O BUŃA ba Muko̱su 18 ma Dimo̱di 2023, bobia ba tobotobo bo busi o jw.org; bo bobia bo ta bo kwala ná munasango Gage Fleegle na munasango Jeffrey Winder ba te̱se̱be̱ ka belongi ba Dibe̱le̱ di Madie̱le̱ la Mboṅ a Yehova. Yā pond’a bwaba ba bonasango babane̱ beno̱ bolea Yehova na jemea.

Munasango Fleegle a koki nde o mbe̱ng’a Pennsylvania o Amerika, bayedi bao ba ta pe̱ nde baboledi ba Loba. Ponda a tano̱ ekoke̱le̱, mbia mao malo ja o mundi musadi mō̱ mwena mu ta mu be̱ne̱ ńo̱ng’a bate̱ dikalo. Son a ponda ombusa nika, a dubisabe̱ o buńa 20 ba mo̱di ma Tinini 1988.

Bayedi ba munasango Fleegle ba tute̱le̱ mo̱ ponda ye̱se̱ o no̱ngo̱ ebol’a pond’a mususu. Ba ta ba be̱ne̱ ko̱lo̱ngo̱ne̱ o kasa baboledi b’ebondo na bonasango bena ba ta ba bolea o Bete̱l ombo’abu; munasango Fleegle a ta so̱ e̱ne̱ ne̱ni ba bonasango na bonańango ba tano̱ bonam. Myo̱di to̱ mininga ombusa dubise̱ lao, a botedi ebol’a paonia ńa pond’a mususu o buńa baboso ba mo̱di ma Ńe̱te̱ki 1989. Mbu miba ombusa nika a londise̱ nje a tano̱ a te̱se̱ o bola, ke̱ a be̱n 12 la mbu, nika ńe nde bolea o Bete̱l. A botedi bolea o Bete̱l o Brooklyn o mo̱di ma Maye̱se̱ 1991.

O Bete̱l, munasango Fleegle o boli ebolo mbu lo̱mbi o wum’a bangwa la kalati, obiana a malomabe̱ o O̱fis ń’ebol’a dikalo. A ni ponda me̱ne̱, a tombise̱ ngus’a mimbu o mwemba ma eyem’a Rusia. O mbu 2006, a bai munańango Nadia, na nun a po̱ bolea o Bete̱l na mo̱. Ba sue̱le̱ pe̱ myemba ma eyem’a Po̱to̱ki na ma eyem’a Pańa, buka dom la mbu. Ombusa mo̱ bolea mimbu jita o O̱fis ń’ebol’a dikalo, munasango Fleegle a lomabe̱ o O̱fis a Epep’a Belēdi, na o O̱fis a Epep’a Ebolo pe̱ ombusa ponda. O mo̱di ma So̱ṅe̱ 2022, a te̱se̱be̱ ka mongwanedi ń’Epep’a Ebolo ya Dibe̱le̱ di Madie̱le̱.

 Munasango Winder o koki nde o mundi ma Murrieta o Kalifornia o Amerika. Bayedi bao nde bokwe̱le̱ mo̱ mbale̱, a dubisabe̱ pe̱ nde o 29 ma So̱ṅe̱ 1986. Mo̱di mu bupe̱, a no̱ngi ebol’a paonia ń’epas’a ponda. A bwane̱ mo̱ muńe̱nge̱ kańena a puli walane̱ nika oboso. Ombusa mo̱ bolea ka paonia ń’epas’a ponda myo̱di to̱ mininga, a botedi bolea ka paonia ńa pond’a mususu o buńa baboso ba Maye̱se̱ 1986.

Ponda a tano̱ ekoke̱le̱, munasango Winder a ta ala pe̱pe̱le̱ bonańango ao ba batudu baba bena ba ta ba bolea o Bete̱l. Di pe̱pe̱le̱ di boli mo̱ ńo̱ng’a londise̱ dipapa o bolea o Bete̱l ombusa ponda. O mo̱di ma Emiase̱le̱ 1990, a belabe̱ o bolea o milongi ma Bete̱l o Wallkill.

Munasango Winder a boli ńai na ńai a bebolo o Bete̱l, k’eyembilan sangise̱ la bepolo, o mōnda, na o o̱fis a Bete̱l. A bai munańango Angela o mbu 1997, be pe̱ bolea o Bete̱l mwemba botea ni ponda. O mbu 2014 ba lomabe̱ o bolea o Warwick, wuma munasango Winder a no̱ngino̱ dongo o ebol’a longa la mulopo m’ebolo. O mbu 2016 ba lomabe̱ o wum’a belēdi ya Watchtower o Pate̱rso̱n, wuma munasango Winder a bolino̱ ebolo o O̱fis a Bosenga/Sinima. Mbu mine̱i ombusa ponda, ba timbi pe̱te̱ o Warwick, na munasango Winder a lomabe̱ o bolea o O̱fis a Epep’a Baboledi. O mo̱di ma So̱ṅe̱ 2022, a te̱se̱be̱ ka mongwanedi ń’Epep’a Baboledi ya Dibe̱le̱ di Madie̱le̱.

Di makane̱ ná Yehova a namse̱ njoasoa ba bonasango bena be nde “mabea,” nika ba mabengano̱ bola ebolo na ngińa o sue̱le̱ myam ma Janea.​—Efe. 4:8.