Di si be̱n njo̱m to̱ po̱ o jo̱nge̱le̱ ná kana 70 ma bokwedi ba s’ukedino̱ o Da la Sango ponda Yesu a te̱se̱no̱ mo̱, Yesu a si ta pe̱ a do̱lisane̱ babo̱ to̱ ná ba caki mo̱. Yesu a ta nde a pula be̱ na 12 lao la bamuloloma o ni ponda.

E be̱ 12 to̱ 70 babo̱ be̱se̱ ba ta nde bokwedi ba Yesu. Yesu a se̱le̱ nde po̱so̱ oteten a bokwedi bao be̱se̱ 12 la bome, bena a be̱le̱no̱ ná bamuloloma. (Lukas 6:12-16) A ta nde o Galilea ponda a ‘be̱le̱no̱ dom na baba’ na mo̱ a “loma babo̱ o langwa janea la Loba na o bo̱lise̱ maboa.” (Lukas 9:1-6) Ombusa ponda o Yudea, Yesu a ‘po̱si musamba ma bape̱pe̱, na mo̱ a loma babo̱ baba-baba.’ (Lukas 9:51; 10:1) Yesu a ta so̱ a be̱ne̱ bokwedi o bepolo jita mwe̱ndi mao mu tano̱ mu te̱be̱.

Yen ebe, Bonayuda bena ba timbi bokwedi ba Yesu ba ta pe̱te̱ ba dia be o bolise̱ Pasa mwemba na mbia mabu. (Bbu. 12:6-11, 17-20) Kana ponda kwed’ao e tano̱ e nisisea, Yesu na bokwedi bao ba ta o Yerusalem. Nde a si baise̱ bokwedi bao be̱se̱ ba—Yudea, Galilea, na Perea ná ba ye bolise̱ Da la Sango mwemba. E me̱ne̱ne̱ so̱ ná bwē ná Yesu a ta nde a pula be̱ na bamuloloma bao o ni ponda. A langwedi babo̱ ná: “Na ta ńo̱ngi bwambi o da nin Pasa mwemba na bińo̱, obiana na makusa ndenge̱.”—Lukas 22:15.

Yesu a ta a be̱ne̱ njo̱m a bwam o bola nika. Yesu a wusa wo̱ son a ponda ka “Mun’a mudo̱ngi ńa Loba, nu masumwe̱ bobe ba wase.” (Yohane 1:29) A ta nde angame̱n wo̱ o Yerusalem, owe̱ni ba tano̱ ba bola Loba mabea etum a ponda. Kwed’a Yesu e wusa wana wonja ni buki ni ńena mbia ma Bonairsael mi kusino̱ ponda ba dedino̱ mudo̱ngi bo bulu ba busino̱ o Egipto. (1 Kor. 5:7, 8) Nje Yesu a bolino̱, e boli dom la bamuloloma na baba epolo o be̱ dongo diwo̱ la eyot’a mwemba ma kriste̱n. (Efe. 2:20-22) Je pe̱ ná di maka ná, Yerusalem mundi ma bosangi mu be̱n “dom la madale m’eyoto na maba” mena ma be̱n “dom la mina na maba ma dom la bamuloloma na baba ba Mun’a mudo̱ngi,” ma tilabe̱ omo̱ń abu. (Bbī. 21:10-14) E, bamuloloma ba jemea ba wusa be̱ne̱ dongo la mweńa o belondisedi ba jemea la Loba. Je so̱ ná di so̱ṅtane̱ ońola nje Yesu a tano̱ a pula ná ba be̱ na mo̱ o Pasa nisukan na ońola nje e wusa bupe̱ dibokime̱ne̱—Da la Sango.

70 ma bokwedi na bane̱ bokwedi ba si ta o Da la Sango na Yesu. Nde, bokwedi be̱se̱ bena ba lee̱le̱ ná be jemea ba wusa kusa tombwane̱ lena Da la Sango Yesu a te̱se̱no̱ di wusano̱ wanea babo̱. Bokwedi be̱se̱ bena ba timbi kriste̱n yo̱kisabe̱ yingedi o male ońola janea, mena Yesu a kwaledino̱ na bokwedi bao y’ebiamu.—Lukas 22:29, 30.