BISO̱ be̱se̱ di dube̱ ná Yehova e o die̱le̱ na sue̱le̱ pe̱ tumba lao o mbad’a mudī o min “mińa misukan.” (2 Tim. 3:1) Ye so̱ nde mboṅ a mō̱ na mō̱ ńasu te̱ o sengane̱ Yehova. Je ná di kobisane̱ bete̱medi basu na ba Bonaisrael o eyaṅ. Ba ta bangame̱n bupe̱ miseba ma diwe̱u.

Yehova a ta a langwea Mose ná a po̱nge mawe̱u ma silba maba, a lule̱ mo̱ na wedi “ońola bele̱ la jako̱to̱ne̱ na ońola te̱ la dikalo la jasumwe̱ la m’boko.” (Mis. 10:2) Prisi i ta yangame̱n lo̱ngo̱ mawe̱u o ńai na ńai a mbadi o langwea tumba nje langame̱nno̱ bola. (Mis. 10:3-8) O nin we̱nge̱, tumba la Loba di makusa bediedi o ńai na ńai a mbadi. Jombweye mbadi ilalo ya yi mbadi nde di kobisane̱ mo̱ na miseba ma mawe̱u o pond’a kwaṅ. Tumba la Loba o nin we̱nge̱ di mabelabe̱ o mako̱to̱ne̱ mande̱ne̱, bome ba te̱se̱be̱ ba makusa belongedi, bete̱sedi ba myemba pe̱ be matukwabe̱ to̱ kusa mpo̱ngulan.

Prisi i ta be̱ i lo̱ngo̱ mawe̱u mabane̱ ke̱ Yehova a mapula ná “jako̱to̱ne̱” le̱se̱ jukeye oboso bao o múna ma muno̱ko̱ ma ndongame̱n mwe la jedu. (Mis. 10:3) Matumba me̱se̱ mena ma ta ma boka bepepa bene̱i dinge̱le̱ muno̱ko̱ ma ndongame̱n, ma ta masenga mu museba. Ma mena ma ta ma boka be̱be̱ na muno̱ko̱ ma ta be̱ ma pomane̱ jukea. Nde e ta e pula ma mena ma ta etum ponda na miwe̱n jita o jukea. E be̱ to̱ ne̱ni, Yehova a ta a pula ná me̱se̱ ma ko̱to̱me̱ ná ma senge bediedi bao.

O we̱nge̱ di si mako̱to̱me̱ o muno̱ko̱ ma ndongame̱n, nde di mabelabe̱ o jukea o mako̱to̱ne̱ ma tumba la Loba. Nika e bambe̱ mako̱to̱ne̱ mande̱ne̱ na mane̱ ma tobotobo, owe̱ni di makusano̱ mome̱le̱ na bediedi ba mweńa. Tumba la Loba di mabola nde mulemlem o bekombo ba wase ńe̱se̱. Ba bena ba makase̱ bebeledi o jukea ba mabwa muńe̱nge̱ o ko̱to̱me̱ na bane̱. Bō̱ ba mawa etum jita. To̱ na nika ba bena ba makase̱ be bebeledi ba memba ná ye mweńa o po̱ngo̱ mi miwe̱n.

Ne̱ni pe̱ so̱ yeno̱ na mabo̱to̱ ma bate̱ dikalo me o betika etum na bepolo ba mako̱to̱ne̱ mande̱ne̱ e? Tongwea na belongisan ba we̱nge̱, jita labu di matombwane̱ mulemlem ma da la mudī, ba senga pe̱ biana be nde wuma iwo̱ na bane̱. K’eyembilan, o pond’a pe̱pe̱le̱ diwo̱ la nulomabe̱ na mulopo m’ebolo, mukanjo m’ebolo ma Benin mu tombe̱le̱ jako̱to̱ne̱ tongwea na video o Arlit na Nije̱r, mundi m’eyaṅ ma Sahara mu  be̱n madale ma tiki na nika. Mwaba ma bato na mō̱: bonasango, bonańango, na ba bena ba lee̱le̱ ńo̱ngi ba ta ba ko̱to̱me̱. To̱ná ba tano̱ ba po̱to̱ etum, ba sengi nde biana ba ta nde wuma iwo̱ na dine̱ jako̱to̱ne̱ la 44 131 bato. Munasango mō̱ a tili ná: “Di som bińo̱ jita ná lo tombe̱le̱ biso̱ jako̱to̱ne̱. Nika e bati lee̱le̱ nate̱na njika dime̱ne̱ lo to̱ndino̱ biso̱, nika e tapi biso̱ milema jita.”

Pris’a Bonaisrael i ta be̱ i lo̱ngi te̱ diwe̱u diwo̱, “ke̱ banedi, milopo ma lokoli,” mi mako̱to̱me̱ o muno̱ko̱ ma ndongame̱n. (Mis. 10:4) Oten nde ba tano̱ ba kusa belēdi na belongedi tongwea na Mose. Mo̱ nde be ta bangame̱n jongwane̱ babo̱ o bambe̱ m’bē̱ mabu oteten a matumba mabu. O be̱ te̱ mō̱ ńa ba banedi, o si wusa bola me̱se̱ na me̱se̱ ná wukeye, wokwe pe̱ e?

