Mo̱ o no̱ngi ponda o langa Njongo a Betatedi ya mun mbu mu tombi e? Ombwa te̱ nga we ná walabe̱ myuedi mi mabupe̱:

Njika eyembilan Yehova a bolino̱ ońola jombwea la bito e?

A si malee̱le̱ babo̱ ndando, a si manamse̱ bome buka bito. Loba a malambe̱ye̱ bito to̱i, a mombwea besengedi babu na mitakisan ba be̱nno̱. A lakisane̱ pe̱ babo̱ ná be ná ba bola ebol’ao.—w24.01, map. 15-16.

Ne̱ni jeno̱ ná di we̱le̱ kalat’a Efeso 5:7 ni makwale̱ ná: “Lo si be̱ne̱ so̱ jalatane̱ na babo̱” o ebolo e?

Ńamuloloma Paulo a ta nde ome̱le̱ biso̱ ná di si be̱ne̱ jalatane̱ na bato bena be ná ba bola ná e be̱ biso̱ ndutu o tingame̱ na bete̱sedi ba Loba. Din jalatane̱ lena di si te̱nge̱n di mombwea bato di makwalisane̱no̱ boso na boso name̱ne̱ pe̱ na ba bena di be̱nno̱ makwalisane̱ o milongwa ma bekwali o internet.—w24.03, map. 22-23.

Na Njika myango ma mpo̱ṅ jangame̱nno̱ no̱ngo̱ jangame̱n e?

Jangame̱n no̱ngo̱ jangameye̱ na myango di titino̱ mbaki mi mawe̱ na mako̱m masu mena ma be̱n mo̱nge̱le̱ ma bwam, mye̱ndi ma internet mi mawe̱ na bato di si bino̱, to̱ na ba bena ba to̱bi dube̱ la mbale̱ ba mabole̱ biana ba to̱ndi mbale̱.—w24.04, dipapa. 12.

Nje di bino̱ nje pe̱ di si bino̱ jombwea ne̱ni Yehova a me̱nde̱no̱ kaise̱ Kiṅe̱ Salomo name̱ne̱ pe̱ na bato ba wedi o Sodom na Gomora na o mpupe e?

Di titi mbaki nga Yehova a domse̱ nde ná ba me̱nde̱ kusa ko̱kise̱ la bwindea. Nde, di bi ná a bi mambo me̱se̱ jombwea ekwali ewo̱, a be̱n pe̱ ndedi ninde̱ne̱.—w24.05, map. 3-4.

Nika Loba a mabelabe̱no̱ ná “Dale” njika mbaki nik’e mabolano̱ biso̱ e? (Ndim. 32:4)

Je ná di wasa diwutamea ombasanedi ma Yehova. Je ná di lakisane̱ mo̱, a malondise̱ makaki mao ponda ye̱se̱. A si matukwa, a si matukwa bede̱mo bao na myano mao.—w24.06, map. 26-28.

Nje ye ná yongwane̱ biso̱ o ko̱lo̱ngo̱ne̱ mwemba ma peńa e?

Pite̱ na Yehova, ńena nu me̱nde̱ jongwane̱ wa kane̱ni ongwane̱no̱ baboledi bao o mińa mi tombi. O si kobisane̱ mwemba mo̱ngo̱ ma peńa na ma kwaṅ. No̱ngo̱ dongo o bebolo ba mwemba mo̱ngo̱ ma peńa, po̱ngo̱ pe̱ miwe̱n o be̱ne̱ mako̱m ma peńa.—w24.07, map. 26-28.

Nje di mokwano̱ na minia milalo mi maso̱be̱ o kalat’a Mateo 25?

Munia ma mido̱ngi na mbodi mu mabonde̱ mweńa ma be̱ jemea. Munia ma ngo̱nded’a jemea na y’elemā mu malee̱ mweńa ma bonsane̱ na be̱ epe̱ńe̱. Munia ma talent pe̱ mu malee̱ mweńa ma be̱ ngiń’ebolo na jangwa.—w24.09, map. 20-24.

Nate̱na njika dikala dibe̱pe̱ la tempe̱l a Salomo di tano̱ jasame̱ e?

O 2 Myango 3:4, m’bo̱m ma kalati mō̱ ma kwaṅ mi makwala ná “120 ma mabo̱ngo̱,” nje e mabole̱ 53 ba meta ma jasame̱. Nde m’bo̱m ma kalati mipe̱pe̱ bato ba lakisane̱no̱ mi makwala nde “20 ma mabo̱ngo̱,” nje e mabole̱ meta dibua ma jasame̱. Din dime̱ne̱ disukan le nduta na tindame̱ la bedima ba tempe̱l.—w24.10, dipapa. 31.

Nje be̱ la ‘mom’a muto mō̱’ di mapulano̱ kwala ońola muboledi e? (1 Tim. 3:12)

Nik’e mapula nde kwala ná a bai nde muto mō̱ na ná a s’angame̱n wite̱ musonje. Mbata na nika, a s’angame̱n jombwea muto nupe̱pe̱ o mbadi ni si te̱nge̱n.—w24.11, dipapa. 19.

Ońola nje jeno̱ ná di kwala ná kalat’a Yohane 6:53 e titi patan o bupe̱ ońola Da la Sango e?

Yohane 6:53 e makwalea nde ońola mweńa ma da ńol’a Yesu na maya mao. Yesu a to̱pi nde be byala o 32 P.A., o Galilea, ońola Bonayuda bena ba ta bangame̱n dube̱ mo̱. Nde, Da la Sango mo̱ di bokisabe̱ nde mbu mō̱ ombusa ponda o Yerusalem. Oten Yesu a kwalisane̱ nde ba bena ba me̱nde̱ janeye̱ mwemba na mo̱ o mo̱ń.—w24.12, map. 10-11.