OTETEN A bato ba bila ba kiṅe̱ David o ta o be̱ne̱ be̱n ba bato ka Selek mot’a Bonaamon, Uria mot’a Bonahet na Yitma ńa Moab. a (1 Mya. 11:39, 41, 46) Mulo̱n ma bila ma David mu ta pe̱ mu be̱ne̱ ‘bato ba Kreti na ba Pleti, na bato ba Gat.’ (2 Sam. 15:18) E me̱ne̱n ná bato ba Kreti na bato ba Pleti ba ta nde ba wa o mbia mō̱ na Bonafilistia. (Hes. 25:16) Bato ba Gat pe̱ ba ta nde baje̱ o mundi ma Filistia ba tano̱ ba bele̱ ńa Gat.—Yos. 13:2, 3; 1 Sam. 6:17, 18.

Ońola nje David a no̱ngino̱ be̱n ba bato o mulo̱ṅ mao ma bila e? Ońolana a ta mbaki ná ba ta mo̱ jemea, nde buka nika pe̱ ba ta Yehova jemea. Byalati bō̱ be mombweye̱ Bibe̱l be kwali jombwea bato ba Kreti na bato ba Pleti ná: “Ba bengi be̱ David jemea to̱ o bete̱medi be ndutu buka be̱se̱ a so̱be̱no̱ ke̱ e kiṅe̱.” Ne̱ni nika e? Ponda “bato ba Israel be̱se̱” basumwe̱no̱ na David o bupe̱ Seba mot’a mpungu mō̱, bato ba Kreti na ba Pleti ba bengi sue̱le̱ David, bongwane̱ pe̱ mo̱ o bo̱le̱ pamo ńena Seba a wanno̱. (2 Sam. 20:1, 2, 7) Mudiyo mupe̱pe̱, Adoniya mun’a kiṅe̱ David a puli sua epol’a kiṅe̱. Nde bato ba Kreti na ba Pleti ba bengi be̱ David jemea, bongwane̱ pe̱ o te̱se̱ Salomo ńena Yehova a tano̱ a po̱so̱, ka kiṅe̱ o timbane̱ David.—1 Ki. 1:24-27, 38, 39.

Mwe̱n a moto nupe̱pe̱ nu ta nu tingame̱ na David a ta nde Itai mot’a Gat. Itai na 600 bao ba bato ba bila ba sue̱le̱ kiṅe̱ David ponda mun’ao Absalom a yo̱mbedino̱ mo̱, a pula pe̱ tute̱le̱ tumba la Israel o te̱nge̱ne̱ kiṅe̱. David a langwedi Itai ná kana a tano̱ nde mwe̱n a moto, a si ta eto̱m wala na mo̱. Nde Itai alabe̱ nde ná: “We̱ne̱ ná Yehova eno̱ longe̱, sango am kiṅe̱ pe̱ eno̱ longe̱, wuma sango am kiṅe̱ a mabe̱no̱, nga ye nde ońola kwedi, nga ońola longe̱, oten nde mūt’ango̱ pe̱ a mabe̱no̱!”—2 Sam. 15:6, 18-21.

To̱ná bato ba Kreti, bato ba Pleti, na bato ba Gat ba tano̱ nde be̱n ba bato, ba ta bemba ná Yehova nde e Loba la mbale̱ na ná David nde a po̱sino̱ ka kiṅe̱. Ye̱ke̱i te̱ David a ta muńe̱nge̱ jita o be̱ne̱ bato ba jemea ka ban o mbasan mao!