ponda ba  me̱nde̱no̱ kusa ebatan esukan, e be̱ obiana ba mawo̱ to̱ ponda to̱ ininga oboso ná ndenge̱ ninde̱ne̱ e mabotea, mina mabu ma me̱nde̱ so̱ tilabe̱ o ni kalati o bwindea.​—Bbī. 7:3.

7. Bupisane̱ Bebīsedi 7:16, 17, njika ponda mina ma dimuti dinde̱ne̱ la mido̱ngi mipe̱pe̱ ma me̱nde̱no̱ tilabe̱ o kalat’a longe̱ o bwindea e?

⁷ Dibo̱to̱ di londe̱ maba le nde dimuti dinde̱ne̱ la mido̱ngi mipe̱pe̱. Mo̱ o tatan mina mabu ma tilabe̱ o kalat’a longe̱ e? E. Mo̱ mina mabu ma me̱nde̱ benga so̱be̱ o kalat’a longe̱ ombusa babo̱ jonga o Armagedon e? E. (Bbī. 7:14) Yesu a kwali ná mi mido̱ngi mi me̱nde̱ wala “o longe̱ la bwindea.” (Mat. 25:46) Nde ba bena ba me̱nde̱ jonge̱ o Armagedon ba si me̱nde̱ kusa longe̱ la bwindea dibokime̱ne̱. Mina mabu ma me̱nde̱ benga so̱be̱ o kalat’a longe̱ na diwindi ka nje te̱ ma tano̱. O pond’a Janea la ikol’a mbu, Yesu “a me̱nde̱ dese̱ na die̱le̱ babo̱ o tongo a madiba ma longe̱.” Ba bena ba me̱nde̱ bupe̱ bediedi ba Kristo, bena Yehova a me̱nde̱no̱ langa ka baboledi bao, mina mabu ma me̱nde̱ tilabe̱ o kalat’a longe̱ o bwindea.​—Langa Bebīsedi 7:16, 17.

8. Ba nja ba si tilabe̱ mina o kalat’a longe̱ e, nje pe̱ e me̱nde̱ po̱ye̱ babo̱ e?

⁸ Dibo̱to̱ di londe̱ malalo di longabe̱ nde na mbodi, yena i me̱nde̱ ńamsabe̱ o Armagedon. Mina mabu ma titi o kalat’a longe̱. Yesu a kwali ná ba “me̱nde̱ wala o ko̱kise̱ la bwindea.” (Mat. 25:46) Mudī musangi mu tute̱le̱ Paulo o kwala ná “beko̱kisedi babu be nde dibumbe la bwindea.” (2 Tes. 1:9; 2 Pet. 2:9) Nika ńe pe̱ ná e kwalabe̱ ońola ba bena, o longe̱ la mbel’a moto le̱se̱ ba boli bobe lingise̱ mudī musangi. Babo̱ pe̱ ba me̱nde̱ nde kusa dibumbe la bwindea, nde seto̱ longe̱ la bwindea. Ba si me̱nde̱ pumbwabe̱le̱ tomtom. (Mat. 12:32; Marko 3:28, 29; Bon. 6:4-6) Di kwaleye so̱ bwambwam tatan ońola ma mabo̱to̱ maba ma ba bena ba me̱nde̱ pumbwabe̱le̱ o wase.

BA BENA BA ME̱NDE̱ PUMBWABE̱LE̱

9. Ka nje te̱ Bebolo 24:15 e malee̱no̱, njika mabo̱to̱ ma bato maba ma me̱nde̱ pumbwabe̱le̱ o wase e, njika diwengisan pe̱ le oteten a ma mabo̱to̱ maba e?

⁹ Bibe̱l e makwalea ońola mabo̱to̱ maba ma bato bena ba me̱nde̱ pumbwabe̱le̱ na dipita la be̱ longe̱ o bwindea o wase, nika ńe nde “bate̱m na sim” na “basite̱m na sim.” (Langa Bebolo 24:15.) “Bate̱m na sim” be nde ba bena ba boledi Yehova na jemea o longe̱ labu. O mune̱ mudi, “basite̱m na sim” be nde ba bena ba si boledi Yehova na jemea. O jita la ngedi, ba si boli nje e te̱nge̱n. Kana ma mabo̱to̱ mabane̱ ma me̱nde̱no̱ pumbwabe̱le̱, je ná di kwala ná mina mabu ma tilabe̱ o kalat’a longe̱ e? Ná jalabe̱ mi myuedi jombweye dibo̱to̱ te̱ o mao mudi.

