Nje ye ná yongwane̱ wa o jokwa ponda ye̱se̱
MO̱ YE wa ndutu o tombise̱ jokwa lo̱ngo̱ la Bibe̱l la wame̱ne̱ ponda ye̱se̱ na benga pe̱ bwane̱ mo̱ muńe̱nge̱ e? Nika ńe ná e po̱ye̱ biso̱ be̱se̱ ponda iwo̱. Nde dutea te̱ jombwea mambo mō̱ di mabolano̱ ponda ye̱se̱, k’eyembilan, jo̱ke̱le̱. Je te̱ jo̱ke̱le̱ nik’e mano̱ngo̱ biso̱ ponda na miwe̱n, nde ombusa ponda di masenga bwam jita! Jokwa la Bibe̱l pe̱ le nde ka “jo̱ke̱le̱ la madiba n’eyala” lena di malo̱ke̱. (Efe. 5:26) Jombweye malea mō̱ mena me ná mongwane̱ biso̱:
Tese̱ mudango. Jokwa la Bibe̱l la moto mo̱me̱ne̱ le nde lambo diwo̱ oteten ma ma “mweńa” kriste̱n e s’angame̱nno̱ ye̱use̱ (Fil. 1:10, nwt-F) Ná o si dimbea bupe̱ mudango mo̱ngo̱, we̱le̱ mo̱ o epolo mu me̱ne̱ne̱no̱ bwam, k’eyembilan o ebambu to̱ o jombe̱ la frigo. To̱ we̱le̱ nge̱ṅ o telefon ńa ńumbe minuti to maninga obiana pond’ango̱ ńa jokwa e mapo̱.
Po̱so̱ ponda to̱ mbad’a jokwa bena be bwam ońol’ango̱. Mo̱ ye wa bu o be̱ mususu o jokwa na bo̱bise̱ la ńolo ponda bwaba to̱ son a ponda e? O bi nje ye bwam ońol’ango̱. Te̱se̱ so̱ pond’ango̱ ńa jokwa bupisane̱ bete̱medi bo̱ngo̱. Yete̱na pond’ango̱ ńa jokwa e po̱i nde o si be̱n ńo̱ng’a jokwa, we ná o bola ná yokwe to̱ ońola dom la minuti. Woko te̱ to̱ ońola son a ponda, we ná wokwa mambo jita. Yen ebe o botedi te̱, we ná o be̱ne̱ ńo̱ngi o walane̱ jokwa oboso.—Fil. 2:13.
Domse̱ oboso ba ponda nje o me̱nde̱no̱ jokwa. O jai te̱ nde o botea dutea nje o me̱nde̱no̱ jokwa, we ná o si ‘bolane̱ pond’ango̱ bwam.’ (Efe. 5:16) Tila tem’a mato̱ti mena o me̱nde̱no̱ pula jokwa. O be̱n te̱ myuedi jombwea lambo o titino̱ so̱ṅtane̱, tila mo̱. O su la jokwa te̱, we ná o bata mato̱ti mape̱pe̱ o ma o me̱nde̱no̱ pula jokwa.
Wana mawengisan yete̱na nik’e mapula. Wana ngusa mawengisan o mudango mo̱ngo̱, k’eyembilan ponda o matombise̱no̱ o jokwa to̱ mato̱ti o mapo̱so̱no̱ o jokwa. Nje ye mweńa—e titi su ininga, ponda ininga, to̱ nje o mokwano̱—nde ná wokwe ponda ye̱se̱.
Joko te̱ ponda ye̱se̱, nik’e mawanea biso̱ tombwane̱ dinde̱ne̱. Di mabata sisea be̱be̱ na Yehova, di mokwa o no̱ngo̱ bedomsedi ba bwam, nik’e membe̱ pe̱ biso̱.—Yos. 1:8.
