Mo̱ o mapula bata busane̱ tombwane̱ o jokwa lo̱ngo̱ la Bibe̱l e? We ná o bupe̱ man malea ná o be̱ne̱ epol’a bwam, e mongwane̱ wa o jokwa o mbad’a bwam:

• Po̱so̱ epol’a bwam. Yete̱na nika ńena e we̱le̱ be̱, wasa epolo yena e si walame̱n na yena e be̱n mwaye ma bwam, ńai weno̱ ná o langa bwam. We ná o ja o o̱fis to̱ oboso ba tebedi, to̱ po̱so̱ epol’a bwam ye o eboko.

• Wasa epolo yena weno̱ ná o be̱ wame̱ne̱. Yesu a ta a po̱so̱ o kane̱ “mesanedi” o “wuma e we̱nge̱medi.” (Marko 1:35) Yete̱na o titi ná o be̱ne̱ epolo weno̱ wame̱ne̱, we ná o bīse̱ belongi bo̱ngo̱ ba mbia to̱ ba be o tuṅ na wa mudango ma jokwa lo̱ngo̱, o langwea pe̱ babo̱ ná ba si kwalisane̱ wa o ni ponda.

• Be̱ mususu o jokwa lo̱ngo̱. Yete̱na o mabolane̱ nde telefon ango̱ to̱ tafe̱l’ango̱ o jokwa, wań mo̱ ná e sumba to̱ we̱le̱ mo̱ o “mode avion” ná mumban mu si takise̱ wa. Niponda weno̱ jokwa, wo̱nge̱le̱ te̱ lambo diwo̱ wangame̱nno̱ bola, tila mo̱ o dipapa ná o si dimbea bola mo̱ ombusa ponda nde walane̱ jokwa lo̱ngo̱ oboso. Yete̱na o titi we̱le̱ be̱ mususu, se̱le̱ jembe̱ jokwa ná o dangwe son to̱ ná o ko̱ke ńolo.