1. Nje bato bō̱ ba mo̱nge̱le̱no̱ jombwea be̱ la longe̱ o bwindea e?

 BATO jita ba mombwea nje ba madano̱, ba matuna pe̱ ńolo ponda ye̱se̱ ná ba be̱ne̱ ja la bwam. Nde ba bi ná nik’e si me̱nde̱ bola ná ba be̱ longe̱ o bwindea. Moto e ná o̱nge̱le̱ ná nik’e titi ná e bolane̱, e pe̱ ná a si pule di longe̱ ońola mitakisan mena bodun bo mawanano̱. Nde Yesu a kwali ná bato ba benama be ná ba be̱ne̱ “longe̱ la bwindea,” ka nje te̱ kalat’a Yohane 3:16 na 5:24 ba makwalano̱.

2. Nje Yohane bepasi 6 e makwalano̱ jombwea longe̱ la bwindea e? (Yohane 6:39, 40)

² Buńa bō̱, Yesu a boli lokoli la bato ewolo na sue o mbad’a betańsedi. a Nik’e ta mańaka nde nje a kwalino̱ buńa bo bupe̱ e ta e ńakisane̱ buka nika. Dimuti di bupe̱ mo̱ o Kapernaum, be̱be̱ na Galilea, owe̱ni a langwedino̱ babo̱ ná bato be ná ba pumbwabe̱le̱, ba be̱ne̱ pe̱ longe̱ la bwindea. (Langa Yohane 6:39, 40.) Keka te̱ dutea nje nik’e mapulano̱ kwala ońola mako̱m mo̱ngo̱ na belongi bo̱ngo̱ ba mbia bena ba wedi. Nje Yesu a kwalino̱ e mabola wa mbaki ná jita la ba bena ba wedi ba me̱nde̱ pe̱te̱ be̱ longe̱, nika  ná wa na bandolo bo̱ngo̱ lo me̱nde̱ bwane̱ longe̱ la bwindea muńe̱nge̱. Nde, e ta bato jita ndutu o so̱ṅtane̱ byala bepe̱pe̱ Yesu a kwalino̱ o Yohane̱ bepasi 6. Jombweye ná pe̱ńe̱pe̱ńe̱ nje a kwalino̱.

3. Bupisane̱ Yohane 6:51 nje Yesu a kwalino̱ jombwea mo̱me̱ne̱ e?

³ Dimuti di ta o Kapernaum le̱n mulatako mwe oteten a bewolo bena Yesu a bolino̱ babo̱ na mana mena Yehova a bolino̱ bana ba Israel ponda ba tano̱ o eyaṅ. Betiledi be mabele̱ mana ná “bewolo be wu o mo̱ń.” (Mye. 105:40; Yohane 6:31) Yesu a bolane̱ mambo mō̱ mena dimuti ti tano̱ di bia jombwea mana o jokwe̱le̱ babo̱ lambo diwo̱ la mweńa. To̱ná mana ma tano̱ da lena Yehova a bolino̱ o mbad’a betańsedi, ba bena ba dedi mo̱ ba si ta pe̱ longe̱. (Yohane 6:49) O diwengisan, Yesu a kwali ná e nde “ewol’a mbale̱ e mawe̱ o mo̱ń,” “ewol’a Loba,” na “ewol’a longe̱.” (Yohane 6:32, 33, 35) Yesu a teleye̱ diwengisan la tobotobo di ta oteten a mo̱ na mana. A kwali ná: “Mba nde ne ewol’a longe̱ e wu o mo̱ń. Moto a dedi te̱ yen ewolo, a mabe̱ longe̱ nate̱na o bwindea.” (Langa Yohane 6:51.) Ba bato ba Bonayuda ba ta ba ńaka. Ba si ta ba we̱le̱ so̱ṅtane̱ ne̱ni Yesu a tano̱ a kwala ná e nde ewolo e wu o mo̱ń o po̱ o wase, na ná y’ewolo e buki mana mena Yehova a tano̱ a bola basango babu o mbad’a betańsedi. Yesu a kwali lambo diwo̱ la mweńa o jongwane̱ babo̱ o so̱ṅtane̱: “Nde ewolo mba na mabolano̱ ye nde ńol’am.” Nje nik’e tano̱ e pula kwala e? Ye mweńa ná di so̱ṅtane̱ nje nik’e tano̱ e pula kwala ońolana jalabe̱ di malee̱ ne̱ni biso̱ na bandolo basu jeno̱ ná di be̱ne̱ longe̱ la bwindea. Jombweye so̱ nje Yesu a tano̱ a pula kwala.

