Di jokwa di lee̱ biso̱ ná di be̱n nde to̱ti diwo̱ la mweńa lena di mombweye̱ bato ba benama na ange̱l; di to̱ti le nde sangisabe̱ la dina la Yehova dinde̱ne̱. Di to̱ti la mweńa di bambe̱ min myuedi: Mo̱ Yehova nde e Mwanedi ńangame̱n, nu ńena nu maneye̱ o mbadi ni peti bwam e? Di bambe̱ pe̱ min myuedi: Mo̱ mot’a benama e ná a tika be̱ ka ni si be̱n misan e?

Ońola nje di makwalano̱ ná to̱ti le mweńa buka me̱se̱ di mombwea nde dina la Yehova na sangisabe̱ lao e? Jombweye njo̱m ilalo.

Ńaboso, Satan a kwese̱ dina la Yehova mbindo, o mōnda ma Ede̱n. Satan a baise̱ Eva myuedi mena mi boli ná ye̱ne̱ne̱ biana Yehova a si sangi mulema, na ná myeka a tano̱ a te̱se̱ye̱ babo̱ mi ta bwambi. Ponda pe̱ Satan a te̱nge̱ne̱no̱ byala ba Yehova, a ta nde a kwala ná Loba e nde mot’a mpoṅ. Na nika, a kwese̱ dina la Yehova mbindo. ’Wa nde a timbino̱ “Diabolo,” nje e mapule̱ kwale̱ ná “ńalobango.” (Yohane 8:44) Kana Eva a dube̱no̱ mpoṅ ma Satan, a kwe̱m Loba, a lee̱ ná a si mapula ná a be̱ mwaned’ao. (Bbot. 3:1-6) Nate̱na we̱nge̱, Satan a dia a makwese̱ dina la Loba mbindo, tongwea na mpoṅ a macamane̱no̱ te̱nge̱ne̱ Yehova. Ye bato bena ba madube̱ mi mpoṅ lambo di bo̱bi o banga sengane̱ Yehova. Ońola baboledi ba Yehova, mpoṅ te̱nge̱ne̱ dina la bosangi la Yehova me nde si te̱me̱ la sim dinde̱ne̱. Mi mpoṅ nde me njo̱m a boso ńa take ńe̱se̱ na bobe be o wase.

Ni londe̱ iba, ońola bwam ba bewekedi bao be̱se̱, Yehova a me̱nde̱ lingea dina lao, a sangise̱ mo̱ na mbindo ńe̱se̱. Ońola Yehova, nika ńe nde lambo lena le mweńa jita. Ońola nika nde a kwalino̱ ná: “Na masangise̱ dina lam dinde̱ne̱.” (Hes. 36:23) Yesu pe̱ a lee̱ ná bwē nje yangame̱n be̱ mweńa jita o mika ma baboledi ba Yehova ba jemea be̱se̱, ponda a kwalino̱ ná: “Dina lo̱ngo̱ di dubabe̱ [sangisabe̱].” (Mat. 6:9) Bepasi ba Bibe̱l jita be mabonde̱ mweńa ma bola dina la Yehova edube. Byembilan bō̱ ben: “Bola Yehova edub’a dina lao.” (1 Mya. 16:29; Mye. 96:8) “Lo̱ngea edub’a dina lao.” (Mye. 66:2) “Na mabusise̱ dina lo̱ngo̱ bebe be̱se̱.” (Mye. 86:12) Oteten a ngedi ye̱se̱ doi la Yehova mo̱me̱ne̱ di sengabe̱no̱ la mo̱ń, po̱ e ta nde o tempe̱l a Yerusalem, ponda Yesu a kwalino̱ ná: “A Te, busise̱ dina lo̱ngo̱ n’edube!” Na Yehova pe̱ alabe̱ ná: “Na ta na busise̱ mo̱, nde na me̱nde̱ pe̱te̱ busise̱ mo̱.”—Yohane 12:28. a

