MBU te̱, jita la mido̱ngi ma Yehova mena me tiki mi matimba o bebokedi. Dutea te̱ “muńe̱nge̱ munde̱ne̱ mwe o mo̱ń” ponda te̱ mudo̱ngi mō̱ mu matimbano̱! (Lukas 15:7, 10) Yete̱na o wu o timba o bebokedi, we ná o be̱ mbaki ná Yesu, ange̱l, na Yehova be muńe̱nge̱ o je̱ne̱ ná o te̱m pe̱te̱ o mudi ma mbale̱. Nde we ná o be̱ne̱ mitakisan mō̱ niponda weno̱ keka po̱ngulane̱ mulatako mo̱ngo̱ na Yehova. Njika mo̱ mi e, nje pe̱ ye ná yongwane̱ wa e?

Ombusa babo̱ timba o bebokedi, jita la bonasango na bonańango ba manane̱ mo̱nge̱le̱ ma bobe. Yen ebe o maso̱ṅtane̱ ne̱ni kiṅe̱ David a tano̱ a senga oteten ao. To̱ ombusa mo̱ lakisabe̱ ońola myobe mao, a kwali ná: “Myobe mam mi kwe̱ mba kańena.” (Mye. 40:13; 65:4) Ombusa mo̱ timba o bebokedi, moto e ná a benga bwa ndutu na iso̱n mimbu jita. Isabelle a ta a pangabe̱ lambo ka 20 ma mbu. * Mo̱ ná: “E ta mba ndutu o dube̱ ná Yehova e ná a lakise̱ mba.” O bo̱bi te̱, mulatako mo̱ngo̱ na Yehova mwe pe̱te̱ ná mu bo̱bo̱. (Min. 24:10) Bola me̱se̱ ná nik’e si po̱ye̱ wa.

Bape̱pe̱ be ná ba bwa bo̱ngo̱ ońola nje ye̱se̱ bangame̱nno̱ bola ná ba po̱ngulane̱ pe̱te̱ mulatako mabu na Yehova. Ombusa mo̱ timba o bebokedi, Antoine a kwali ná: “E ta nde biana na dimbedi nde mambo me̱se̱ na tano̱ na bia obiana na mapangabe̱.” Besengedi ka ben be ná be bola ná bō̱ ba bwe bo̱ngo̱ o bolea Yehova na ngud’abu ńe̱se̱.

Di no̱nge eyembilan. Mùdi mu bule̱le̱ te̱ bolongi ba moto, mulema mwe ná mu ńo̱sea mo̱ ke̱ a dutedi ebolo ye̱se̱ a be̱nno̱ na ponda angame̱nno̱ tombise̱ o po̱ngulane̱ mo̱. Mulemlem pe̱ nde yeno̱ yete̱na o boli bobe bonde̱ne̱ bwena bo ńamse̱ mulatako mo̱ngo̱ na Yehova; we ná o bwa bo̱ngo̱  ońola miwe̱n me̱se̱ wangame̱nno̱ po̱ngo̱ ná o po̱ngulane̱ mo̱. Nde o be̱n mambo me ná mongwane̱ wa.

Yehova mo̱ na biso̱ ná: “Ya, di ka!” (Yes. 1:18) Wangame̱n bola nje ye̱se̱ ngud’ango̱ e madie̱le̱no̱ wa o “ka” na Yehova. Yehova a mabwane̱ miwe̱n mo̱ngo̱ muńe̱nge̱. Dutea te̱: Ponda o timbino̱ na Yehova, o boli nde mo̱ epolo ná alabe̱ Satan nu mato̱po̱ne̱ mo̱ dibena!—Min. 27:11.

O timbino̱ na Yehova, o sisedi nde mo̱ be̱be̱, mo̱ pe̱ a kakane̱ ná a me̱nde̱ sisea wa be̱be̱. (Yak. 4:8) Ye mbale̱ ná bonasango na bonańango be muńe̱nge̱ o je̱ne̱ ná o timbi o bebokedi. Nde nik’e si dongame̱n. Wangame̱n benga jouse̱ ndolo o be̱nedino̱ Yehova Sango ango̱ na diko̱m lo̱ngo̱. Ne̱ni weno̱ ná o bola nika e?

Keka te̱se̱ye̱ wame̱ne̱ mambo weno̱ ná o we̱le̱ bola. Yen ebe o dia o mo̱nge̱le̱ mambo wokono̱ jombwea Yehova na makaki mao. Nde tatan wangame̱n pe̱te̱ botea bola mambo mō̱ ponda ye̱se̱ ka te̱ dikalo, jukea o ndongame̱n na tombise̱ ponda na bonasango na bonańango. Jombweye mambo mō̱ weno̱ ná o te̱se̱ye̱ wame̱ne̱.

