1. Ne̱ni ńamuloloma Paulo a tano̱ e̱ne̱ baboledi e?

 BABOLEDI ba mabola ebol’a mweńa o mwemba. E me̱ne̱ne̱ na bwē ná ba bome ba jemea ba ta ńamuloloma Paulo tiki. K’eyembilan, ponda a tiledino̱ kriste̱n ya Filipi, a som baboledi tobotobo mwemba na batudu.—Fil. 1:1.

2. Ne̱ni munasango nu belabe̱ ná Luis a tano̱ e̱ne̱ m’bē̱ mao ma muboledi e?

² Jita la bonasango bena ba dubisabe̱, e be̱ ná be beso̱mbe̱ to̱ ke̱m, ba mabwa muńe̱nge̱ o be̱ baboledi. K’eyembilan, Devan a ta nde a be̱ne̱ 18 mbu ponda a te̱se̱be̱no̱ muboledi. O mune̱ mudi, munasango mō̱ nu belabe̱ ná Luis a tese̱be̱ nde muboledi ke̱ a mábuka 50 mbu. Ka ne̱ni jita la baboledi ba masengano̱, a kwali ná: “Ye nde mba edube o bolea ka muboledi, tobotobo ke̱ na dutedi jombwea ndolo ńe̱se̱ mwemba mu lee̱le̱no̱ mba!”

3. Njika myuedi di me̱nde̱no̱ jombwea e?

³ Yete̱na we nde munasango nu mádubisabe̱ nde o si bedi be̱ muboledi, mo̱ we ná o tese̱ nika ka lambo la po̱le̱ e? Nje ye ná e tute̱le̱ wa o bola nika e? Njika bede̱mo Bibe̱l e makwaleano̱ wangame̱nno̱ sa o bwam ba be̱ ńai ni dongame̱n e? O din jokwa di me̱nde̱ jalabe̱ mi myuedi. Nde, di se̱le̱ kwalea njika m’bē̱ baboledi ba be̱nno̱.

 NJIKA M’BĒ̱ BABOLEDI BA BE̱NNO̱ E?

4. Njika m’bē̱ baboledi ba be̱nno̱ e? (Ombwa pe̱ duta.)

⁴ Muboledi e nde munasango nu dubisabe̱ nu te̱se̱be̱ na mudī musangi o jongwane̱ batudu o bola jita la bebolo ba mweńa o mwemba. Baboledi bō̱ ba mabakise̱ ná bate̱ dikalo ba be̱n mōnda ma dikalo na kalati eyeka ońola ebol’a dikalo. Bane̱ ba mombwea nde bosangi na sabangane̱ la Ndabo a Janea. Baboledi ba makasa pe̱ bukeye̱ o ndongame̱n, bombwea pe̱ belongisan ba bosenga na sinima o pond’a ndongame̱n. Jita la bebolo baboledi ba mabolano̱ be nde bebolo ba mā. Nde nje ye mwená buka me̱se̱ ye nde ná, baboledi be nde bato ba mudī, ba to̱ndi Yehova ba mabupe̱ pe̱ bete̱sedi bao be te̱m na sim. Ba to̱ndi pe̱ bonasango na bonańango abu ba mudī jita. (Mat. 22:37-39) Ne̱ni munasango eno̱ ná a bola ná a be̱ ńai ni dongame̱n o be̱ muboledi o mwemba e?

5. Nje munasango eno̱ ná a bola ná a be̱ ńai ni dongame̱n o be̱ muboledi e?

⁵ Bibe̱l e mabonde̱ bede̱mo bena ba be ná ba te̱se̱be̱ baboledi bangame̱no̱ be̱ne̱. (1 Tim. 3:8-10, 12, 13) O mapula te̱ be̱ muboledi o mwemba, we ná wokwa be bede̱mo Betiledi be makwaleano̱ o po̱ngo̱ pe̱ miwe̱n o sa mo̱. Nde wangame̱n se̱le̱ dutea o bia nje e matute̱le̱ wa o pula be̱ muboledi.

NJE E MATUTE̱LE̱ WA O PULA BE̱ MUBOLEDI E?