Ni londe̱ ilalo, mwano ma Yehova mu lati na dina lao. Jombweye mweńa ma dina la Yehova ombusa kekise̱ disukan lena di me̱nde̱ be̱ o su la Janea la ikol’a mbu la Kristo. Ne̱ni ange̱l ye̱se̱ na bato ba benama be̱se̱ ba me̱nde̱no̱ je̱ne̱ dina la Yehova o ni ponda e? Ná jalabe̱ mi myuedi, jo̱nge̱le̱ mambo maba to̱ti le mweńa buka me̱se̱  di bambe̱no̱: ka ni si be̱n misan ńa bato ba benama na doi la byanedi lasam la Loba. Bato ba benama ba si me̱nde̱ pe̱ be̱ne̱ ńo̱ngi o lee̱le̱ nga be Yehova jemea to̱ ke̱m. O ni ponda, ba me̱nde̱ nde be̱ bato be ke̱nge̱nge̱, bena ba mátombe̱ kekise̱ na bena ba mákuse̱ longe̱ la bwindea. Penda to̱ po̱ e si me̱nde̱ pe̱ be̱ ná mbad’a die̱le̱ ńa Yehova nde e peti bwam. O ni ponda, be̱se̱ be o mo̱ń na o wase ba me̱nde̱ be̱ jo̱nge̱le̱ diwo̱, bemea pe̱ ná Yehova nde a be̱ mwaned’abu. Nde ne̱ni pe̱ e me̱nde̱no̱ be̱ na dina la Yehova e?

Bato be̱se̱ ba me̱nde̱ bia mbale̱ jombwea Yehova, ebanja o ni ponda ke̱ dina lao di másangisabe̱ na mbindo ńe̱se̱. To̱ na nika, dina la Yehova di me̱nde̱ nde benga be̱ lambo le mweńa buka me̱se̱ ońola baboledi bao ba jemea o mo̱ń na o wase. Ońola nje e? Ońolana ba me̱nde̱ je̱ne̱ ne̱ni Yehova a mabengano̱ bola mambo ma betańsedi. Kana Yesu a me̱nde̱no̱ bake̱ Yehova janea na sibise̱ la ńolo, Loba a me̱nde̱ “be̱ me̱se̱ o be̱se̱.” (1 Kor. 15:28) Ombusa nika, bato ba benama ba me̱nde̱ bwane̱ “wonj’a bosangi ńa bana ba Loba” muńe̱nge̱. (Rom. 8:21) Yehova a me̱nde̱ pe̱ londise̱ mwano mao ma lata bana bao be o mo̱ń na ba be o wase, ná ba be̱ mbia mō̱ munde̱ne̱.—Efe. 1:10.

Ombusa ma mambo me̱se̱, nje e me̱nde̱ be̱ ńo̱ng’a mbia ma Yehova mwe̱se̱ e? Ye̱ke̱i te̱ di me̱nde̱ be̱ne̱ ńo̱ngi ninde̱ne̱ ńa benga sesa dina la Yehova. Mulo̱ngedi David a tili ná: “Bonam bo be̱ na Yehova Loba . . . Bonam bo be̱ na dina lao la bosangi bebe be̱se̱.” (Mye. 72:18, 19) O bwindea na o bwindea, di me̱nde̱ benga so̱ njo̱m i mabwesane̱ muńe̱nge̱ o sesa Yehova na dina lao.

Dina la Yehova di bambe̱ nje ye̱se̱ e mombweye̱ mo̱. Ponda te̱ di mo̱nge̱le̱no̱ dina la Yehova di me̱ne̱ nde ndol’ao. (1 Yohane 4:8) To̱ buńa, di si me̱nde̱ dimbea ná ndolo nde e tute̱le̱ Yehova o weka biso̱, o bola jabea la diko̱ti, na o lee̱le̱ ná mbad’ao ńa die̱le̱ nde e peti bwam. Nde di me̱nde̱ pe̱ benga je̱ne̱ ne̱ni Yehova a malee̱le̱no̱ biso̱ ndol’ao o bwindea. Di me̱nde̱ be̱ne̱ ńo̱ng’a bata sisea be̱be̱ na Sango asu na ńa lo̱ngea dina lao la bosangi bebe be̱se̱.—Mye. 73:28.