Kane̱ Yehova ponda ye̱se̱. Sango ango̱ ńe o mo̱ń a bi ná ye ná e be̱ ndutu ná o kane̱ mo̱ yete̱na diwuse̱ o po̱ngino̱ di dia di mańo̱so̱ wa mulema. (Rom. 8:26) Nde, “be̱ titimbe̱ o muka,” langwea Yehova nate̱na njika dikala o be̱nno̱ ńo̱ngi o be̱ diko̱m lao. (Rom. 12:12) Andrej a dia a mo̱nge̱le̱ ná: “Na ta na pungwea na ta pe̱ na bwa iso̱n. Nde ombusa muka te̱, be besengedi be ta be wo̱ye̱. Nik’e ta e bola ná na bate be̱ne̱ musango ma teten.” O si bi te̱ nje weno̱ ná o kwala, ombwa mika ma David ombusa mo̱ jate̱le̱ mi maso̱be̱ o Myenge 51 na 65.

Okwa Bibe̱l ponda ye̱se̱. Nik’e me̱nde̱ jongwane̱ wa o jouse̱ dube̱ lo̱ngo̱, na bola pe̱ ná ndolo o be̱nedino̱ Yehova e ńake. (Mye. 19:8-12) Felipe mo̱ ná: “Na timbi nde bo̱bo̱ ońolana na si ta na te̱se̱ mambo ma mudī o epol’a boso. Na si ta pe̱ na pula po̱ngo̱ milemlem ma mawuse̱, na no̱ngi so̱ bedomsedi ba jokwa ponda ye̱se̱.” Wa pe̱ we ná o bola nika. O mapula te̱ bia njika mato̱ti weno̱ ná wombwea o jokwa lo̱ngo̱ la wame̱ne̱, we ná o baise̱ diko̱m diwo̱ lou jongwane̱.

Po̱ngulane̱ pe̱te̱ mulatako mo̱ngo̱ na bonaso̱ngo̱ na bonańo̱ngo̱. Bato bō̱ bena ba matimbe̱ o bebokedi ba yo̱ki bwa bo̱ngo̱ ońola mambo mena bane̱ beno̱ ná ba kwala. Larissa embi ná: “Na ta na bwa iso̱n jita. Na ta nde ne̱ne̱ biana na sambwe̱le̱ nde bonasango na bonańango am. Na jane̱ be besengedi pond’a bwaba.” Be̱ mbaki ná batudu na yine̱ kriste̱n you be be̱be̱ o jongwane̱ wa o po̱ngulane̱ mulatako mo̱ngo̱ na Yehova. (Ombwa edinge̱le̱ “ Nje batudu beno̱ ná ba bola e?”) Be muńe̱nge̱ nika o timbino̱, ba mapula pe̱ ná o be̱ bonam!—Min. 17:17.

Nje ye ná yongwane̱ wa o bata sisea mwemba be̱be̱ e? So̱lise̱ wame̱ne̱ o mambo mena bonasango na bonańango ba mabolano̱—ukea o ndongame̱n o te̱ pe̱ dikalo ponda ye̱se̱. Ne̱ni nik’e me̱nde̱no̱ jongwane̱ wa e? Felix mo̱ ná: “Mwemba mu ta mwenge̱le̱ ná na timbe. Na kasabe̱ pe̱ bwam. Bato be̱se̱ bongwane̱ mba o je̱ne̱ pe̱te̱ ná ne nde elong’a mwemba, ná Yehova a lakise̱ mba, na ná ne ná na benga bolea mo̱.”—Ombwa edinge̱le̱ “ Nje weno̱ ná o bola e?”

Satan a me̱nde̱ benga takise̱ wa niponda weno̱ jana ná o po̱ngulane̱ mulatako mo̱ngo̱ na Yehova. (Lukas 4:13) Ná o boṅsane̱ wame̱ne̱, ouse̱ mulatako mo̱ngo̱ na Yehova botea tatan.

Yehova a kakane̱ mido̱ngi mao ná: “Na me̱nde̱ pulise̱ mu mu pimbedi, na matimbane̱ pe̱ mu mu pambilan o dibemba, na me̱nde̱ kaka mu mu buedi, nembe̱ mu mu maboe̱.” (Hes. 34:16) Yehova ongwane̱ jita la mido̱ngi mao o po̱ngulane̱ mulatako mabu na mo̱. Be̱ mbaki ná a mapula jongwane̱ wa o benga po̱ngulane̱ na jouse̱ mulatako mo̱ngo̱ na mo̱.