Bito baba ba ta ba dangwa mwemba o nge’a Baguio o Filipino. Na babo̱ be̱ne̱ ebamban a dikalo e te̱m, nde ba si sisedi. Munańango Helen ńena nu ta nu te̱me̱ be̱be̱ na y’ebamban, e̱nno̱ babo̱ na mo̱ a ńamwe̱le̱ lo̱. Ba bito ba si te̱m, nde lo̱ la munańango Helen di tapi babo̱ jita.

Ombusa ponda, ke̱ be o mutoa timba o mboa, na babo̱ be̱ne̱ matila mande̱ne̱ JW.ORG oboso ba ndabo a Janea po̱. Na nika ńo̱nge̱le̱ babo̱ ná be̱n mulemlem ma matila son a ponda o ebamban. Ba sibi so̱ na babo̱ bala jombwa mudango ma ndongame̱n ya myemba mi mukeye̱ o ni Ndabo a Janea.

Ba bito bukedi so̱ o ndongame̱n po̱ ni bupe̱. Nja be̱nno̱ ke̱ be o jingea o Ndabo a Janea e? Helen! Dibokime̱ne̱ na babo̱ bemba ná mo̱ nde a ńamwe̱le̱ babo̱ lo̱ bone̱ buńa. Helen mo̱ ná: “Ne̱nno̱ babo̱ be o sisea mba be̱be̱, na bo bo̱ngo̱ son, no̱nge̱le̱ ná yen ebe na boli lambo la bobe.” Nde ba bito ba tele̱ye̱ Helen nje e tombi.

Ndongame̱n e bwese̱ be beso̱mbe̱ ba bito muńe̱nge̱ jita; bonasango na bonańango pe̱ ba kasi babo̱ bwam. Ponda be̱nno̱ bato be o sangise̱ Ndabo a Janea, babo̱ pe̱ ba puli jongwane̱. Mō̱ ńabu a timbi jasumwe̱ o ekombo, nde nune̱ a botedi jukea o ndongame̱n a botea pe̱ jokwa la Bibe̱l—nika ńe̱se̱ buka te̱ ońolana moto a ńamwe̱le̱ babo̱ lo̱!