1. Ońola nje jangame̱nno̱ sengane̱ jome̱le̱ la Yesu e?

O EDING’AO ońola mińa misukan, Yesu a kwali ná: “Bińo̱ no̱ngo̱ jangame̱ye̱ ná milema mańu mi si dilisabe̱ . . . na mitaka ma longe̱ [nika ńe nde mambo ma longe̱ ma buńa te̱].” (Lukas 21:34) Jangame̱n sengane̱ di jome̱le̱. Ońola nje e? Ońolana o nin we̱nge̱, jangame̱n lembe̱ milemlem ma ndut’a mulema bato be̱se̱ ba be̱nno̱.

2. Njika ndutu bonasango na bonańango asu ba malembe̱no̱ e?

² Ponda iwo̱, jangame̱n lembe̱ jita la ndutu o mulemlem ma ponda. Jombweye te̱ ben byembilan be mabupe̱. Mboṅ a Yehova po̱ ni belabe̱ ná Jo̱n, * ni ta ni be̱ne̱ diboa dinde̱ne̱ (di belabe̱ na fre̱nsi ná sclérose en plaques) e ta e bwa ndutu jita ponda munj’ao a cakino̱ mo̱ ombusa 19 la mbu ma diba. Ombusa ponda, bana bao ba bito baba pe̱ bese̱le̱ bolea Yehova. Babaedi ba belabe̱ ná Bob na Linda ba kusi mitakisan me diwengisan. Babo̱ babane̱ ba bo̱lo̱ne̱ bebolo babu, na bolongi babu. O mbat’a nika, ba so̱ne̱ Linda diboa la mulema lena le ná di bwa mo̱, na diboa dipe̱pe̱ lena di botedi bwe̱ no̱ki i matate̱ ńol’ao.

3. Bupisane̱ Filipi 4:6, 7, njika mbaki jeno̱ ná di be̱ne̱ e?

³ Je ná di be̱ mbaki ná Muweked’asu na Tet’asu ńa ndolo, Yehova, a maso̱ṅtane̱ ne̱ni di masengano̱ ke̱ di be̱n ndut’a mulema ninde̱ne̱. A mapula pe̱ jongwane̱ biso̱ o lembe̱ mitakisan masu. (Langa Filipi 4:6, 7.) Eyal’a Loba e be̱n jita la byembilan be malee̱ mitakisan baboledi bao ba malembe̱no̱. E malangwa pe̱ ne̱ni Yehova ongwanno̱ babo̱ o lembe̱ be bete̱medi ba ndutu. Jombweye byembilan bō̱.

4. Njika mitakisan Elia a lembe̱no̱ e, ne̱ni pe̱ a tano̱ a lakisane̱ Yehova e?

⁴ Muto̱ped’a mudī Elia a boledi nde Yehova o pond’a ndutu, a lembe̱ pe̱ mitakisan jita. Kiṅe̱ Ahab, kiṅe̱ po̱ ńa yi yena i si ta jemea o myango ma Israel nde a ta a ba Isebe̱l, nu ta ńowe̱ Baal. Babo̱ babane̱ ba ta ba londe̱ jowe̱ la Baal o mundi, ba bwa pe̱ jita la bato̱pedi ba mudī ba Yehova. Nde Elia a we̱li ńa mīla. A we̱le̱ pe̱ jonga ombusa njai ninde̱ne̱ ońolana a ta a lakisane̱ Yehova. (1 Ki. 17:2-4, 14-16) O mbat’a nika, Elia a ta a lakisane̱ Yehova ponda a te̱nge̱nno̱ bato̱pedi ba mudī ba Baal na ba bena ba ta bowe̱ Baal. Ome̱le̱ Bonaisrael ná ba boleye Yehova. (1 Ki. 18:21-24, 36-38) Elia a ta a be̱ne̱ mboṅ jita ná Yehova a ta a sue̱le̱ mo̱ o yi pond’a ndutu.

5-6. Bupisane̱ 1 Kiṅe̱ 19:1-4, ne̱ni Elia a tano̱ a senga e, ne̱ni pe̱ Yehova a lee̱le̱no̱ mo̱ ná a to̱ndi mo̱ e?