6. Nje yangame̱n tute̱le̱ wa o pula bolea bonasango na bonańango e? (Mateo 20:28; ombwa pe̱ la dipapa laboso.)

⁶ Yesu Kristo, ńena ńe eyembilan asu e peti, a boli nde me̱se̱ ońola ndolo a tano̱ a be̱ne̱—ndolo ońola Sango ao na ndolo ońola bato. Ni ndolo e tute̱le̱ mo̱ o bola ebolo na ngińa na bola pe̱ bebolo be ye̱wo ońola bape̱pe̱. (Langa Mateo 20:28; Yohane 13:5, 14, 15) Yete̱na ndolo nde e matute̱le̱ wa, Yehova a me̱nde̱ namse̱ wa, ongwane̱ pe̱ wa o be̱ne̱ bede̱mo be mapule̱ ná o be̱ ńai ni dongame̱n o te̱se̱be̱ muboledi.—1 Kor. 16:14; 1 Pet. 5:5.

7. Ońola nje munasango a s’angame̱nno̱ wasa be̱ne̱ doi omo̱ń bane̱ to̱ wasa ná bane̱ be̱ne̱ mo̱ mweńa e?

⁷ O nin wase, ba yo̱ki nde jubea bato bena ba malee̱ ná be mweńa. Nde baboledi ba  Yehova ba titi nika. Munasango nu mabole̱ mambo na ndolo kapo̱ ka Yesu, a si mawasa be̱ne̱ doi la byanedi omo̱ń a bane̱ to̱ bola ná bane̱ be̱ne̱ mo̱ ka mot’a mweńa. Yete̱na ni ńai a moto nu mapule̱ ná bane̱ be̱ne̱ mo̱ mweńa e te̱se̱be̱ o mwemba, yen ebe a me̱nde̱ banga bola bebolo be ye̱wo be mabolabe̱ o bwam ba jombwea mido̱ngi ma tiki ma Yehova. E ná o̱nge̱le̱ ná e mweńa jita o bola be bebolo. (Yohane 10:12) Yehova a si me̱nde̱ namse̱ miwe̱n ma moto nu mabole̱ mambo na kumba to̱ nu mapula lee̱ ná e mweńa.—1 Kor. 10:24, 33; 13:4, 5.

8. Njika malea Yesu a bolino̱ bamuloloma bao e?

⁸ Ponda iwo̱, to̱ mako̱m ma Yesu ma batabata ma puli be̱ne̱ m’bē̱ mō̱, nde ba ta ba tutabe̱le̱ na mo̱nge̱le̱ ma bobe. O̱nge̱le̱ te̱ nje bamuloloma ba Yesu baba—Yakobo na Yohane ba bolino̱. Ba baise̱ Yesu ná a bole babo̱ epol’a tobotobo o Janea lao. Yesu a si sesi babo̱ ońola nje ba baise̱no̱. O diwengisan, a teleye̱ nde 12 bamuloloma be̱se̱ ná: “To̱ nja nu mapule̱ be̱ nunde̱ne̱ oteten ańu a be̱ nde muboled’ańu; to̱ nja nu mapule̱ be̱ ńaboso oteten ańu a be̱ nde mūt’a be̱se̱.” (Marko 10:35-37,43, 44) Bonasango bena mo̱nge̱le̱ ma bwam nde ma matute̱le̱ babo̱ o pula be̱ne̱ m’bē̱—nika ńe nde ná, o bolea bape̱pe̱—ba me̱nde̱ nde be̱ bonam ońola mwemba.—1 Tes. 2:8.

NJE YE NÁ YONGWANE̱ WA O PULA BOLEA BONASO̱NGO̱ E?

9. Nje ye ná yongwane̱ munasango o benga be̱ne̱ ńo̱ngi o be̱ muboledi e?

⁹ Esibe̱ penda o to̱ndi Yehova o mapula pe̱ bolea bane̱. To̱ na nika, we ná o si be̱ne̱ ńo̱ngi o bola bebolo bena baboledi o mwemba ba mabolano̱. Nje ye ná yongwane̱ wa o be̱ne̱ ni ńo̱ngi e? Dutea ońola muńe̱nge̱ bolea la bonaso̱ngo̱ na bonańo̱ngo̱ di me̱nde̱no̱ wanea wa. Yesu mo̱ ná: “Bola le bonam buka kusa.” (Bebolo 20:35) A wele̱ ben bete̱sedi o ebolo o longe̱ lao. A ta bonam o bolea la bane̱, wa pe̱ we ná o be̱ mo̱.

