Bō̱ bena ba mapomane̱ lange̱ y’epasi nde ba tomba, ba mabaise̱ babo̱me̱ne̱ mi myuedi. Nde y’epasi e makwalea nde ońola bato baba bena ba ta ba be̱ne̱ mulemlem ma dina ná Mefiboset, je pe̱ ná di busane̱ belēdi o mi myango ke̱ di timbi oten.

Kiṅe̱ Saul ńa Israel a ta a be̱ne̱ bana ba bome samba na ba bito baba. Yonatan nde a ta mun’a mome ńa Saul ńaboso. Ombusa ponda Rispa, mut’a mbasan ńa kiṅe̱, a ta a yeya mo̱ mun’a mome, na mo̱ a bola mo̱ dina ná Mefiboset. Nde Yonatan pe̱ a ta a be̱ne̱ mun’a mome nu ta nu belabe̱ ná Mefiboset. Kiṅe̱ Saul a ta so̱ a be̱ne̱ mun’a mome nu ta nu belabe̱ ná Mefiboset, na muladi ma mun’a mome mu ta mu be̱ne̱ mulemlem ma dina.

O ponda po̱ ńa janea lao, kiṅe̱ Saul a ta a botea singe̱ bato ba Gibeon bena ba ta ba ja oteten a Bonaisrael, na mo̱ a pula bumbise̱ babo̱, E me̱ne̱n biana bō̱ babu ba bwabe̱. Nika e ta bobe jita. Ońola nje e? Ońolana o mińa ma Yosua, myom ma bato ba Bonaisrael ba ta ba ńo̱ male ma musa-ngo na bato ba Gibeon.—Yos. 9:3-27.

Ma male ma ta ma dia ma be̱n ngińa o mińa ma kiṅe̱ Saul. Nde kiṅe̱ e ta e bula ma male, e pula bumbise̱ bato ba Gibeon. Ońola ni njo̱m nde mbeu a ńolo e kweledino̱ “Saul na ndabo ao ni kom maya.” (2 Sam. 21:1) Ombusa ponda, David a ta a timba kiṅe̱. Na bato ba Gibeon bena bongi ba kwalisane̱ mo̱ ońola bo bobe. Na David a baise̱ babo̱ nje eno̱ ná a bolea babo̱ o te̱ pū ońola bobe bonde̱ne̱ Saul a bolino̱, ná Yehova pe̱ a namse̱ ekombo. O mulopo ma baise̱ mo̱ni, bato ba Gibeon ba baise̱ nde ná ba bole babo̱ bana ba bome samba ba nu moto nu ‘weki mwano o bo̱le̱ babo̱’ diboma, ná ba panabe̱. (Mis. 35:30, 31) Na David a bola kana ba baise̱no̱.—2 Sam. 21:2-6.

O ni ponda Saul na Yonatan ba ta ba máwo̱ o bila, nde Mefiboset mun’a Yonatan, a ta a dia longe̱. A ta e̱me̱ye̱ myende ke̱ e muna, a si lati na sango ńa mbambe̱ o ko̱ye̱ bato ba Gibeon. David a ta a ńo̱ male na diko̱m lao Yonatan, mena ma ta pe̱ oteten a mbot’abu; Mefiboset a ta nde mbot’a Yonatan. (1 Sam. 18:1; 20:42) Myango mi ma-kwala ná: “Kiṅe̱ [David] e ta e we̱nge̱le̱ Mefiboset, mun’a Yonatan, mun’a Saul, ońola so̱ngo̱ . . . ba kanane̱le̱no̱ oboso ba Yehova.”—2 Sam. 21:7.

Nde David a ta a bola kana bato ba Gibeon ba baise̱no̱. A no̱ngo̱ bana ba bome ba Saul baba, dina la mō̱ ńabu di ta nde Mefiboset, na miladi ma bana ba bome ma Saul mitanu. (2 Sam. 21:8, 9) Na nika nde David a te̱no̱ pū a maya o ekombo.

Nje e tombi e titi tet’a myango buka te̱. Mbend’a Loba e ta e kwala ná: “Bana [ba si] bwabe̱ ońola basango babu.” (Ndim. 24:16) Bana ba bome ba Saul baba na miladi mao mitanu ba si be̱ne̱ te̱ njo̱m, Yehova a si wusa jese̱le̱ ná ba bwabe̱. Ni mbenda e bati pe̱ ná: “Moto te̱ a mabwabe̱ nde ońola bao bobe mo̱me̱ne̱.” E me̱ne̱ne̱ ná bana ba Saul na miladi mao bena ba bwabe̱ ba no̱ngi dongo o nin mbadi to̱ nine̱ o sine̱le̱ bato ba Gi-beon. Babo̱ samba be̱se̱ ba bwabe̱ nde ońola bobe babu.

Min myango mi malee̱ nde ná moto a titi ná a swe̱le̱ mo̱me̱ne̱ muka ońola bobe a bo-lino̱, na nin njo̱m ná a ta nde a bupe̱ o̱da ni bolabe̱ mo̱. Munia ma dibie̱ mō̱ mu makwala ná: “Dangwa o ngea ni te̱m, bake̱ su la lo̱-ndo̱ lo̱ngo̱.”—Min. 4:24-27; Efe. 5:15.