EWOL’A LONGE̱ NA ŃOL’AO

4. Ońola nje byala ba Yesu be tano̱ be tańse̱ bato bō̱ e?

⁴ Bato bō̱ bena ba sengi byala ba Yesu ba ta ba tańa jita o senga ná a me̱nde̱ bola ‘ńol’ao ońola longe̱ la wase.’ Yen ebe bo̱nge̱le̱ nde ná a puli ná ba de ńol’ao na mbale̱. (Yohane 6:52) Byala bepe̱pe̱ Yesu a kwalino̱ be bati o tańse̱ babo̱. Mo̱ ná: “Yete̱na lo si dedi ńam’a Mun’a moto, lo ńo̱ pe̱ maya mao, ke̱ lo si mabe̱ne̱ longe̱ oteten ańu.”—Yohane 6:53.

5. Ońola nje jeno̱ ná di be̱ mbaki ná Yesu a si ta a pula kwala ná bato bangame̱n ńo̱ maya mao na mbale̱ e?

⁵ O mińa ma Noa, Loba a ta a langwea bato ba benama ná ba si da maya. (Bbot. 9:3, 4) Ombusa ponda, Yehova a boli pe̱te̱ Bonaisrael mbenda ná ba si da maya. To̱ nja nu dedi maya a wusa nde ‘bo̱ na tumba.’ (Lev. 7:27) Yesu okwe̱le̱ Bonayuda ná ba sengane̱ nje ye̱se̱ Loba a bolino̱ babo̱ o mbenda. (Mat. 5:17-19) A si wusa so̱ langwea dimuti la Bonayuda ná ba de ńam’ao to̱ ńo̱ pe̱ maya mao. Nde, tongwea na be byala a to̱pino̱, Yesu a ta a pula jokwe̱le̱ bato ne̱ni beno̱ ná ba be̱ne̱ longe̱—“longe̱ la bwindea.”—Yohane 6:54.

6. O njika mbadi jangame̱nno̱ so̱ṅtane̱ byala ba Yesu jombwea da la ńol’ao na ńo̱ pe̱ maya mao e?

⁶ Njika belēdi Yesu a tano̱ a pula bonde̱ e? E me̱ne̱ne̱ ná bwē ná, Yesu a ta nde a to̱po̱ o mbad’edinge̱dinge̱, kane̱ni a bolino̱ ponda a kwalane̱no̱ mut’a Samaria ná: “Nde nu nu mańo̱ ma madiba mba na mabolano̱ mo̱ a si me̱nde̱ pe̱ bwa ńo̱ngi nate̱na o bwindea; nde ma madiba mba na mabolano̱ mo̱ ma mabe̱ tongo a madiba oteten ao, mena ma mabuse̱ wala o longe̱ la bwindea.” (Yohane 4:7, 14) b Yesu a si ta a kwala ná nu mut’a  Samaria a wusa nde ńo̱ tet’a madiba nde a kusa longe̱ la bwindea. Mulemlem pe̱, a si ta a kwala ná dimuti a kwalisane̱no̱ o Kapernaum di me̱nde̱ be̱ longe̱ o bwindea yete̱na di dedi ńam’ao di ńo̱ pe̱ maya mao ma mbale̱.

