Diko̱ti lena Yesu a sawono̱ na maya mao nde di mabole̱ ná myobe masu mi lakisabe̱. (Efe. 1:7) Nde Bibe̱l e makwala ná: ‘[Loba] a si langi myobe myena mi bolabe̱ o mińa mi tombi,’ nika ńe nde ná a ta a lakise̱ myobe mi bolabe̱ obiana Yesu a masawa diko̱ti. (Rom. 3:25) Ne̱ni Yehova a we̱lino̱ bola nika nde o mulemlem ma ponda pe̱ a bupe̱ bete̱sedi bao jombwea te̱me̱ la sim e?

Botea ponda Yehova a kakane̱no̱ ná a me̱nde̱ busise̱ “mbota” ni masunge̱ bato ba benama be jemea, o miso̱ mao e ta nde biana diko̱ti di másawabe̱. (Bbot. 3:15; 22:18) Loba a ta mbaki ná o ponda a te̱se̱no̱, Mun’ao a me̱nde̱ jemea o sawa diko̱ti. (Gal. 4:4; Bon. 10:7-10) Ponda Yesu a tano̱ o wase, Yehova a ta a bola mo̱ ngińa o lakise̱ myobe, to̱ná diko̱ti di si tano̱ di másawabe̱. A we̱li nde bola nika ebanja a ta a bia ná diko̱ti a me̱nde̱no̱ sawa, di me̱nde̱ kudumane̱ myobe ma ba bena ba dube̱.—Mat. 9:2-6.