10. Ne̱ni Yesu a lee̱le̱no̱ ná a ta muńe̱nge̱ o bolea bane̱ e? (Marko 6:31-34)

¹⁰ Jombweye eyembilan e malee̱ ná Yesu a ta muńe̱nge̱ o bolea bane̱. (Langa Marko 6:31-34.) Ngedi po̱, Yesu na bamuloloma bao ba ta ba wo̱lo̱. Ba ta bala we̱nge̱me̱ye̱ o wum’eyaṅ ná ba wumse̱ son. Nde dimuti jalo babo̱ oboso, na dipita ná Yesu a mokwe̱le̱ babo̱. Nde a wusa kwala ná ke̱m ońolana mo̱ na bokwedi bao ba si ta to̱ ba be̱ne̱ “pond’a da.” Yesu a wusa jokwe̱le̱ babo̱ mbale̱ po̱ to̱ iba nde a langwea babo̱ ná bale. Nde kana ndolo nde e ta e tute̱le̱ mo̱ o bola mambo, a kumo nde “lee̱ babo̱ mambo jita.” A bengi jokwe̱le̱ babo̱ nate̱na “ponda ni tombi.” (Marko 6:35) A boli nika, seto̱ ońolana a ta angame̱n bola nika, nde ońolana a ta “a bwea [babo̱] ndedi.” A ta a pula jokwe̱le̱ babo̱ ońolana a to̱ndi babo̱. Bolea la bane̱ di wanedi Yesu muńe̱nge̱ munde̱ne̱.

11. Ne̱ni Yesu ombwedino̱ bato e? (Ombwa pe̱ duta.)

¹¹ Yesu a si ta okwe̱le̱ dimuti buka te̱, a boli buka nika. Ombwedi ńo̱ng’abu y’eyobo. A boli babo̱ da o mbad’a betańsedi, nde a bola mo̱ bokwedi bao ná ba bole mo̱ bato be̱se̱. (Marko 6:41) Tongwea na nika, okwele̱ nde bokwedi bao ne̱ni bolea bane̱. A lee̱ pe̱ babo̱ ná bebolo ba dia—ka bō̱ bena baboledi beno̱ ná ba bola—be mweńa. Keka te̱ dutea muńe̱nge̱ bamuloloma ba bono̱ ponda ba bolino̱ ebolo mwemba na Yesu  o jaba da lena a bolino̱ o mbad’a betańsedi ńai ńena “be̱se̱ ba ta ba da, bula”! (Marko 6:42) O mbale̱ ńe̱se̱, seto̱ nin ngedi buka te̱ nde Yesu a we̱le̱no̱ bwam ba bane̱ oboso ba bwam bao. A bolane̱ nde longe̱ lao le̱se̱ o wase o bolea bato. (Mat. 4:23; 8:16) Yesu a ta muńe̱nge̱ na mutam o jokwe̱le̱ bane̱ na o londise̱ ńo̱ng’abu na sibise̱ la ńolo le̱se̱. Esibe̱ penda wa pe̱ o me̱nde̱ bwa muńe̱nge̱ jita yete̱na we be̱be̱ o bolea bane̱ ka muboledi.

12. Ońola nje to̱ mō̱ ńasu a s’angame̱nno̱ jo̱nge̱le̱ ná a si bi bola lambo la tobotobo le ná longwane̱ mwemba e?

¹² Yete̱na o mo̱nge̱le̱ ná o si bi bola mambo ma tobotobo, o si bo̱bo̱. Penda to̱ po̱ e titi ná o be̱n bede̱mo bena be ná be bola ná o be̱ mweńa o mwemba. Dutea o nje Paulo a tilino̱ o 1 Korinto 12:12-30 nde o kane̱ pe̱ Yehova ná ongwane̱ wa je̱ne̱ ne̱ni weno̱ ná o we̱le̱ nika o ebolo. Byala ba Paulo be malee̱ ná bwē ná, kapo̱ ka bane̱ baboledi ba Yehova, we mweńa we pe̱ tiki ońola mwemba. Yete̱na o si bedi be̱ ńai ni dongame̱n o be̱ muboledi, o si bo̱bo̱. O diwengisan, bola nje ye̱se̱ weno̱ ná o bola o bolea Yehova na bonaso̱ngo̱. Be̱ mbaki ná batudu ba me̱nde̱ jombwea wa, ba bola pe̱ wa bebolo bena weno̱ ná o bola.—Rom. 12:4-8.

