Yesu a tele̱ye̱ ne̱ni di me̱nde̱no̱ “bia ná janea la Loba je be̱be̱.” (Lukas 21:31) Oteten a mambo a bīse̱no̱, o be̱n bila bende̱ne̱, soa la mińangadu dinde̱ne̱, njai na maboa. Di me̱ne̱ pe̱ ma mambo me̱se̱ we̱nge̱.​—Lukas 21:10-17.

Bibe̱l e mabīse̱ ná “o mińa misukan” ma byanedi ba bato ba benama, bato ba me̱nde̱ be̱ne̱ bedangwedi ba bobe. We ná o langa be beteledi o 2 Timoteo 3:1-5. O me̱ne̱ te̱ be beboledi we̱nge̱, ye̱ke̱i te̱ o memba ná y’eding’a Bibe̱l ye mulatako na nje e matombe̱ we̱nge̱.

Nje nika e mapulano̱ o kwala e? Ná ponda ńena Janea la Loba jangame̱nno̱ wana mawengisan mande̱ne̱, mena ma me̱nde̱ tukwe̱ longe̱ o mbad’a bwam ńe be̱be̱. (Lukas 21:36) O Bibe̱l, Loba a kakane̱ mambo ma bwam ońola wase, na ońola bato ba me̱nde̱ je̱ oten. Byembilan bō̱ ben.

“Na ngińa, edube na janea ba bolabe̱ mo̱ [Yesu]; na matumba, bekombo na leme̱ le̱se̱ ba kumwa bolea mo̱. Doi lao le nde la bwindea, di si mabo̱, janea lao di si mabulea.”​—DANIEL 7:14.

Nje nika e mapulano̱ o kwala: We ná o bwane̱ longe̱ muńe̱nge̱ owas’a janea di buki manea me̱se̱ lena Loba a te̱se̱no̱, di be̱n pe̱ Mun’ao ka Kiṅe̱.

“To̱ moto a si me̱nde̱ pe̱ kwala na: Na si jai bwam.”​—YESAYA 33:24.

Nje nika e mapulano̱ o kwala: O si me̱nde̱ pe̱ boa to̱ buńa; o me̱nde̱ be̱ longe̱ esibe̱ wo̱.

“A mabo̱le̱ bila nate̱na o su la wase.” ​—MYENGE 46:10.

Nje nika e mapulano̱ o kwala: Bila be si me̱nde̱ pe̱ be̱, to̱ ndutu ye̱se̱ bila be mawanano̱.

“Ńabobe a si mabe̱ pe̱ . . . bamulema mu sibi ba me̱nde̱ sangwa ekombo.”​—MYENGE 37:10, 11.

Nje nika e mapulano̱ o kwala: Bato ba bobe ba si me̱nde̱ pe̱ be̱, nde buka te̱ ba bena ba mapule̱ sengane̱ Loba.

“Ba me̱nde̱ longa mandabo, na ja pe̱ oten, ba de̱ midiki ma wań, na da pe̱ bepuma bao.” ​—YESAYA 65:21, 22.

Nje nika e mapulano̱ o kwala: Wase ńe̱se̱ e me̱nde̱ be̱ mpesa. Loba a me̱nde̱ jalabe̱ muka masu ná jemea lao di bolabe̱ “o wase.”​—Mateo 6:10.