⁵ Langa 1 Kiṅe̱ 19:1-4. Elia a bo bo̱ngo̱ ponda kiṅ’a muto Isebe̱l a pulino̱ bwa mo̱. Na mo̱ a ńa mīla o Bee̱rseba. Ndutu e ta e ńo̱so̱ Elia kańena, “a pula kwedi.” Nje e ta e bola mo̱ ná a senge nika e? Elia a ta nde moto nu titi ke̱nge̱nge̱, “moto ka biso̱.” (Yak. 5:17) Yen ebe a ta a ńo̱sea na ndutu, a yokame̱ pe̱ ná yo̱ko̱i. E me̱ne̱ne̱ biana Elia o̱nge̱le̱ nde ná miwe̱n mao o sue̱le̱ jowe̱ la bosangi mi si ta mi ya bepuma, ná to̱ lambo di si tuko o Israel, na ná mo̱me̱ne̱ mō̱ buka te̱ nde a ta a dia a mabolea Yehova. (1 Ki. 18:3, 4, 13; 19:10, 14) Je ná di be̱ mańaka ná nu muto̱ped’a  mudī ńa jemea a ta a be̱ne̱ yi ńai a besengedi. Nde Yehova Loba a ta a so̱ṅtane̱ besengedi ba Elia.

⁶ Yehova a si kimedi Elia ná a tele̱ mulema mao o langwea mo̱ ne̱ni a tano̱ a senga. O diwengisan, ongwane̱ nde mo̱ ná a be̱ne̱ pe̱te̱ ngudi. (1 Ki. 19:5-7) Ombusa ponda, Yehova a lee̱le̱ Elia ngiń’ao ni pakapakan tongwea na byemban ná ongwane̱ mo̱ o te̱se̱ jo̱nge̱le̱ lao. Yehova a langwedi pe̱ mo̱ ná a dia a be̱n 7 000 la bato o Israel bena ba bangi jowe̱ Baal. (1 Ki. 19:11-18) Tongwea na ben byemban, Yehova a lee̱le̱ Elia ná a to̱ndi mo̱.

7. Njika mbaki mbadi Yehova ongwane̱no̱ Elia e mabolano̱ biso̱ e?

⁷ Mo̱ we o lembe̱ bete̱medi be mawaneye̱ wa ndut’a mulema e? E se̱ lo̱ko̱mea nika ńeno̱ ońol’asu o bia ná Yehova a ta a so̱ṅtane̱ besengedi ba Elia e! Nika e mabola biso̱ mbaki ná a maso̱ṅtane̱ pe̱ besengedi basu, ke̱ ndutu e ńo̱si biso̱. A bi myoyo masu, a bi pe̱ mo̱nge̱le̱ na besengedi basu. (Mye. 103:14; 139:3, 4) Jembilane̱ te̱ Elia ná di lakisane̱ Yehova, a me̱nde̱ jongwane̱ biso̱ o lembe̱ mitakisan mi mawaneye̱ biso̱ ndut’a mulema.​—Mye. 55:23.

8. Ne̱ni Yehova a me̱nde̱no̱ jongwane̱ wa o lembe̱ ndut’a mulema e?

⁸ Ndutu ńe wa o mulema ńe ná e bola ná wo̱nge̱le̱ ná bete̱medi bo̱ngo̱ be si me̱nde̱ tukwa to̱ buńa, e bo̱bise̱ pe̱ wa mulema. Nika e po̱i so̱ te̱, o si dimbea ná Yehova a me̱nde̱ jongwane̱ wa o lembe̱ ndut’ango̱ ńa mulema. Ne̱ni a me̱nde̱no̱ jongwane̱ wa e? A mapula ná o langweye mo̱ mitakisan mo̱ngo̱ na ne̱ni o masengano̱. A me̱nde̱ pe̱ wanea wa jongwane̱. (Mye. 5:4; 1 Pet. 5:7) Ońola nika, kane̱ Yehova ponda ye̱se̱, o langweye mo̱ mitakisan mo̱ngo̱. A si me̱nde̱ kwalisane̱ wa tongwea na doi lao ka ne̱ni te̱ a bolino̱ na Elia, nde a me̱nde̱ kwalisane̱ wa tongwea n’Eyal’ao, Bibe̱l, na bebokedi bao. Myango o malangano̱ o Bibe̱l me ná mi lo̱ko̱ wa na bola pe̱ wa dipita. Bonaso̱ngo̱ na bonańo̱ngo̱ o mwemba pe̱ be ná bembe̱ wa.​—Rom. 15:4; Bon. 10:24, 25.

9. Ne̱ni diko̱m o lakisanno̱ leno̱ ná longwane̱ wa e?

⁹ Ponda Yehova a langwedino̱ Elia ná a bake̱ Elisa dongo diwo̱ la m’bē̱ mao, Yehova a ta nde a bola Elia diko̱m a tano̱ a be̱ne̱ ńo̱ngi, lena ye̱ke̱i te̱ di wusa jongwane̱ mo̱ o lembe̱ ndut’ao ńa mulema ke̱ a ńo̱sedi. Mulemlem pe̱ nde yeno̱ ke̱ di langwedi diko̱m di lakisanno̱ ne̱ni di masengano̱, le ná longwane̱ biso̱ o lembe̱ ndut’asu ńa mulema. (2 Ki. 2:2; Min. 17:17) Yete̱na o si be̱n moto weno̱ ná o kwalisane̱, kane̱ Yehova ná ongwane̱ wa o so̱ kriste̱n ńou ńe ná ńembe̱ wa.