10. Ońola nje “bate̱m ná sim” ba me̱nde̱no̱ pumbwabe̱le̱ e, njik’edube pe̱ bō̱ babu ba me̱nde̱no̱ be̱ne̱ e? (Ombwa pe̱ “Myuedi ma balangedi” jombwea bepumbwedi o wase o nin Njongo a Betatedi.)

¹⁰ “Bate̱m na sim” nde be dibo̱to̱ di londe̱ mane̱i. Obiana ba mawo̱ mina mabu ma ta ma mátilabe̱ o kalat’a longe̱. Mo̱ mina mabu ma sumwabe̱ o ni kalati ombusa kwed’abu e? Ke̱m, ońolana Yehova a malanga nde babo̱ ka bō̱ bena ba dia “longe̱.” Yehova a titi “Loba la bawedi, nde la baweńa, ebanja be̱se̱ ba malangabe̱ nde na mo̱ ka be longe̱.” (Lukas 20:38) Nik’e mapula nde kwala ná ponda bate̱m ná sim ba me̱nde̱no̱ pumbwabe̱le̱ o be̱ longe̱ o wase, mina  mabu ma me̱nde̱ benga so̱be̱ o kalat’a longe̱ to̱ná ma se̱le̱no̱ tilabe̱ na “diwindi.” (Lukas 14:14) Ye̱ke̱i te̱, oteten a ba bena ba me̱nde̱ pumbwabe̱le̱, bō̱ ba me̱nde̱ be̱ne̱ edube o bolea ka “banedi omo̱ń ekombo [wase] ye̱se̱.”​—Mye. 45:17.

11. Nje “basite̱m na sim” bangame̱nno̱ jokwa obiana mina mabu ma matilabe̱ o kalat’a longe̱ e?

¹¹ Di kwese̱ na dibo̱to̱ di londe̱ matanu, nika ńe nde “basite̱m na sim.” Yen ebe kana ba si tano̱ ba bia bete̱sedi ba Yehova, ba si boledi mo̱ obiana ba mawo̱. Mina mabu ma si tilabe̱ so̱ o kalat’a longe̱. Nde Loba a me̱nde̱ pumbwe̱le̱ babo̱, na nika ba me̱nde̱ so̱ be̱ne̱ epolo ná mina mabu ma tilabe̱ o kalat’a longe̱. Ban “basite̱m na sim” ba me̱nde̱ be̱ne̱ ńo̱ng’a jongwane̱ dinde̱ne̱. Obiana ba mawo̱, bō̱ babu ba boli mambo ma tombise̱ bobe. E me̱nde̱ so̱ pula ná bokwe̱le̱ babo̱ ne̱ni die̱le̱ longe̱ labu bupisane̱ bete̱sedi ba Yehova. Ná ba we̱le̱ bola nika, Janea la Loba di me̱nde̱ die̱le̱ ebol’a belēdi yena e s’e̱ne̱ne̱ o myango ma mbel’a moto.

12. (a) Ba nja ba me̱nde̱ jokwe̱le̱ basite̱m na sim e? (b) Nje e me̱nde̱ po̱ye̱ ba bena ba me̱nde̱ bange̱ o we̱le̱ nje bokwe̱le̱no̱ babo̱ o ebolo e?

¹² Ba nja ba me̱nde̱ jokwe̱le̱ basite̱m ná sim e? Dimuti dinde̱ne̱ na bate̱m na sim bena ba pumbo. Ná basite̱m ná sim ba tilabe̱ mina o kalat’a longe̱, e me̱nde̱ pula ná ba be̱ne̱ mulatako ma bo̱ibo̱i na Yehova, ba bake̱ pe̱ mo̱ longe̱ labu. Yesu na ba bena ba me̱nde̱ kaise̱ mwemba na mo̱ ba me̱nde̱ jombwea bońaki ba basite̱m ná sim be̱se̱ ná batabata. (Bbī. 20:4) To̱ nja nu me̱nde̱ bange̱ jongwane̱ ba me̱nde̱no̱ wanea mo̱, a me̱nde̱ nde wo̱; to̱ a ta nde a mábe̱ne̱ ebwe’a mbu. (Yes. 65:20) Yehova na Yesu ba malanga milema, ba si me̱nde̱ so̱ jese̱le̱ ná moto a ńamse̱ was’a peńa.​—Yes. 11:9; 60:18; 65:25; Yohane 2:25.

