Loba a langwedi Adam ná: “Buńa o madano̱ [bo bwele] o mawo̱.” (Bebotedi 2:17) Be byanedi be si wusa be̱ne̱ epolo e be̱ te̱ ná Loba a ta nde a weka Adam ná a dune a wo̱ pe̱. Adam a ta a bia ná a si de te̱ bo bwele, a si wusa wo̱.

Adam na Eva ba si ta ba be̱ne̱ ńo̱ng’a da bo bwele ná ba be̱ longe̱, ebanja mōnda mu ta mu londa na myele mi maye̱ bepuma. (Bebotedi 2:9) Ba si de te̱ bo bwele, ba wusa nde lee̱le̱ sengane̱ labu o mbasan ma Mubole̱ babo̱ longe̱. Nik’e wusa pe̱ lee̱ ná ba memba ná Loba a be̱n bwam o langwea babo̱ nje bola.

Ná di so̱ṅtane̱ ońola nje Adam na Eva ba wedino̱, jangame̱n jombwea ekwali ewo̱ yena e matape̱ biso̱ be̱se̱. Satan Diabolo a bolane̱ ńama-bwaba o to̱po̱ mpoṅ munde̱ne̱. Myango ma Bibe̱l mi makwala ná: “Nde ńama-bwaba e ta misomba buka ńam’eyidi ye̱se̱ yena Yehova Loba a wekino̱. Na mo̱ e kwalane̱ muto na: Obwa, Loba a kwali na mbale̱ na: Lo si da ńai a myele ye̱se̱ ye o mōnda e?”​—Bebotedi 3:1.

Na Eva alabe̱ mo̱ ná: “Je wonja o da bepuma ba ńai a myele ma mōnda ye̱se̱; nde ońola bepuma ba bwele bo te̱m oteten a mōnda, Loba a kwali na: Bińo̱ lo si da mo̱, lo si tapa pe̱ to̱ mo̱, lo si ya be̱ lo wo̱.” Na ńama-bwaba e kwalane̱ mo̱ ná: “Lo si mawo̱ tomtom. Nde Loba a bi bwambwam ná o buńa lo madano̱ mo̱, miso̱ mańu ma matelame̱, nde lo mabe̱ ka Loba mo̱me̱ne̱, lo bia nje ye bwam na bobe.” Satan a kwali so̱ nde ná Yehova e nde ńalobango, nu mabangane̱ Adam na Eva lambo la bwam.​—Bebotedi 3:2-5.

Eva a dube̱ be byala. Na mo̱ ombwa bo bwele, e̱ne̱ ná bepuma bao be do̱li, be mano̱ngo̱ne̱ pe̱ mulema! Na mo̱ a sambise̱ dia, a pata epuma, a da mo̱. Bibe̱l e mabata ná: “A bola pe̱ mom’ao nu ta na mo̱, na mo̱ pe̱ a da.”​—Bebotedi 3:6.

E se̱ ndutu Loba a bono̱ o je̱ne̱ ne̱ni bana bao a tano̱ a to̱ndo̱ ba kwe̱mno̱ mo̱ na m’boṅsan! Nje so̱ a bolino̱ e? Yehova a kwalane̱ Adam ná: “O me̱nde̱ . . . timba o mińangadu mena oten nde o no̱ngo̱be̱no̱; ebanja we nde mińangadu, o mińangadu pe̱ nde o matimbano̱.” (Bebotedi 3:17-19) Ońola nika, “mińa me̱se̱ Adam indino̱ mi ta so̱ bebwea ba mbu dibua na mwalalo, nde na mo̱ a wedino̱.” (Bebotedi 5:5) Adam a s’alo o mo̱ń to̱ o epolo epe̱pe̱. A si ta longe̱ obiana Yehova a  maweka mo̱ na mińangadu. A wedino̱ pe̱, a timbi nde mińangadu. A si ta pe̱ longe̱. E se̱ ndedi e!

Kana ba kwe̱mno̱ Loba na m’boṅsan, Adam na Eva ba bo̱lo̱ne̱ ebe̱yed’abu ya ke̱nge̱nge̱ na dipita la be̱ longe̱ o bwindea. Mańolo mabu ma tuko, ba bo̱lo̱ne̱ ebe̱yed’a ke̱nge̱nge̱, ba timba bato ba bobe. Nde si sengane̱ labu di si tapi babo̱ mo̱me̱ne̱ mō̱. Ba tombe̱le̱ pe̱ mbot’abu bo bobe. Roma 5:12 e makwala ná: “Kana bobe bo po̱ino̱ nde o wase ońola moto mō̱ [Adam], kwedi pe̱ ońola bobe, nika nde kwedi e tombedino̱ na bato be̱se̱, ońolana be̱se̱ ba boli bobe.”

Bibe̱l e makwalea ońola bobe na kwedi ka “ekuduman . . . yena e kuduman matumba me̱se̱, na ekeṅan yena e keṅ bekombo be̱se̱.” (Yesaya 25:7) Y’ekuduman ye omo̱ń a mbel’a moto ńe̱se̱ ka ngo̱ ni mabwane̱, ńena to̱ moto a titino̱ ná a samba. Na mbale̱, ‘o Adam be̱se̱ ba mawo̱.’ (1 Korinto 15:22) Je so̱ ná di baise̱ kapo̱ ka ńamuloloma Paulo ná: “Nja nu me̱nde̱ sunge̱ mba o nin ńol’a kwedi e?” Mo̱ moto e ná e?​—Roma 7:24.