10. Ne̱ni myango ma Elia mi mabolano̱ biso̱ dipita e, ne̱ni pe̱ dikaki le o Yesaya 40:28, 29 di mongwane̱no̱ biso̱ e?

¹⁰ Yehova ongwane̱ Elia o lembe̱ ndut’a mulema na o bolea pe̱ mo̱ na jemea mimbu jita. Myango ma Elia mi mabola biso̱ dipita. Ponda iwo̱, je ná di be̱ne̱ ndut’a mulema ninde̱ne̱ ńe ná ni ńo̱so̱ biso̱. Nde di lakisane̱ te̱ Yehova, a me̱nde̱ bola biso̱ ngińa ni mapule̱ ná di benge bolea mo̱.​—Langa Yesaya 40:28, 29.

11-13. Ne̱ni ndut’a mulema e ńo̱sino̱ baboledi ba Loba balalo ba kwaṅ e?

¹¹ Bato bape̱pe̱ pe̱ Bibe̱l e mato̱peano̱ ba lembe̱ ndut’a mulema ninde̱ne̱. Di no̱nge k’eyembilan Hana nu ta nu be̱ne̱ ndutu o  mulema ońolana a ta a bwane̱ ewomb’ao iso̱n, mbań ao pe̱ a ta be̱ a kumwa mo̱ na byala b’eyango. (1 Sam. 1:2, 6) Ndut’a mulema ninde̱ne̱ ńa Hana e ta e timbise̱ mo̱ njongi kańena a ta be̱ eya mbembe, a si de pe̱ to̱.​—1 Sam. 1:7, 10.

¹² Ponda iwo̱, Kiṅe̱ David a ta be̱ a ńo̱sea ońola ndut’a mulema. O̱nge̱le̱ te̱ mitakisan a tano̱ a lembe̱. A ta a be̱ne̱ ndut’a mulema ninde̱ne̱ ońola mawuse̱ a tano̱ a po̱ngo̱. (Mye. 40:13) Mun’ao ńa ndolo Absalom a pamo mo̱, ombusa ponda pe̱ a bwabe̱. (2 Sam. 15:13, 14; 18:33) Diko̱m lao diwo̱ la batabata pe̱ di sambwe̱le̱ mo̱. (2 Sam. 16:23–17:2; Mye. 55:13-15) Myenge jita David a tilino̱ mi ta nde mi langwa ndut’ao ńa mulema name̱ne̱ pe̱ na lakisane̱ di bo̱le̱ a tano̱ a be̱ne̱ye̱ Yehova.​—Mye. 38:6-11; 94:17-19.

¹³ Ombusa ponda, mulo̱ngedi mō̱ a ta a botea ko̱no̱ne̱ bato ba bobe mbad’abu ńa longe̱. Yen ebe a ta nde elong’a mbia ya mot’a Bonalevi Asaf, a ta pe̱ nde a bolea “o wum’a bosangi ya Loba.” Nu mulo̱ngedi a ta a be̱ne̱ ndut’a mulema ni boli ná a si ta muńe̱nge̱ to̱ bonam. A botea na mo̱me̱ne̱ be̱ne̱ penda ná Yehova a manamse̱ ba bena ba maboleye̱ mo̱.​—Mye. 73:2-5, 7, 12-14, 16, 17, 21.

14-15. Nje be byembilan belalo be mokwe̱le̱no̱ biso̱ jombwea baise̱ la Yehova jongwane̱ e?

¹⁴ Ba baboledi ba Yehova balalo ba mbale̱ ba ta nde ba se̱me̱ye̱ na mo̱ o kusa jongwane̱. Ba kane̱ mo̱, ba langwea mo̱ ndut’abu ńa mulema. Ba tele̱ye̱ mo̱ mulema, ba langwea mo̱ mambo ma boli ná ba be̱ne̱ ndut’a mulema ninde̱ne̱. Ba benga pe̱ wala o epolo ba mowe̱no̱ Yehova.​—1 Sam. 1:9, 10; Mye. 55:23; 73:17; 122:1.

