Mo̱ o no̱ngi ponda o langa Njongo a Betatedi i tombi e? Ombwa te̱ nga we ná walabe̱ myuedi mi bupe̱:

Nje di matombwane̱no̱ ke̱ di tombise̱ ponda o kwala na Yehova, o sengane̱ mo̱ na o dutea ońol’ao e?

Di me̱nde̱ no̱ngo̱ bedomsedi ba bwam, di be̱ balēdi ba bwam, dube̱ lasu di bata joua, ndolo di be̱nedino̱ Yehova pe̱ e bata be̱ ngińa.—w22.01, map. 30-31.

Ne̱ni di me̱nde̱no̱ tombwane̱ yete̱na joko o lakisane̱ Yehova na ba bena a mabolane̱no̱ e?

Di malee̱ o nin we̱nge̱ ná je o jokwa lakisane̱ mbadi Yehova a mabolano̱ mambo ke̱ di si mato̱kisane̱ bediedi na bedomsedi bena batudu ba mano̱ngo̱no̱. O ponda ndenge̱ ninde̱ne̱, di me̱nde̱ pomane̱ bupe̱ bediedi di makusano̱, to̱ be̱ne̱ne̱ nde biana be si te̱nge̱n to̱so̱ ná be titi dibie̱.—w22.02, map. 4-6.

Nje ange̱l e tano̱ e pula kwala ponda e to̱pino̱ ońola “dipito la dime̱ne̱ o dia la Serubabe̱l” e? (Sak. 4:8-10)

Di je̱ne̱ di boli tumba la Loba mbaki ná ebol’a longa la ni tempe̱l ni ta ńe̱ne̱ne̱ eye̱me̱ki e me̱nde̱ po̱ o su, na ná e me̱nde̱ pe̱ be̱ kaponda mame̱ne̱ ma Loba.—w22.03, map. 16-17.

Ne̱ni jeno̱ ná di be̱ “eyembilan . . . o byala e”? (1 Tim. 4:12)

O dikalo lasu, di mabolane̱ byala ba muyao na bena be malee̱le̱ edube, di malo̱ngo̱ myenge na mulema mwe̱se̱ di bola pe̱ malabe̱ ponda te̱ o ndongame̱n, di mato̱po̱ mbale̱, jouse pe̱ dube̱ la bane̱, nde di banga pe̱ bolane̱ byala ba bobe.—w22.04, map. 6-9.

Ońola nje byemban ba ńama ine̱i (manea) kalat’a Daniel bepasi 7 e makwaleano̱ be mombweano̱ nde mulemlem ma ńama ni kwalabe̱ o Bebīsedi 13:1, 2 e?

Ńama ńena kalat’a Bebīsedi bepasi 13 e makwaleano̱ e titi janea l’ekombo diwo̱ buka te̱, ka Roma. O diwengisan, ńe nde manea ma politik me̱se̱ mena me o janeye̱ mbel’a moto nate̱na bon ba we̱nge̱.—w22.05, dip. 9.

Ne̱ni lee̱le̱ ná di lakisane̱ te̱me̱ la sim la Loba na mulema mwe̱se̱ e?

Moto a lou te̱ biso̱, a wusane̱ te̱ biso̱ to̱ bolane̱ biso̱ lambo la bobe, di mabola me̱se̱ ná di si jane̱ malinga to̱ pimbimbi, di mabake̱ pe̱ mambo me̱se̱ o mā ma Yehova. A me̱nde̱ bo̱le̱ nje ye̱se̱ bobe bo wanno̱.—w22.06, map. 10-11.

Nje munasango ba mabaise̱no̱ ná a kane̱ o ndongame̱n a mwemba a s’angame̱nno̱ dimbea e?

Ponda muka e titi ponda bola la mwemba malea, to̱ bola mibia. E titi so̱ eto̱m o bolane̱ “byala ba jita,” tobotobo o bebo̱tedi ba ndongame̱n. (Mat. 6:7)—w22.07, map. 24-25.

O njika mbadi “ba bena ba boli bobe” ba me̱nde̱no̱ pumbwabe̱le̱ ońola “bepumbwedi ba muka” e? (Yohane 5:29)

Ba si me̱nde̱ ko̱kisabe̱ bupisane̱ mambo ba bolino̱ obiana ba mawo̱. Ba me̱nde̱ nde kaisabe̱ bupisane̱ ebe̱yed’abu na mambo ba me̱nde̱no̱ bola ombusa bepumbwedi babu.—w22.09, dip. 18.

Njika jome̱le̱ di tute̱le̱ o ebolo munasango Rutherford a bolino̱ o jako̱to̱ne̱ dinde̱ne̱ la Ńe̱te̱ki 1922 e?

O jako̱to̱ne̱ di ta o Cedar Point, o Ohio, o Amerika, a kwali ná: “Kiṅe̱ e o janea! A po̱si bińo̱ ná lo langweye bato be̱se̱ nika. Ońola nika so̱, bīse̱, bīse̱, bīse̱ Kiṅe̱ na Janea lao!”—w22.10, map. 3-5.

Bupisane̱ bepasi 30 ba kalat’a Yesaya, na njika mambo malalo Yehova a mongwane̱no̱ biso̱ o lembe̱ e ?

Y’epasi e malee̱ ná (1) Yehova a masenga mika masu, a malabe̱ pe̱ mo̱, (2) a mabola biso̱ bediedi, na (3) a manamse̱ biso̱ o nin we̱nge̱ a me̱nde̱ pe̱ bola nika o kie̱le̱ ni maye̱.—w22.11, dip. 9.

Nje e matute̱le̱ biso̱ o kwala ná byala ba Myenge 37:10, 11, 29 be kusi belondisedi o mińa mi tombi, be me̱nde̱ pe̱ kusa belondisedi o kie̱le̱ ni maye̱ e?

Byala ba David be malee̱ minam mena tumba la Israel di kusino̱ o mińa mi tombi, k’eyembilan o pond’a janea la Salomo. Yesu a kwaledi ońola minam mi me̱nde̱ be̱ o Paradisi na mo̱ a kika myemba 11. (Mat. 5:5; Lukas 23:43)—w22.12, map. 8-10, 14.