NGEDI NIPE̱PE̱ YESU A TO̱PINO̱ O MBAD’EDINGE̱DINGE̱

7. Nje bato bō̱ ba makwalano̱ jombwea byala ba Yesu be o Yohane 6:53 e?

⁷ Bato b’ebasi bō̱ ba makwala ná byala ba Yesu be maso̱be̱ o Yohane 6:53 jombwea da la ńam’ao na ńo̱ pe̱ maya mao, be nde patan a Da la Sango ońolana a bolane̱ nde mulemlem ma byala. (Mat. 26:26-28) Ba kwali ná nu ńena nu mukeye̱ o da la Sango angame̱n da ewolo na ńo̱ wań ba matombise̱no̱ oteten a bukedi. Mo̱ nik’e te̱nge̱n e? Ye mweńa ná di wase so̱ṅtane̱ nga ba te̱nge̱n to̱ ke̱m ońolana mbu te̱ lodun la bato o wase ńe̱se̱ ba mukea na biso̱ bo buńa. Di me̱nde̱ je̱ne̱ mawengisan mande̱ne̱ oteten a nje e tilabe̱ o Yohane 6:53 na nje Yesu a kwalino̱ o Da la Sango y’ebiamu.

8. Njika mawengisan mō̱ me oteten a be bete̱medi bebā e? (Ombwa pe̱ maduta.)

⁸ Jombweye mawengisan mabā me o be bete̱medi bebane̱. Laboso, owe̱ni na suninga Yesu a to̱pino̱ byala be tilabe̱ o Yohane 6:53-56 e? A ta nde a kwalisane̱ dimuti la  Bonayuda o Galilea o mbu 32 P.A. Nik’e ta lambo ka mbu mō̱ obiana a matese̱ Da la Sango o Yerusalem. Di londe̱ mabā, ba nja be byala be tano̱ bombwea e? Jita la basengedi bao o Galilea ba ta nde bombwea ńo̱ng’abu ń’eyobo o mulopo ma jombwea ńo̱ng’abu ńa mudī. (Yohane 6:26) Ponda Yesu a langwedino̱ babo̱ lambo lena di ta babo̱ ndutu o so̱ṅtane̱, ba pomane̱ nde bo̱lo̱ne̱ dube̱ ba tano̱ ba be̱ne̱ye̱ mo̱. Bokwedi bao bō̱ mo̱me̱ne̱ pe̱ bembe̱ o bupe̱ mo̱. (Yohane 6:14, 36, 42, 60, 64, 66) Kobisane̱ bo buńa na nje e tombi mbu mō̱ ombusa ponda niponda Yesu a bolise̱no̱ Da la Sango. Bo buńa, 11 bamuloloma bao ba jemea ba ta na mo̱ to̱ na ne̱ni ba si tano̱ ba so̱ṅtane̱ o mususu mwe̱se̱ nje a tano̱ okwe̱le̱ babo̱. Nde, o diwengisan na bato ba Galilea, ba muloloma bao ba jemea ba ta mbaki ná Yesu a ta nde Mun’a Loba ńena nu wu o mo̱ń. (Mat. 16:16) A sesi babo̱ ná: “Nde bińo̱ nde le ba bena ba tingam na mba o pond’am ńa kekisabe̱.” (Lukas 22:28) Ma mawengisan mabā ma malee̱ ná o Yohane 6:53, Yesu a si ta a keka teleye̱ nje e ta yangame̱n tombe̱ o Da la Sango. Mambo mape̱pe̱ me ma malee̱ nika.

