O BEBOTEDI, Bonaisrael ba ta ba be̱ne̱ ko̱lo̱ngo̱ne̱ o bola mo̱ni o sue̱le̱ jowe̱ la mbale̱. Nde o mińa ma Yesu, Baju ba ta bangame̱n sawa tax jita, na nik’e bola ná longe̱ di be̱ babo̱ ndutu.

O bwam ba sue̱le̱ ebolo e ta e bolabe̱ o tempe̱l, Bonayuda be̱se̱ bena ba ta ba be̱ne̱ botea 20 ma mbu ba ta bangame̱n sanga njang’a drakma iba. O ebwe’a mbu yaboso, ba ta ba bolane̱ mu mo̱ni ońola mabea na ońola sabangane̱ la tempe̱l Herode a tano̱ a longa. Bonayuda bō̱ ba baise̱ Petro nga Yesu a masawa tax, na Yesu a lee̱ ná e titi bobe o bola nika. Na mo̱ a kwalane̱ Petro we̱ni so̱ mo̱ni ná ba sawe ni tax.—Mat. 17:24-27.

Baboledi ba Loba ba ta pe̱ bangame̱n bola dongo diwo̱ la dom la mumbwa mabu to̱ la mabe̱ne̱ mabu. (Lev. 27:30-32; Mis. 18:26-28) Badiedi ba bebasi ba ta ba yikiye̱ ná ye eto̱m o bola dongo diwo̱ la dom o nje ye̱se̱ moto a tano̱ umbwa, nate̱na o bebolan ka “sisaṅ, pe̱be̱, na ndongo.” Yesu a si sai eboled’a bola dongo diwo̱ la dom, nde a sai nde itab’a babiedi ba kalat’a Loba na farisai.—Mat. 23:23.

O mulemlem a ponda, Bonayuda ba ta pe̱ bangame̱n sawea bato ba Roma tax ońolana ba ta nde owas’a byanedi babu. K’eyembilan ba bena ba ta ba be̱ne̱ mińangadu, ba ta bangame̱n sawa tax na mo̱ni to̱ na mabe̱ne̱ mabu. E makwalabe̱ ná moto a ta be̱ a busise̱ te̱ mikuta mine̱i o mumbwa mao, a ta angame̱n bola bato ba Roma mukuta mō̱ o sawa tax. Mot’a Bonayuda te̱ a ta pe̱ angame̱n sawa njang’a denario po̱. Jombwea ni tax nde farisai i baise̱no̱ Yesu myuedi. Yesu a lee̱ ne̱ni jangame̱nno̱ je̱ne̱ sawa la tax ponda a kwalino̱ ná: “Bola so̱ kaisa mambo ma kaisa, Loba pe̱ mambo ma Loba.”—Mat. 22:15-22.

Nde tax i ta pe̱ i te̱se̱be̱ ońola ńunga i ta yingea to̱ i busa o mundi. Ba ta nde ba ko̱te̱le̱ yi tax o mabo̱, o ko̱n’a mangea mande̱ne̱, to̱ o jingea na busa la mindi, to̱ o madon.

Tax yena bato ba Roma ba tano̱ ba baise̱ bato i ta i bola ná longe̱ di be̱ babo̱ ndutu jita. Mot’a myango ńa Roma mō̱ nu belabe̱ ná Tacite a kwali ná ponda Tibere a tano̱ mwaned’a Roma ke̱ Yesu e o wase, “Bato ba Siria na ba Yuda ba ta ba so̱so̱me̱ye̱ ná ba si sawa pe̱ tax jita, ońolana nik’e ta babo̱ bodilo.”

Mbadi ńena bako̱tedi ba tano̱ ba bola ebol’abu pe̱ e si ta e wamse̱ mambo. Ba bena ba ta ba bola bato ba Roma eyek’a mo̱ni o te̱se̱be̱ ka bako̱tedi nde ba tano̱ ba bake̱ y’ebolo. Ba bako̱tedi bena ba ta ba busane̱ muse̱ṅ eyeka o pond’a ko̱te̱le̱ la tax pe̱ ba ta nde ba loma bato bape̱pe̱ o wala ko̱te̱le̱ mo̱ni; ba pe̱ bena ba lomabe̱ o ko̱te̱le̱ mo̱ni ba ta ba wasea babo̱me̱ne̱ muse̱ṅ niponda. E me̱ne̱ne̱ ná Sakeo a ta a be̱ne̱ yi ńai a bako̱tedi yena i ta i bolea mo̱. (Lukas 19:1, 2) Nje ye mbaki ye nde ná nik’e ta e lingise̱ bato jita, bato ba ta pe̱ ba singe̱ ba bako̱tedi bena ba ta ba po̱ ko̱te̱le̱ tax.