¹⁵ Yehova a lee̱le̱ mō̱ ńabu te̱ nded’a mulema, alabe̱ muka ma mō̱ ńabu te̱. Hana a kusi musango ma teten. (1 Sam. 1:18)  David a tili ná: “Ndut’a nute̱m na sim ye jita, nde Yehova a masunga mo̱ o ye̱se̱.” (Mye. 34:20) Ombusa ponda, mulo̱ngedi a timbi so̱ṅtane̱ ná Yehova ‘aledi [mo̱] o dia [lao] la mom,’ a madie̱le̱ mo̱ na malea ma ndolo. A lo̱ngi ná: “Ye mba bwam o be̱ Loba be̱be̱; na we̱le̱ nde dipita lam na Sango Yehova.” (Mye. 73:23, 24, 28) Nje ben byembilan be mokwe̱le̱no̱ biso̱ e? Ponda iwo̱ je ná di be̱ne̱ mitakisan ma ngińa mi mawaneye̱ biso̱ ndut’a mulema. Nde je ná di lembe̱ mo̱ yete̱na di dutedi ne̱ni Yehova ongwane̱no̱ bape̱pe̱, di se̱me̱ye̱ na mo̱ o muka, di sengane̱ mo̱ na bola pe̱ nje a mabaise̱no̱ ná di bole.​—Mye. 143:1, 4-8.

16-17. (a) Ońola nje di s’angame̱nno̱ pandise̱ biso̱me̱ne̱ e? (b) Ne̱ni jeno̱ ná di kusa pe̱te̱ ngudi e?

¹⁶ Be byembilan belalo di kwaledino̱ be mokwe̱le̱ biso̱ belēdi bepe̱pe̱ ba mweńa​—di s’angame̱n pandise̱ biso̱me̱ne̱ na Yehova to̱ na tumba lao. (Min. 18:1) Munańango Nansy, nu ta nu be̱ne̱ ndut’a mulema ninde̱ne̱ ponda mom’ao a comno̱ mo̱, mo̱ ná: “Na ta na be̱ne̱ mińa jita mena na si tano̱ na pula je̱ne̱ to̱ kwalisane̱ moto. Nde nika na tano̱ na bata panda, nika pe̱ nde na tano̱ na bata bwa ndutu.” Mambo ma tuko ponda Nansy ombwedino̱ ne̱ni eno̱ ná ongwane̱ bape̱pe̱ bena  ba ta o ndutu. Mo̱ ná: “Na ta na lambe̱ye̱ bape̱pe̱ toi ke̱ ba mateleye̱ mba mitakisan mabu. Na maki ná etum te̱ na tano̱ na lee̱le̱ babo̱ ndedi, na si ta pe̱ nombwea mbame̱ne̱ tobotobo.”

¹⁷ Je pe̱te̱ ná di be̱ne̱ ngudi yete̱na jukedi o ndongame̱n. Niponda jeno̱ o ndongame̱n a mwemba, je nde o bata bola Yehova epolo ná ongwane̱ biso̱, a lo̱ke biso̱ na be̱ pe̱ nu ńena nu ‘membe̱ biso̱.’ (Mye. 86:17) Oten a membe̱ biso̱ tongwea na mudī mao musangi, Eyal’ao, na tumba lao. Ndongame̱n i mabola biso̱ epolo ná di bwane̱ “jembame̱ la mō̱ na nune̱” muńe̱nge̱. (Rom. 1:11, 12) Munańango mō̱ nu belabe̱ ná Sofia mo̱ ná: “Yehova na bonasango ba wase ńe̱se̱ bongwane̱ mba o lembe̱. Ndongame̱n asu i ta mba mweńa buka me̱se̱. Na so̱i ná etum te̱ na mawe̱le̱no̱ mbame̱ne̱ mususu o dikalo na o mwemba mam, na mawe̱le̱ lembe̱ ndut’a mulema na mutaka.”

18. Nje Yehova eno̱ ná a bola biso̱ ke̱ di bo̱bi e?

¹⁸ Niponda mulema mu bo̱bino̱ biso̱, di si dimbea ná Yehova a si kakane̱ biso̱ buka te̱ belo̱ko̱medi ba po̱ko̱po̱ko̱ o kie̱le̱ ni maye̱, a kakane̱ pe̱ ná a mongwane̱ biso̱ o lembe̱ ndut’asu ńa mulema tatan. A mabola biso̱ “ńo̱ngi na ngudi” o buka bo̱bo̱ na si be̱ne̱ la dipita.​—Fil. 2:13, NW.

19. Njika mbaki Roma 8:37-39 e mabolano̱ biso̱ e?

¹⁹ Langa Roma 8:37-39. Ńamuloloma Paulo a mabola biso̱ mbaki ná to̱ lambo di titi ná di pandise̱ biso̱ na ndol’a Loba. Ne̱ni jeno̱ ná jongwane̱ bonasango na bonańango asu bena ba mapo̱nge̱ miwe̱n o buka ndut’a mulema e? Jokwa di mabupe̱ di me̱nde̱ kwalea ne̱ni jeno̱ ná jembilane̱ Yehova tongwea na lee̱le̱ nded’a mulema na sue̱le̱ pe̱ bonasango na bonańango asu ke̱ ba be̱n ndut’a mulema.