1. Njik’edube di be̱nno̱ e?

E SE̱ edube di be̱nno̱ o be̱ elong’a mwemba ma Yehova e! Je nde o paradisi ńa mudī ni londi na musango, na bato be bonam. Njik’epolo o be̱nno̱ o mwemba e?

2. Njik’edinge̱dinge̱ ńamuloloma Paulo a bolane̱no̱ o jita la maleta mao a tilino̱ na ngiń’a mudī musangi e?

² Je ná jokwa jita jombwea din to̱ti tongwea n’edinge̱dinge̱ ńamuloloma Paulo a bolane̱no̱ o jita la maleta mao a tilino̱ na ngiń’a mudī musangi. O leta te̱, Paulo a kobisane̱ mwemba na ńol’a moto. A kobisane̱ pe̱ bato be o mwemba na belongi ba ńolo.​—Rom. 12:4-8; 1 Kor. 12:12-27; Efe. 4:16.

3. Njika belēdi belalo di me̱nde̱no̱ jombwea o din jokwa e?

³ O din jokwa, di me̱nde̱ kwalea belēdi ba mweńa belalo jeno̱ ná jokwa n’edinge̱ding’a Paulo. Baboso, di me̱nde̱ jokwa ná mō̱ ńasu te̱ a be̱n epolo * o mwemba ma Yehova. Be londe̱ beba, di me̱nde̱ kwalea nje jeno̱ ná di bola yete̱na ye biso̱ ndutu o bia epolo di be̱nno̱ o mwemba. Be londe̱ belalo, di me̱nde̱ kwalea ońola nje jangame̱nno̱ walame̱ne̱ biso̱me̱ne̱ o bola ebolo Yehova a bake̱no̱ mō̱ ńasu te̱ o mwemba.

4. Nje di mokwano̱ o Roma 12:4, 5 e?

⁴ Belēdi baboso di mokwano̱ n’edinge̱ding’a Paulo be nde ná mō̱ ńasu te̱ a be̱n epol’a tiki o mbia ma Yehova. Paulo a botedi nde edinge̱ding’ao na ben byala ná: “Kana di be̱nno̱ belongi jita o ńolo po̱, nde belongi be̱se̱ be si be̱ne̱ mulemlem m’ebolo, nika nde biso̱ jita pe̱ jeno̱ ńolo po̱ o Kristo, nde biso̱ be̱se̱ belongi mō̱ na nune̱.” (Rom. 12:4, 5) Nje Paulo a tano̱ a pula kwala e? Mō̱ ńasu te̱ a be̱n yao ebolo o mwemba yena ye diwengisan na ya nune̱, nde mō̱ ńasu te̱ e tiki.

5. Njika “mabea” Yehova a bolino̱ mwemba e?

⁵ O dutedi te̱ ońola ba bena ba be̱n epolo o mwemba ma kriste̱n, o me̱ne̱ nde dibokime̱ne̱ ba bena be o mulopo. (1 Tes. 5:12; Bon. 13:17) Ye mbale̱ ná tongwea na Kristo, Yehova a boli “bato mabea” ońola mwemba mao. (Efe. 4:8) Man “mabea” ma bato ma bambe̱ belongi ba Dibe̱le̱ di Madie̱le̱, bongwanedi ba Dibe̱le̱ di Madie̱le̱, belongi ba Dibe̱le̱ la Mukanjo m’Ebolo, baboledi b’ebondo, balēdi ba besukulu ba Janea, batudu o mwemba na baboledi. Ban bonasango be̱se̱ ba te̱se̱be̱ nde na mudī musangi ma Loba o jombwea mido̱ngi ma tiki ma Yehova na jouse̱ pe̱ mwemba.​—1 Pet. 5:2, 3.

6. Bupisane̱ 1 Tesalonika 2:6-8, nje bonasango ba te̱se̱be̱ na mudī musangi ba mawe̱no̱ o bola e?

⁶ Bonasango ba te̱se̱be̱ nde na mudī musangi o londise̱ ńai na ńai a m’bē̱. Ka nje te̱ ńai na ńai a belongi ba ńolo, k’eyembilan mā na myende, ba mabolano̱ ebolo ońola tombwane̱ la ńolo ńe̱se̱, nika pe̱ nde bonasango bena ba te̱se̱be̱ na mudī musangi ba mabolano̱ ebolo na ngińa ońola tombwane̱ la mwemba mwe̱se̱. Ba si mawasa edube ońola babo̱me̱ne̱. O diwengisan, ba mawe̱ o longa na jouse̱ bonasango na bonańango abu. (Langa 1 Tesalonika 2:6-8.) Di masoma Yehova ońola ba bome be nde bato ba mudī na ba dongame̱n bena ba si mawase̱ bwam ba babo̱me̱ne̱!