 BEPUMBWEDI BA LONGE̱ NA BA MUKA

13-14. (a) O mińa mi tombi, ne̱ni di tano̱ di so̱ṅtane̱ byala ba Yesu bena be o Yohane 5:29 e? (b) Nje jangame̱nno̱ maka jombwea be byala e?

¹³ Yesu a to̱pi pe̱ ońola ba bena ba me̱nde̱ pumbwabe̱le̱ o wase. K’eyembilan, a kwali ná: “Ponda e me̱nde̱ po̱, ńena be̱se̱ be o so̱ngo̱ ba me̱nde̱no̱ senga doi lao, nde ba me̱nde̱ busa; ba bena ba boli bwam o bepumbwedi ba longe̱, ba bena ba boli bobe o bepumbwedi ba muka.” (Yohane 5:28, 29) Nje Yesu a tano̱ a pula kwala e?

¹⁴ O mińa mi tombi, di ta nde jo̱nge̱le̱ ná byala ba Yesu be mombwea nde mambo mena bato ba me̱nde̱ pumbwabe̱le̱ ba me̱nde̱no̱ bola ombusa bepumbwedi babu; nika ńe nde ná, bō̱ ombusa bepumbwedi babu ba me̱nde̱ bola mambo ma bwam, nde ná bape̱pe̱ ombusa bepumbwedi babu ba me̱nde̱ bola mambo ma bobe. Nde maka ná, Yesu a si kwali ná ba bena ba me̱nde̱ buse̱ o so̱ngo̱ ba me̱nde̱ bola mambo ma bwam, to̱so̱ ná ba me̱nde̱ bola mambo ma bobe. Byala bao be mombwea nde ponda ni tombi. A kwali nde ońola ba bena ba “boli bwam” na ba bena ba “boli bobe.” Nik’e malee̱ nde ná ba boli nde ma mambo obiana ba mawo̱. Nik’e te̱nge̱n, e titi mbale̱. E be̱ to̱ nē̱, to̱ moto a si me̱nde̱ be̱ne̱ epolo o bola mambo ma bobe o was’a peńa. Basite̱m ná sim ba boli nde ma mambo ma bobe obiana ba mawo̱. Nje so̱ byala ba Yesu jombwea “bepumbwedi ba longe̱” na “bepumbwedi ba muka” be mapulano̱ kwala e?

15. Ba nja ba me̱nde̱ be̱ne̱ “bepumbwedi ba longe̱” e, ońola nje pe̱ e?

¹⁵ Bate̱m ná sim, bena ba boli mambo ma bwam obiana ba mawo̱, ba me̱nde̱ be̱ne̱ “bepumbwedi ba longe̱” ońolana mina mabu ma ta ma mátilabe̱ o kalat’a longe̱. Nik’e mapula nde kwala ná, bepumbwedi ba “ba bena ba boli bwam” be kwalabe̱ o Yohane 5:29, be nde mulemlem ma bepumbwedi ba “bate̱m ná sim” bena be kwalabe̱ o Bebolo 24:15. Din so̱ṅtane̱ le mulatako na byala ba Roma 6:7, be makwale̱ ná: “Nu nu wedi a wunjabe̱ o bobe.” Yehova a lakise̱ myobe mena bate̱m ná sim ba bolino̱ obiana ba mawo̱, nde a mo̱nge̱le̱ jemea lena ba lee̱le̱no̱. (Bon. 6:10) Nde e me̱nde̱ te̱ nde pula ná bate̱m ná sim ba benge lee̱le̱ jemea ná mina mabu ma benge so̱be̱ o kalat’a longe̱.

16. Nje bepumbwedi ba muka be mapulano̱ kwala e?

¹⁶ Nje pe̱ so̱ kwala jombwea ba bena ba boli mambo ma bobe obiana ba mawo̱ e? To̱ná myobe mabu mi lakisabe̱no̱ ponda ba wedino̱, ba si boledi Yehova na jemea o longe̱ labu. Mina mabu ma si tilabe̱ o kalat’a longe̱. Bepumbwedi ba ba bena ba boli mambo ma bobe, be so̱ nde mulemlem na bepumbwedi ba “basite̱m na sim” bena be kwalabe̱ o Bebolo 24:15. Ba me̱nde̱ nde be̱ne̱ “bepumbwedi ba muka.” * Basite̱m ná sim ba me̱nde̱ nde kaisabe̱ na ninka ná ba me̱nde̱ we̱le̱be̱ o kekise̱. (Lukas 22:30) E me̱nde̱ pula ponda o bia nga ba dongame̱n o be̱ne̱ mina mabu o kalat’a longe̱. Mina ma basite̱m  ná sim ma me̱nde̱ nde tilabe̱ o kalat’a longe̱ buka te̱ yete̱na bese̱le̱ longe̱ labu la bobe la kwaṅ, nde ba bake̱ pe̱ babo̱me̱ne̱ na Yehova.

