Bedinge̱ bō̱ be o yen ebambu be mato̱pea nde mambo ma bolane̱ o mulemlem ma ponda. Be malee̱ o mbadi jita ná jā nde o “pond’a sukan.”​—Dan. 12:4.

• Epasi(be) Bbī. 11:7; 12:13, 17; 13:1-8, 12

  Edinge̱ Ye buka 3 000 la mimbu we̱nge̱ “ńama” ńeno̱ janea bato o mundi ma wase. O pond’a sukan, mulopo mao mu londe̱ samba mu kusi ebango. Ombusa ponda mu mulopo mu bo̱lisabe̱, na “wase ńe̱se̱” e bupe̱ ni ńama. Satan a mabolane̱ ni ńama o ‘janane̱ ebindi.’

  Belondisedi Ombusa Mpupe, manea mena ma mate̱nge̱ne̱ Yehova ma botedi janea bato. Buka 3 000 la mimbu ombusa ponda, o pond’a bila baboso, Janea la Inglisi di bo̱lo̱ne̱ dongo dinde̱ne̱ la ngiń’ao. Di kusi pe̱te̱ nde ngińa ponda di latino̱ na Amerika. Tobotobo o pond’a sukan, Satan a mabolane̱ manea me̱se̱ me o wase o takise̱ tumba la Loba.

• Epasi(be) Dan. 11:25-45

  Edinge̱ O pond’a sukan, kiṅ’a pongo na kiṅ’a mikondo i mana po̱ te̱ te̱nge̱ne̱ nine̱ o pula buka mo̱.

  Belondisedi Jaman e manane̱ Inglisi na Amerika. O mbu 1945 Rusland na balate̱ na mo̱ nde ba timbi kiṅ’a pongo. O mbu 1991, Rusland e kwedi, na ponda, Rusia na balate̱ na mo̱ nde ba timbi kiṅ’a pongo.

• Epasi(be) Yes. 61:1; Mal. 3:1; Lukas 4:18

  Edinge̱ Yehova a maloma ‘mot’ao ńa mwe̱ndi’ o “boṅsane̱ ngea” oboso ná Janea la Mesia di mabokisabe̱. Din dibo̱to̱ di botedi o “langwea batakedi myango ma bwam.”

  Belondisedi Botea o mbu 1871, C.  T. Russell na mako̱m mao boko Bibe̱l na iwiye̱ o teleye̱ mbal’a Bibe̱l. O mbu 1881, ba so̱ṅtane̱ ná ye mweńa jita ná baboledi ba Loba ba te̱ dikalo. Na babo̱ ba busise̱ milopo m’ekwali ka “Recherchons 1 000 prédicateurs” na “Oints pour prêcher.”

• Epasi(be) Mat. 13:24-30, 36-43

  Edinge̱ Moto a sai mōnda ma mbasi, nde musingedi a po̱ sa bekoko oten. Bekoko be mańaka be kudumane̱ mbasi. O pond’a mumbwa, bekoko be mase̱le̱ kakabe̱, denge̱ mbasi i mumbwabe̱.

  Belondisedi Botea o mbu 1870, diwengisan le oteten a kriste̱n a mbale̱ na ya lobango di botedi je̱ne̱ne̱ ná bwē. O pond’a sukan, kriste̱n a mbale̱ yingabe̱le̱ o mwemba, i pandisabe̱ na kriste̱n a lobango.

• Epasi(be) Dan. 2:31-33, 41-43

  Edinge̱ Myende m’eye̱i na weya me nde dongo diwo̱ la njimbidi ni longedi na gol, eye̱i, musòmba, na silba.

  Belondisedi Weya ńe nde eyemban a bato be owas’a byanedi ba Inglisi na Amerika bena ba mate̱nge̱ne̱ man manea. Ban bato ba meka man manea ná maneye babo̱ na ngiń’a dia l’eye̱i.

• Epasi(be) Mat. 13:30; 24:14, 45; 28:19, 20

  Edinge̱ Ba mako̱te̱le̱ “mbasi” o ‘ndabo ekotedi,’ “mūt’a jemea na jangwa” pe̱ a mate̱se̱be̱ omo̱ń a ‘bona ba ndabo.’ Dikalo la “myango ma bwam ma janea” di mabotea lańa “o wase ńe̱se̱.”

  Belondisedi O mbu 1919 mūt’a jemea a mate̱se̱be̱ omo̱ń a tumba la Loba. Botea na ni ponda, Bokwe̱ Bibe̱l ba walame̱ne̱ babo̱me̱ne̱ o ebol’a dikalo. We̱nge̱, Mboṅ a Yehova i mate̱ dikalo o buka na 200 ba bekombo, i mabusise̱ pe̱ kalati i se̱medi o Bibe̱l o buka na 1 000 leme̱.