7. Njika minam ba bena be o ebol’a pond’a mususu ba be̱nno̱ e?

⁷ Bato bō̱ o mwemba be ná ba te̱se̱be̱ ka bamuloloma, paonia ya tobotobo, to̱ paonia ya pond’a mususu. Bonasango na bonańango bō̱ o wase ńe̱se̱ ba no̱ngi nde ebol’a dikalo na ya timbise̱ bato bokwedi ka yabu ebolo. Tongwea na nika, bongwane̱ jita la bato o timba bokwedi ba Kristo Yesu. To̱ná ban bate̱ dikalo ba pond’a mususu ba si yo̱kino̱ be̱ne̱ mo̱ni to̱ mambo jita, Yehova a masoe̱le̱ babo̱ njoaso’a minam. (Marko 10:29, 30) Ban bonasango na bonańango be biso̱ tiki jita, je pe̱ masoma ná be na biso̱ o mwemba!

8. Ońola nje mute̱ dikalo la myango ma bwam te̱ eno̱ Yehova tiki e?

⁸ Mo̱ bonasango ba te̱se̱be̱ na baboledi ba pond’a mususu buka te̱ nde ba be̱n epolo o mwemba e? Tomtom! Mute̱ dikalo la myango ma bwam te̱ e Yehova tiki name̱ne̱ pe̱ na mwemba. (Rom. 10:15; 1 Kor. 3:6-9) Ońolana janda laboso la mwemba le nde timbise̱ la bato bokwedi ba Sango asu Yesu Kristo. (Mat. 28:19, 20; 1 Tim. 2:4) Bate̱ dikalo be̱se̱, ba dubisabe̱ na ba si dubisabe̱, ba mawe̱ o bola ná y’ebolo nde e be̱ babo̱ lambo le mweńa buka me̱se̱ o longe̱ labu.​—Mat. 24:14.

9. Ońola nje bonańango asu beno̱ biso̱ tiki e?

⁹ Yehova a boli bonańango epol’edube o mwemba. Ban bito, bańango, mikusa, na bonańango be mulamba bena  ba maboleye̱ mo̱ na jemea be mo̱ tiki. Betiledi be mato̱pea tobotobo ońola bito bena ba ta ba do̱lisane̱ Loba. Ba bito ba masesabe̱ ka byembilan ba bwam ba dibie̱, jemea, ko̱di, ngiń’a mulema, sanga la mulema, na bebolo ba bwam. (Lukas 8:2, 3; Bebolo 16:14, 15; Rom. 16:3, 6; Fil. 4:3; Bon. 11:11, 31, 35) E se̱ masoma di matimbise̱le̱no̱ Yehova ná di be̱n o myemba masu, bito bena ba be̱n min milemlem ma bede̱mo ba bwam e!

10. Ońola nje ba bena ba mákokwe̱ mimbu beno̱ biso̱ tiki e?

¹⁰ Di namsabe̱ pe̱ o be̱ne̱ jita la bato bena ba mákokwe̱ mimbu. Myemba mō̱ mi be̱n bonasango na bonańango ba mádune̱ bena ba bolane̱ longe̱ labu le̱se̱ o bolea Yehova na jemea. Bō̱ bape̱pe̱ bena ba mákokwe̱ mimbu ba s’indi po̱ o mbale̱. E be̱ to̱ nē̱, kana ba mákokwano̱ mimbu si be̱ne̱ la ja la bwam di mawanea babo̱ ńai na ńai a mitakisan. Mi mitakisan mi mabola ná ba titi ná ba te̱ dikalo to̱ bolea mwemba ka nje te̱ ba mapulano̱. Nde ba mate̱ dikalo bupisane̱ ngud’abu, ba mabolane̱ pe̱ ngud’abu ńe̱se̱ o jembe̱ na longa pe̱ bape̱pe̱! Di matombwane̱ bia labu la bola. Na mbale̱, be Yehova tiki name̱ne̱ pe̱ na biso̱.​—Min. 16:31.

11-12. Ne̱ni beso̱mbe̱ be o mwemba mo̱ngo̱ bembe̱no̱ wa e?

¹¹ Di kwaleye pe̱ ońola beso̱mbe̱ basu. Be be̱n mitakisan jita ońolana be nde o koka o nin wase ńe owas’a ngiń’a Satan Diabolo na mo̱nge̱le̱ mao ma bobe. (1 Yohane 5:19) Nde biso̱ be̱se̱ di makusa jembame̱ ke̱ di masenga beso̱mbe̱ basu be mabola malabe̱ o ndongame̱n, be mate̱ dikalo, be lingea pe̱ dube̱ labu na bokenju. E, bińo̱ beso̱mbe̱ lo be̱n epol’a tiki o mwemba ma Yehova!​—Mye. 8:3.

¹² Nde bonasango na bonańango asu bō̱ ba si mawe̱le̱ dube̱ ná ba be̱n epol’a tiki o mwemba. Nje yena yongwane̱ mō̱ ńasu te̱ o bia ná a be̱n epolo o mwemba e? Jombweye te̱ nika.

13-14. Ońola nje bato bō̱ beno̱ ná bo̱nge̱le̱ ná ba si be̱n epolo o mwemba e?