NE̱NI BYALA BA YESU BE MOMBWEANO̱ WA

9. Ba nja byala bena Yesu a to̱pino̱ o Da la Sango be mombweano̱ e?

⁹ Niponda ba tano̱ ba bolise̱ Da la Sango, Yesu a boli bamuloloma bao ewolo e si pungwan esasange nde a langwea babo̱ ná ye nde eyemban a ńol’ao. Na mo̱ a bola babo̱ wań a kwala ná be nde eyemban a “male ma peńa o maya man.” (Marko 14:22-25; Lukas 22:20; 1 Kor. 11:24) Nje a kwalino̱ jombwea male ye mweńa jita. Male ma peńa ma mombwea nde “ndabo a Israel [ńa mudī]”—ni me̱nde̱ be̱ “o Janea la Loba”—seto̱ na mbel’a moto ńe̱se̱. (Bon. 8:6, 10; 9:15) Bamuloloma ba si so̱ṅtane̱ mambo me̱se̱ jombwea male o niponda, nde ombusa ponda ba me̱nde̱ jo̱kisabe̱ na mudī musangi nde bingea o male ma peńa o be̱ na Yesu o mo̱ń.—Yohane 14:2, 3.

10. Njika diwengisan dipe̱pe̱ le oteten a nje Yesu a to̱pino̱ bo bulu ba Da la Sango na nje a kwalino̱ o Galilea e? (Ombwa pe̱ duta.)

¹⁰ Di make ná y’ebiamu ya Da la Sango, Yesu a ta nde a kwalisane̱ “dibemba disadi.” Bato baboso ba di dibo̱to̱ disadi ba ta nde bamuloloma bao ba jemea bena ba ta na mo̱ o ni tuṅ. (Lukas 12:32) Babo̱ na bato bape̱pe̱ bena ba wusa be̱ o di dibo̱to̱ nde ba ta bangame̱n da ewolo na ńo̱ wań. Babo̱ nde ba me̱nde̱ be̱ na Yesu o mo̱ń. Nje Yesu a langwedino̱ bamuloloma bao o ben bete̱medi ye diwengisan na nje a langwedino̱ dimuti o Galilea. Byala bao be ta bombwea dimuti la bato dinde̱ne̱.

11. Nje e malee̱ o byala Yesu a kwalino̱ o Galilea ná a si ta a kwalea ońola ngusu i po̱so̱be̱ buka te̱ e?

¹¹ Ke̱ Yesu e o Galilea o mbu 32 P.A., a ta kwalisane̱ Bonayuda bena ba ta ba pula buka te̱ ná a bole babo̱ da. To̱ na nika, ongwane̱ babo̱ o so̱ṅtane̱ ná lambo diwo̱ la mweńa le lena di buki da, lambo lena di me̱nde̱ bole̱ babo̱ longe̱ la bwindea. Yesu a kwali pe̱ ná ba bena ba wedi be ná ba pumbwabe̱le̱ o buńa bosukan nde ba be̱ longe̱ o bwindea. A si ta a kwalea ońola ngusa bato ba po̱so̱be̱, ka nje a bolino̱ ombusa ponda o bolise̱ la Da la Sango. O diwengisan, o Galilea a bonde̱ nde minam mena bato be̱se̱ ba me̱nde̱no̱ kusa. Ońola nika nde a kwalino̱ ná: “Moto a dedi te̱ yen ewolo, a mabe̱ longe̱ nate̱na o bwindea. Nde ewolo  mba na mabolano̱ ye nde ńol’am ńena na me̱nde̱no̱ bola ońola longe̱ la wase.”—Yohane 6:51. c

12. Nje moto angame̱nno̱ bola ná a tombwane̱ minam Yesu a kwaledino̱ e e?

¹² Yesu a si langwedi Bonayuda ba Galilea ná moto te̱ nu ta longe̱ to̱ nu me̱nde̱ yabe̱ nde a me̱nde̱ kuse mi minam. Buka te̱ ba bena ba ‘made̱ y’ewolo,’ nika ńe nde ná ba ba malee̱le̱ dube, nde ba me̱nde̱ tombwane̱ mi minam. Bato jita bena ba makwale̱ ná be kriste̱n ba mo̱nge̱le̱ ná ba me̱nde̱ sungabe̱ buka te̱ yete̱na ba dube̱ Yesu bemba pe̱ mo̱ ka musunged’abu. (Yohane 6:29) Be̱ne̱ la dube̱ di si dongame̱ne̱. Bō̱ oteten a dimuti di ta o Galilea ba se̱le̱ dube̱ Yesu, nde ba caki mo̱ ombusa ponda. Ońola nje ba bolino̱ nika e?