• Epasi(be) Dan. 12:11; Bbī. 13:11, 14, 15

  Edinge̱ Ńam’a to̱ngo̱ iba e makwalane̱ bato o wase ná ba po̱nge “njimbid’a [ni] ńama” ni be̱n milopo samba, e bola pe̱ ni njimbidi “mūdi ma longe̱.”

  Belondisedi Janea la Inglisi na Amerika di mate̱me̱ oboso o bokise̱ Bebokedi ba Bekombo (SDN). Bekombo bepe̱pe̱ be sue̱le̱ ben bebokedi. Botea o mbu 1926 nate̱na 1933, kiṅ’a pongo pe̱ e ta nde embon a be Bebokedi ba Bekombo (SDN). Kapo̱ ka Bebokedi ba bekombo be lati (ONU) be po̱i ombus’ao, Bebokedi ba Bekombo be kusi esese yena yangame̱n nde Janea la Loba buka te̱.

• Epasi(be) Dan. 8:23, 24

  Edinge̱ Kiṅe̱ ńe njo e ‘mańamse̱ o ńai a mańaka.’

  Belondisedi Janea la Inglisi na Amerika di wan beńamsedi bende̱ne̱. K’eyembilan, o pond’a bila be londe̱ beba, Amerika e wan beńamsedi be si ta be máje̱ne̱ne̱ o wase ponda e lomno̱ ko̱s’a mabumbe iba o ko̱ye̱ musinged’a di Janea la Inglisi na Amerika.

• Epasi(be) Dan. 11:31; Bbī. 17:3, 7-11

  Edinge̱ Ńama “ni mole̱ ka muswa” ni be̱n dom la to̱ngo̱ e mabusa o njiba, ńe pe̱ nde kiṅe̱ ni londe̱ lo̱mbi. Kalat’a Daniel e mabele̱ ni kiṅe̱ ná “ńakak’a dibumbe.”

  Belondisedi Bebokedi ba Bekombo (SDN) be kwedi ele̱ku o pond’a bila be londe̱ beba. Ombusa bila, ONU e ‘mate̱se̱be̱.’ ONU, kapo̱ ka SDN ni se̱le̱ mo̱ oboso, e makusa esese yena yangame̱n nde Janea la Loba. ONU e me̱nde̱ ko̱ye̱ ebasi.

• Epasi(be) 1 Tes. 5:3; Bbī. 17:16

  Edinge̱ Matumba ma mate̱ dikalo ná “musango na mbo̱le̱,” di “dom la to̱ngo̱” pe̱ na ni “ńama” ba mako̱ye̱ “mut’a mbamba,” ba ńamse̱ mo̱. Ombusa ponda, matumba ma mabumbisabe̱.

  Belondisedi Matumba me ná ma kwala ná ma máwana musango na mbo̱le̱ o wase. Denge̱, matumba mena ma masue̱le̱ ONU ma mańamse̱ bebokedi ba ebasi e kwedi. Nika nde ńe bebotedi ba ndenge̱ ninde̱ne̱. Ni ndenge̱ e me̱nde̱ nde po̱ o su na beńamsedi ba yen ebe̱yed’a mambo ye̱se̱ o Armagedon.

• Epasi(be) Hes. 38:11, 14-17; Mat. 24:31

  Edinge̱ Gog a manane̱ ekombo a tumba la Loba. Denge̱ ange̱l i mako̱te̱le̱ “bapo̱so̱be̱.”

  Belondisedi Kiṅ’a pongo na mane̱ manea ba me̱nde̱ ko̱ye̱ tumba la Loba. Ponda to̱ ininga ombusa bebotedi ba di ko̱ye̱, Loba a mako̱te̱le̱ ebind’a bo̱kisabe̱ o mo̱ń.

• Epasi(be) Hes. 38:18-23; Dan. 2:34, 35, 44, 45; Bbī. 6:2; 16:14, 16; 17:14; 19:20

  Edinge̱ ‘Nu nu jai’ omo̱ń a “wo̱si ni masange̱” a ‘mabuka’ o bwemba te̱nge̱ne̱ Gog na milo̱ṅ mao, a bumbise̱ babo̱. Ni “ńama” e ‘mapimbabe̱ o ebud’a wea,’ njimbidi ninde̱ne̱ pe̱ e bulabe̱le̱.

  Belondisedi Yesu, Kiṅ’a Janea la Loba, a mapo̱ sunga tumba la Loba. Mwemba na 144 000 ba maneye̱ mwemba na mo̱ na milo̱ṅ ma ange̱l a mo̱ń, a mańamse̱ mulatako ma matumba, nika ńe nde manea ma was’a Satan me̱se̱.