13. Nje jeno̱ ná di kwala jombwea jita la bede̱mo bena ba mengane̱no̱ bome bangame̱n te̱se̱be̱ o mwemba e?

¹³ Jombweye̱ njo̱m nipe̱pe̱ ńangame̱n tute̱le̱ wa o pula be̱ muboledi: Jita la bede̱mo bena baboledi bangame̱nno̱ be̱ne̱, kriste̱n ye̱se̱ yangame̱n sa mo̱. Kriste̱n ye̱se̱ yangame̱n sisea be̱be̱ na Yehova, be̱ muńe̱nge̱ o bola, na be̱ne̱ pe̱ bedangwedi be do̱lisane̱ Loba. Yen ebe o mábe̱ne̱ jita la be bede̱mo muboledi angame̱nno̱ be̱ne̱. Nje munasango angame̱nno̱ bola tobotobo ná a be̱ ńai ni dongame̱n o be̱ muboledi e?

NJE BOLA NÁ O BE̱ MUBOLEDI

14. Be̱ moto nu “dili” nje nik’e mapulano̱ kwala e? (1 Timoteo 3:8-10, 12)

¹⁴ Jombweye̱ bede̱mo bō̱ be maso̱be̱ o 1 Timoteo 3:8-10, 12. (Langa.) Muboledi angame̱n nde be̱ moto nu “dili.” Y’eyala ye pe̱ ná e tukwabe̱ ná “ńangame̱n edube,” “nu mabole̱ mambo na iwiye̱,” to̱ “nu be̱n bedangwedi be mabole̱ ná bane̱ ba bole mo̱ edube.” Nik’e si mapula kwala ná o s’angame̱n yo̱, to̱ po̱ngo̱ make̱ko̱. (Mul. 3:1, 4) Nde, wangame̱n no̱ngo̱ m’bē̱ mo̱ngo̱ me̱se̱  mweńa. Yete̱na o be̱n dina la moto beno̱ ná ba lakisane̱ na moto ńena beno̱ ná ba se̱me̱ye̱ omo̱ń ao, mwemba mu me̱nde̱ bola wa edube.

15. Si be̱ “leme̱ loba” na si to̱ndo̱ la “muse̱ṅ ma bobe” nje nik’e mapulano̱ kwala e?

¹⁵ Nu titi “leme̱ loba” nik’e mapula nde kwala ná we mbale̱, te̱ite̱i, we pe̱ moto beno̱ ná ba lakisane̱. O malondise̱ byala bo̱ngo̱, o si mawo̱ndo̱ pe̱ to̱ bane̱. (Min. 3:32) Nu si ‘to̱ndi muse̱ṅ ma bobe’ nik’e mapula nde kwala ná we te̱ite̱i o bekwali ba ńunga na bane̱ na o mbadi o mabolane̱no̱ mo̱ni. O si mabolane̱ mulatako mo̱ngo̱ na bonasango o mwemba o mbad’a mukubo ná o kuse mo̱ni.

16. (a) Nje byala ná ‘nu si to̱ndi mao’ be mapulano̱ kwala e? (b) Nje be̱ne̱ la “mulema mwe ná pe̱ń” di mapulano̱ kwala e?

¹⁶ Nu si ‘to̱ndi mao’ nik’e mapula nde kwala ná o si mańo̱ belam buka moyo to̱ be̱ne̱ dina la muńo̱ belam nunde̱ne̱. Nu be̱n “mulema mwe ná pe̱ń” nik’e mapula nde kwala ná o mawe̱le̱ bete̱sedi ba Yehova o ebolo o longe̱ lo̱ngo̱. To̱ná o titino̱ ke̱nge̱nge̱, o be̱n mulatako ma bwam na Loba, nik’e mabola wa musango ma teten.

17. Ne̱ni munasango eno̱ ná a lee̱ ná be ná ba lakisane̱ mo̱ ponda eno̱ “se̱le̱ kekabe̱” e? (1 Timoteo 3:10; ombwa pe̱ duta.)

