Buńa bō̱ munańango mō̱ nu maje̱ o Seland ńa peńa ombo sinima ni be̱n tema ná “Jongwane̱le̱,” ni malee̱ ne̱ni Yehova a mabweano̱ bato ndedi na ne̱ni pe̱ a malee̱le̱no̱ babo̱ mo̱. (Yes. 63:7-9) A no̱ngi so̱ bedomsedi ba we̱le̱ o ebolo nje a busane̱no̱ o ni sinima na wasa epolo o wanea bato jongwane̱. Bo buńa me̱ne̱ ke̱ e o wala o sapi po̱, a dongame̱n mutued’a muto mō̱ ńena nu si ta nu be̱ne̱ mboa, na mo̱ a baise̱ mo̱ nga e ná andea mo̱ lambo la da. Na nu muto emea. Ponda nu munańango a wanedino̱ nu muto da, a no̱ngi son a ponda o te̱ye̱ mo̱ dikalo, a bolane̱ trakt Ndenge̱ e me̱nde̱ bo̱ buńa bō̱ e?

Na nu muto a buma mbembe. A langwea nu munańango ná a kokisabe̱ nde na bayedi ba ta Mboṅ a Yehova nde e ta yā mimbu jita ese̱le̱no̱ nge’a mbale̱, nde nik’e s’indi a kane̱no̱ Yehova ná ongwane̱ mo̱ o timba na mo̱. Nu munańango o boli so̱ mo̱ Bibe̱l na babo̱ ba te̱se̱ ná ba mabotea jokwa. a

Kapo̱ ka Yehova je ná di lee̱le̱ bato be̱se̱ ndedi, nikame̱ne̱ pe̱ na belongi basu ba mbia na bonasango na bonańango asu o mwemba. Je pe̱ ná di lee̱le̱ bato ndedi ke̱ di mabola me̱se̱ o te̱ye̱ babo̱ dikalo.