Kwedi ńe nde nge’a bato be̱se̱
DUTEA ná we o jombwa sinima ńe o lee̱ moto nu busi dina, k’eyembilan mot’a musiki ńena o to̱ndino̱ jita. O bebotedi, ba malee̱ mo̱ ke̱ a dia muna, ne̱ni eno̱ jokwa o bolane̱ elongisan a musiki. Denge̱ ba malee̱ ne̱ni eno̱ lo̱ngo̱ o bekombo jita, na mo̱ a timba biane̱ o wase ńe̱se̱. Nde o su la sinima, a timbi duna na mo̱ a wo̱.
Nin sinima ńe nde myango ma moto ńena nu ta longe̱ na mbale̱, nu wedi pe̱ ombusa ponda. To̱ e be̱ nde ná mi myango mi mombwea nde mot’a musiki, nika ńe pe̱ ná e po̱ye̱ mot’a mabie̱ ma wase, moto nu matune̱ ńolo, to̱ moto nupe̱pe̱ nu busi dina. Nu moto e ná a be̱ ná a boli mambo ma bwam jita, nde dutea te̱ nje ye̱se̱ a wusano̱ bata bola yete̱na a si wusa duna to̱ wo̱.
Nik’e mabwesane̱ ndutu, nde nge’a bato be̱se̱ ni. (Mulangwedi 9:5) To̱ di bola nde nje, di titi ná di samba bodun na kwedi. O sumo te̱ nika, diboa to̱ mbeu a ńolo be ná ba wutise̱ longe̱ lasu. Ka nje te̱ Bibe̱l e matele̱ye̱no̱, je nde ka mūdi to̱ mba, “mwena mu me̱ne̱ne̱ son a ponda, na mo̱ mu ńo̱ngo̱.”—Yakobo 4:14.
Kana jeno̱ ná di wo̱ to̱ njika ponda nde, bato bō̱ ba madie̱le̱ nde longe̱ labu na din jo̱nge̱le̱ ná “di de so̱, di ńo̱ pe̱; ebanja kie̱le̱ di mawo̱.” (1 Korinto 15:32) Nde bato ba madie̱le̱ nde longe̱ labu o nin mbadi ońolana ba bi ná longe̱ di titi mbaki, ba si be̱n pe̱ to̱ dipita ońola kie̱le̱ ni maye̱. Pomane̱ to̱ jindea, sepo̱n ke̱ we oteten a mitakisan minde̱ne̱, we ná o baise̱ ná ‘Mo̱ longe̱ le̱se̱ din e?’ Owe̱ni weno̱ ná o so̱ jalabe̱ e?
We̱nge̱, jita la bato di pite̱ ná bamabie̱ ba me̱nde̱ so̱ jalabe̱. Bamabie̱ na mado̱kita ba so̱i mambo ma mabole̱ ná longe̱ la bato di bate be̱ bwaba. Bō̱ pe̱ be o wasa ne̱ni bola ná longe̱ la bato di bate be̱ bwaba buka nika. E be̱ ná miwe̱n mabu mi tongo to̱ ke̱m, min myuedi mi mabaisabe̱ te̱ nde: Ońola nje di madunano̱, di mawo̱no̱ pe̱ e? Mo̱ musinged’asu kwedi a me̱nde̱ bukabe̱ buńa bō̱ e? Mapapa ma mabupe̱ ma me̱nde̱ kwalea ońola nika na bola pe̱ jalabe̱ la min myuedi: Mo̱ longe̱ le̱se̱ din e?