¹⁷ Nu“se̱le̱ kekabe̱” nik’e mapula nde kwala ná o málee̱ ná be ná ba bake̱ wa m’bē̱. Batudu ba boli te̱ wa lambo la bola, bupe̱ bediedi babu ná batabata name̱ne̱ pe̱ na bediedi be mawe̱ na bebokedi. Be̱ mbaki ná o so̱ṅtane̱ nje wangame̱nno̱ bola na njika ponda wangame̱nno̱ bo̱le̱ y’ebolo. Ni ponda weno̱ bola nje e bakabe̱ wa o mbad’a bwam na ko̱di ńe̱se̱, bane̱ o mwemba ba me̱nde̱ maka, ba bwane̱ pe̱ bońaki bo̱ngo̱ muńe̱nge̱. A batudu, bińo̱ le̱le̱me̱ o longa bonasango ba dubisabe̱. (Langa 1 Timoteo 3:10.) Mo̱ lo be̱n bonasango ba dubisabe̱ bena ba be̱n 10 la mbu nate̱na 14 la mbu to̱ bena be eso̱mbe̱ e? Mo̱ ba be̱n jokwa la babo̱me̱ne̱, ba maboṅsane̱ pe̱ ndongame̱n e? Mo̱ ba ko̱lo̱ngo̱ne̱ bola malabe̱ o ndongame̱n na no̱ngo̱ dongo o ebol’a dikalo e? Yete̱na e, bińo̱ bola babo̱ m’bē̱ bupisane̱ mimbu na bete̱medi babu. Na ninka nde, ben beso̱mbe̱ beno̱ ná ba “se̱le̱ kekabe̱.” Ponda ba me̱nde̱no̱ be̱ne̱ 17 nate̱na 19 la mbu, be ná ba be̱ ńai ni dongame̱n o te̱se̱be̱ baboledi.

18. Nje byala ná “a si be̱n misan” be mapulano̱ kwala e?

 ¹⁸ “A si be̱n misan” nik’e mapula nde kwala ná to̱ moto a titi ná a numa wa njo̱m ná o be̱n bedangwedi ba bobe. Nje ye mbale̱ ye nde ná, moto e ná a bake̱le̱ ná kriste̱n ńe o bola lambo la bobe. Bato ba to̱pi mambo ma mpoṅ te̱nge̱ne̱ Yesu, a bīse̱ ná ba me̱nde̱ pe̱ bolane̱ bokwedi bao mulemlem. (Yohane 15:20) Nde, o bengi te̱ be̱ne̱ bedangwedi ba bwam kapo̱ ka Yesu, o me̱nde̱ be̱ne̱ dina la bwam o mwemba.—Mat. 11:19.

19. Nje byala ná ‘mom’a muto mō̱’ be mapulano̱ kwala e?

¹⁹ ‘Mom’a muto mō̱.’ Yete̱na o bai, wangame̱n bupe̱ bete̱sedi ba Yehova ba bebayedi jombwea diba—mome mō̱ na muto mō̱. (Mat. 19:3-9) Mome ńe kriste̱n a s’angame̱n wite̱ musonje. (Bon. 13:4) Nde angame̱n pe̱ bola buka nika. Wangame̱n be̱ munj’ango̱ jemea, o s’angame̱n lee̱le̱ bito bape̱pe̱ eto̱nde̱ ye ná e s’angame̱n.—Hiob 31:1.

20. Ne̱ni mome a madie̱le̱no̱ ndabo ao o mbad’a “bwam” e?

²⁰ “Ba madie̱le̱ bana babu na mandabo mabu bwam.” Yete̱na we sango a mbia, wangame̱n no̱ngo̱ m’bē̱ mo̱ngo̱ mweńa. Die̱le̱ jowe̱ la ndabo a mbia ponda ye̱se̱. Te̱ dikalo ponda ye̱se̱ na elong’ango̱ ya mbia te̱ etum te̱ weno̱ ná o bola nika. Ongwane̱ bana bo̱ngo̱ ná ba be̱ne̱ mabu mulatako na Yehova. (Efe. 6:4) Moto nu mombweye̱ mbia mao a malee̱ nde ná e ná ombwea mwemba.—Ombwa 1 Timoteo 3:5.

21. Yete̱na o si bedi be̱ muboledi, nje weno̱ ná o bola e?

²¹ A bonasango, yete̱na lo titi baboledi, son bińo̱ dutea o nje e kwalabe̱ o din jokwa, lo kane̱ pe̱ Yehova jombwea nika. Bińo̱ okwa bede̱mo̱ be mapule̱ o be̱ baboledi nde lo po̱nge pe̱ miwe̱n o sa mo̱. Dutea ońola ndolo o be̱nedino̱ Yehova name̱ne̱ pe̱ na bonasango na bonańango. Ouse̱ ńo̱ng’ango̱ ńa bolea babo̱. (1 Pet. 4:8, 10) Bolea la mbia mo̱ngo̱ ma mudī di me̱nde̱ wanea wa muńe̱nge̱. Yehova a namse̱ miwe̱n o mapo̱ngo̱no̱ ná o be̱ ńai ni dongame̱n o be̱ muboledi!—Fil. 2:13.