O MBU má 1970, bamuwaso ba so̱i m’bo̱m ma kalati mwena mu ta mu dia wea o Ein Gedi, o Israel, be̱be̱ na dibo̱ le o epas’a mbe̱ng’a Munja-ma-wanga. Ba so̱i nde mu m’bo̱m ma kalati ke̱ be o púla ndabo a ndongame̱n ńa Bonayuda ni ta ni dia wea ponda mundi mu ńamsabe̱no̱, yen ebe o ebwe’a mbu e londe̱ mutoba P.A. Mu m’bo̱m ma kalati mu ta ńai mu si wusano̱ langabe̱ to̱ wunjabe̱ esibe̱ ná mu ńamsabe̱. Nde tongwea n’eboled’a maduta ya 3-D, mu m’bo̱m ma kalati mu we̱li “wunjabe̱.” Tongwea n’elongisan a peńa ya no̱ngo̱ la maduta nde mun m’bo̱m ma kalati mu we̱lino̱ pe̱te̱ langabe̱.

Nje so̱ di duta di lee̱no̱ e? Mu m’bo̱m ma kalati mwe nde text a Bibe̱l. Nje mu m’bo̱m mu diane̱no̱ e bambe̱ myemba mō̱ ma bebotedi ba kalat’a Levitiko. Mi myemba mi be̱n litera ine̱i ya dina la Loba na bwambo ba Bonahebe̱r. Yen ebe mu m’bo̱m mwena mu so̱be̱ mu tilabe̱ nde oteten a pambo a ponda ńe oteten a mongo maba ma 50 P.A. na 400 P.A. E timbi so̱ so̱be̱ ná mu m’bo̱m nde mu mádune̱ buka me̱se̱ ma Betiledi ba Bonahebe̱r ombusa so̱be̱ la m’bo̱m ma Qumran. Gil Zohar a tili o The Jerusalem Post ná: “Obiana m’bo̱m ma Ein Gedi mu bambe̱ kalat’a Levitiko mu mawe̱le̱ langabe̱, pond’a bwaba ńa buka ikol’a mbu e tombi oteten a mb’o̱m ma Munja-ma-wanga mu májinde̱ 2 000 la mbu, mu tilabe̱ la su la pambo a ponda ńa Tempe̱l ni londe̱ iba, na Kodex ńa Apel ni tilabe̱ o ebwe’a mbu e londe̱ 10 P.A.” Bupisane̱ bamabie̱, mu m’bo̱m mwena mu we̱li nde wunjabe̱ tongwea na maduta mu malee̱ ná text a Masoretik ńa Tora “e kombabe̱ bwam o pambo a ponda ńa lokoli la mimbu, na ná batombe̱le̱ Betiledi ba Bibe̱l ba s’inge̱le̱ diwuse̱ to̱ diwo̱ oten.