We̱nge̱, batudu o mwemba ba titi “banedi”; ba si manea pe̱ to̱ omo̱ń a dibemba la Loba di bakabe̱ babo̱. (1 Pet. 5:1-3) Nde ba mawe̱ na ngud’abu ńe̱se̱ o jombwea dibemba. Ońola nika nde beno̱ makwasi o jukea k’eyembilan, o Esukul’a Ebol’a Janea ke̱ ba belabe̱ ná ba bate o longabe̱. O pond’a be belongedi, batudu ba mokwa ne̱ni bata jombwea mambo ma mwemba bwam. Be belongedi be mongwane̱ batudu na ba bena ba mombweano̱ o mwemba o bata sisea be̱be̱ na Yehova. To̱ e be̱ nde ná o s’ukedi o esukulu ka ye, ye̱ke̱i te̱ we o tombwane̱ o mbasanedi ma ba bena bukedi.

Ponda iwo̱ pris’a Bonaisrael i ta be̱ i lo̱ngo̱ na doi la waiwai. Nika e ta nde o bīse̱ ná Yehova a mapula ná m’boko mwe̱se̱ mwasumwe̱. (Mis. 10:5, 6) Jasumwe̱ la m’boko di ta nde di tomba na o̱da ninde̱ne̱, nde nika e ta pe̱ e baise̱ ebol’a ngińa jita. Nika e ta e pungwa bato bō̱ mo̱nge̱le̱. Ońola nje e?

Yen ebe bō̱ ba ta nde bo̱nge̱le̱ ná museba ma jasumwe̱ mu ta mu lo̱ngo̱be̱ ponda ye̱se̱ na o mbad’epańpań. Ponda iwo̱, ‘diwindiwindi di ta nde di ja botea ebiamu nate̱na idiba.’ Ponda iwo̱ pe̱ di ta di ja “mińa miba, mo̱di mō̱, to̱ mbu ma mususu.” (Mis. 9:21, 22) Ngedi ininga pe̱ m’boko mwasumwe̱no̱ e? Miso̱ngi epasi 33 e makwala ná ba boki o lambo ka 40 ma bepolo.

Ngedi iwo̱, bō̱ ba ta ba boka o bepolo ba mulo̱lo̱ko̱. Nika e ta e lo̱ko̱ babo̱ jita o “y’eyaṅ ende̱ne̱ ya maladi.” (Ndim. 1:19) Ba wusa bolane̱ jo̱nge̱le̱ ná wuma i bupe̱ ba me̱nde̱no̱ boka i si me̱nde̱ be̱ bwam ka wuma beno̱ jasumwe̱.

M’boko mu ta be̱ mu masumwe̱ te̱, e ta e pula bato bō̱ we̱lisane̱ o jenge̱le̱ mabu mudiyo ma jasumwe̱. Babo̱ be̱se̱ ba ta ba senga di doi la waiwai, nde babo̱ be̱se̱ ba si wusa jasumwe̱ o mulemlem ma ponda. Di doi la waiwai di ta nde di kwala ná matumba ma boki o jedu, nika ńe nde Yuda, Isakar, na Sebulon mangame̱n jasumwe̱. (Mis. 2:3-7; 10:5, 6) Ombusa jasumwe̱ labu, prisi i malo̱ngo̱ doi la waiwai ngedi ni londe̱ iba ońola bepepa ba matumba malalo be boki o mikondo. Prisi i malo̱ngo̱ ná na ná natē̱ m’boko mwe̱se̱ mwasumwe̱.

Pondapo̱ mawengisan mō̱ ma bebokedi ma pungo wa mo̱nge̱le̱. Yen ebe we̱n nde ná nika ńe mawengisan bwambi. To̱so̱ o ta o do̱lisane̱ bete̱sedi bō̱, o si ta pe̱ to̱ o pula ná be tukwe. E be̱ ońola to̱ njika njo̱m, e ta wa ndutu o lee̱le̱ we̱lisane̱, nika e no̱ngo̱ne̱ pe̱ wa ponda o ko̱lo̱ngo̱ne̱ mo̱. Nde di we̱ te̱ o kasa ma mawengisan, di me̱nde̱ je̱ne̱ ná me nde ońola bwam basu, na ná Yehova a mabwane̱ biso̱ muńe̱nge̱.

O mińa ma Mose, Yehova a die̱le̱ lodun la bome, bito, na bana o eyaṅ. E si be̱ te̱ na dibongo lao na bediedi bao pe̱, ba si wusa jonga. O nin we̱nge̱ pe̱, di monga nde o mbad’a mudī tongwea na bediedi ba Yehova. Na mbale̱, je bonam! Biso̱ be̱se̱ di no̱nge so̱ bedomsedi o bupe̱ museba ma mawe̱u ka nje te̱ Bonaisrael ba jemea ba bolino̱!