17-18. Nje be̱se̱ bena ba me̱nde̱ pumbwabe̱le̱ o be̱ longe̱ o wase bangame̱nno̱ bola e, njika “bebolo” pe̱ Bebīsedi 20:12, 13 e makwaleano̱ e?

¹⁷ E me̱nde̱ pula ná be̱se̱ bena ba pumbo, e be̱ bate̱m ná sim to̱ basite̱m ná sim, ba we̱le̱ o ebolo mambenda mena ma me̱nde̱ so̱be̱ o kalat’a peńa yena i me̱nde̱ telame̱ o pond’a Janea la 1000 mbu. Ńamuloloma Yohane a tele̱ye̱ nje e̱nno̱, mo̱ ná: “Na mba ne̱ne̱ bawedi, bande̱ne̱ na basadi, ba te̱m oboso ba bejedi, nde kalati i ta i telame̱; kalati nipe̱pe̱ pe̱ e ta e telame̱, ńena ńe nde kalat’a longe̱. Nde bawedi ba ta ba kaisabe̱ kaponda bebolo babu bupane̱ mambo ma tilabe̱ o yi kalati.”​—Bbī. 20:12, 13.

¹⁸ Bupisane̱ njika bebolo ba bena ba me̱nde̱ pumbwabe̱le̱ ba me̱nde̱no̱ kaisabe̱ e? Ba me̱nde̱ nde kaisabe̱ bupisane̱ nje ba bolino̱ obiana ba mawo̱ e? Ke̱m! O si dimbea ná myobe mena ba bolino̱ obiana ba mawo̱ mi lakisabe̱. Ońola nika nde “bebolo babu” be titino̱ ná be be̱ nje ba bolino̱ obiana ba mawo̱. O diwengisan, be bebolo be nde mambo ba me̱nde̱no̱ bola ombusa babo̱ jokwabe̱le̱ o was’a peńa. To̱ bato ba jemea ka Noa, Samuel, David na Daniel, pe̱ bangame̱n jokwa mambo jombwea Yesu Kristo, na lee̱le̱ pe̱ dube̱ labu o diko̱ti. Ngedi ininga so̱ na basite̱m na sim e!

19. Nje e me̱nde̱ po̱ye̱ ba bena mina ma si me̱nde̱no̱ so̱be̱ o kalat’a longe̱ e?

¹⁹ Nje e me̱nde̱ po̱ye̱ be̱se̱ bena mina ma si me̱nde̱no̱ so̱be̱ o kalat’a longe̱ e? Bebīsedi 20:15 mo̱ ná: “Moto te̱ nu si so̱be̱ dina o kalat’a longe̱ a ta a pimbabe̱ o ebud’a wea.” E, ba me̱nde̱ bumbisabe̱ o bwindea. Ye so̱ mweńa ná di bole me̱se̱ ná mina masu ma tilabe̱ o kalat’a longe̱, ma benge pe̱ so̱be̱ oten!

20. Njik’ebol’a muńe̱nge̱ e me̱nde̱ be̱ o pond’a Janea la ikol’a mbu e? (Ombwa duta la dipapa laboso.)

²⁰ E se̱ pond’a muńe̱nge̱ Janea la ikol’a mbu di me̱nde̱no̱ be̱ e! Ebol’a belēdi yena e s’e̱ne̱ne̱ o wase ńe̱se̱ e me̱nde̱ be̱. E me̱nde̱ pe̱ nde be̱ ponda ńena bedangwedi ba bate̱m ná sim na basite̱m ná sim be me̱nde̱no̱ we̱le̱be̱ o kekise̱. (Yes. 26:9; Bebolo 17:31) Ne̱ni y’ebol’a belēdi e me̱nde̱no̱ tomba e? Jokwa di mabupe̱ di me̱nde̱ jongwane̱ biso̱ o so̱ṅtane̱ na bwane̱ pe̱ be bete̱sedi muńe̱nge̱.