Ná di do̱lisane̱ Yehova, jangame̱n be̱ne̱ dube̱. Nde Bibe̱l e makwala ná “seto̱ be̱se̱ nde ba dube̱.” (2 Tes. 3:2) Ńamuloloma Paulo a kwali nde nika jombwea “bato ba mpenga na ba bobe” bena ba ta ba takise̱ mo̱. Nde nje Paulo a kwalino̱ jombwea dube̱, e mombwea pe̱ jita la bato bape̱pe̱. Bato bō̱ ba mabanga dube̱ ná Loba nde a weki mambo me̱se̱. (Rom. 1:20) Bape̱pe̱ be ná ba kwala ná ba dube̱ ná ngińa po̱ ninde̱ne̱ ńe. Nde kwala la nika di si dongame̱n ná ba do̱lisane̱ Yehova.

Jangame̱n be̱ mbaki ná Yehova e na mbale̱ na ná a me̱nde̱ pe̱ bola be̱se̱ bena ba be̱n dube̱ di bam bowe̱n. (Bon. 11:6) Ná di be̱ne̱ ni ńai a dube̱, di be̱n ńo̱ng’a mudī musangi ma Loba. Ná moto a kuse mudī musangi, angame̱n baise̱ Yehova mo̱ o muka. (Lukas 11:9, 10, 13) Mbadi nipe̱pe̱ ńa mweńa ńa kusa mudī musangi ńe nde ná di lange Bibe̱l, ebanja batiledi bao ba ta nde ba tutabe̱le̱ na mudī musangi. Ombusa bolanga, di no̱nge pe̱ ponda o dutea di po̱nge pe̱ miwe̱n o we̱le̱ nje di langino̱ o ebolo. Di boli te̱ man me̱se̱, mudī musangi ma Yehova mu me̱nde̱ die̱le̱ longe̱ lasu, mongwane̱ pe̱ biso̱ o be̱ne̱ dube̱ di mapule̱ ná di do̱lisane̱ Yehova.