13. Nje moto angame̱nno̱ bola ná a be̱ mokwed’a Yesu ńa mbale̱ e?

¹³ Jita oteten a dimuti lena Yesu a dese̱no̱ ba ta muńe̱nge̱ o bupe̱ mo̱ etum te̱ a tano̱ a bola babo̱ nje ba tano̱ ba pula. Ba ta nde ba pula ná a bo̱lise̱ maboa mabu, a bole babo̱ da, a langweye pe̱ babo̱ nje ba tano̱ ba pula senga. Nde, Yesu a lee̱ ná bwē ná a si po̱i o wase buka te̱ o londise̱ ńo̱ng’abu ń’eyobo. A po̱i nde o lee̱ babo̱ nje bangame̱nno̱ bola o be̱ bokwedi bao ba mbale̱. Ba ta bangame̱n ‘po̱ na mo̱’ nika ńe nde ná kasa na bupe̱ pe̱ nje ye̱se̱ a tano̱ okwe̱le̱ babo̱.—Yohane 5:40; 6:44.

14. Nje jangame̱nno̱ bola ná di be̱ne̱ tombwane̱ ńol’a Yesu na maya mao ba mawanano̱ e?

¹⁴ Yesu okwe̱le̱ babo̱ ná tongwea na bola  ńol’ao na maya mao ka diko̱ti, a boli ná ba be̱ne̱ epolo o be̱ne̱ longe̱ la bwindea. Ba ta bangame̱n dube̱ nika. Di dube̱ di ta mweńa ońola Bonayuda, le pe̱ mweńa ońol’asu we̱nge̱. (Yohane 6:40) Nje so̱ Yesu a kwalino̱ o Yohane 6:53 e mapula nde kwala ná jangame̱n lee̱le̱ ná di dube̱ diko̱ki ná di kuse longe̱ la bwindea. Dimuti la bato dinde̱ne̱ di be̱n epolo o tombwane̱ mi minam.—Efe. 1:7.

15-16. Njika mambo ma mweńa jokono̱ o Yohane bepasi 6 e?

¹⁵ Myango ma Bibe̱l mena me o Yohane bepasi 6 me mweńa jita ońol’asu na bandolo basu. Mi mokwe̱le̱ biso̱ ná Yesu a to̱ndi bato jita. O Galilea, a bo̱le̱ baboedi, okwe̱le̱ bato mambo jombwea Janea la Loba, a bola pe̱ me̱se̱ ná mamuti ma kuse da. (Lukas 9:11; Yoh 6:2, 11, 12) Nje ye mweńa buka me̱se̱, okwe̱le̱ babo̱ ná e nde “ewol’a longe̱.”—Yohane 6:35, 48.

¹⁶ Ba bena a bele̱no̱ ná “mido̱ngi mipe̱pe̱” ba si mada, ba s’angame̱n da ewolo na wań o buńa ba Da la Sango lena le ngedi po̱ ońola mbu. (Yohane 10:16) Nde babo̱ pe̱ ba makusa tombwane̱ ońola ńolo na maya ma Yesu. Ba mabola nika tongwea na lee̱le̱ ná ba dube̱ jabea la diko̱ti la Yesu na mambo ma betańsedi di jabea di mawanano̱. (Yohane 6:53) O diwengisan, ba bena ba made̱ ewolo na ńo̱ pe̱ wań ba malee̱ nde ná be nde dongo diwo̱ la male ma peńa na ná ba be̱n dipita la janea o mo̱ń. E be̱ ná je bo̱kisabe̱ to̱ mido̱ngi mipe̱pe̱, myango ma kalat’a Yohane̱ bepasi 6 me mweńa jita ońol’asu. Mi mokwe̱le̱ biso̱ mweńa ma lee̱le̱ dube̱ ná di be̱ne̱ longe̱ la bwindea.