¹³ Maka belēdi be londe̱ beba jeno̱ ná jokwa n’edinge̱ding’a Paulo. E makwalea nde mitakisan mō̱ mena jita ba be̱nno̱ nin we̱nge̱; ye babo̱ ndutu o dube̱ ná be mwemba tiki. Paulo a tili ná: “To̱ mwende mu kwala na: Kana na titino̱ dia, na titi ńa ńolo, ke̱ mwe te̱ nde ma ńolo. To̱ toi pe̱ di kwala na: Kana na titino̱ diso̱, na titi ńa ńolo, ke̱ le te̱ nde la ńolo.” (1 Kor. 12:15, 16) Njika belēdi Paulo eno̱ jokwe̱le̱ biso̱ e?

¹⁴ O kobisane̱ te̱ wame̱ne̱ na bane̱ o mwemba, o si me̱nde̱ je̱ne̱ ná we mweńa o mwemba. Bato bō̱ o mwemba ba kusi jabea la belēdi, la bia te̱se̱ mambo, to̱ la be̱ mutated’a bwam. Yen ebe o me̱ne̱ ná o si kusi man mabea o mulemlem ma dime̱ne̱ ka bane̱. Nika e malee̱ nde ná we sibise̱ la ńolo, o bi pe̱ myoyo mo̱ngo̱. (Fil. 2:3) Nde no̱ngo̱ jangame̱ye̱. O ko̱lo̱ngo̱ne̱ te̱ kobisane̱ wame̱ne̱ na ba bena ba kusi ma mabea o dime̱ne̱ di petane̱ lo̱ngo̱, nika e me̱nde̱ bo̱bise̱ wa. We pe̱ na mo̱me̱ne̱ wo̱nge̱le̱ ka nje Paulo a kwalino̱, ná o si be̱n epolo to̱ ewo̱ o mwemba. Nje ye ná yongwane̱ wa o buka yi ńai a mo̱nge̱le̱ e?

15. Bupisane̱ 1 Korinto 12:4-11, nje jangame̱nno̱ jemba e be̱ to̱ njika jabea di be̱nno̱ e?

¹⁵ Dutea te̱ din lambo: Yehova a boli kriste̱n iwo̱ ya ńo̱ṅo̱n a boso mabea ma mudī ma betańsedi, nde kriste̱n ye̱se̱ i si kusi milemlem ma mabea. (Langa 1 Korinto 12:4-11.) Yehova a ta a bola babo̱ ńai na ńai a mabea na bia la bola, nde kriste̱n te̱ e ta mo̱ tiki. O nin we̱nge̱, di si be̱n mabea ma betańsedi ma mudī musangi. Nde be bete̱sedi be te̱ nde mweńa. Biso̱ be̱se̱ je ná di si be̱ne̱ milemlem ma mabea, nde biso̱ be̱se̱ je Yehova tiki.

16. Njika malea ma ńamuloloma Paulo jangame̱nno̱ bupe̱ e?

¹⁶ O mulopo ma kobisane̱ biso̱me̱ne̱ na bane̱ bonasango na bonańango, di bupe̱ nde man malea ma ńamuloloma Paulo ma wu na mudī musangi ná: “Moto te̱ a  kekise̱ yao ebolo; nde a me̱nde̱ we̱le̱ sese̱ ońola mo̱me̱ne̱, seto̱ ońola nupe̱pe̱.”​—Gal. 6:4.

17. Nje di matombwane̱no̱ ke̱ di bupe̱ malea ma ńamuloloma Paulo e?

¹⁷ Di bupe̱ te̱ malea ma ńamuloloma Paulo ma wu na mudī musangi ná di wase̱le̱ bebolo basu, je ná di botea je̱ne̱ ná di tombwane̱ mabea ma tobotobo na bia la bola bane̱ ba si be̱nno̱. K’eyembilan, mutudu mō̱ e ná a si be̱ne̱ jabea la belēdi ke̱ e o kwande̱ki, nde a tombwane̱ jabea la timbise̱ bato bokwedi. To̱ e ná a si be̱ mubie̱ te̱se̱ mambo ka batudu bō̱ o mwemba, nde a biane̱ na be̱se̱ ka mutated’a bwam ńe ndolo ńena bate̱ dikalo ba masiseano̱ be̱be̱ na bo̱bise̱ la ńolo o kusa malea ma se̱medi o Betiledi. To̱so̱ e ná a biane̱ ka moto nu bi kase̱ be̱n. (Bon. 13:2, 16) Di so̱ṅtane̱ te̱ njika mabea di kusino̱, di me̱nde̱ bwa muńe̱nge̱ ońola nje jeno̱ ná di bola o mwemba. Di si me̱nde̱ pe̱ to̱ ko̱no̱ne̱ bonasango asu bena ba kusi mabea me diwengisan na masu.

18. Ne̱ni jeno̱ ná di bata be̱ balēdi ba bwam e?

¹⁸ E be̱ to̱ njik’epolo di be̱nno̱ o mwemba, biso̱ be̱se̱ jangame̱n be̱ne̱ ńo̱ngi o ńaka o ebol’asu na bata be̱ balēdi ba bwam. Ná ongwane̱ biso̱ o ńaka, Yehova a mabola biso̱ belongedi ba bwam tongwea na bebokedi bao. K’eyembilan, o ndongame̱n asu ya teten a woki, di makusa bediedi jombwea ne̱ni bata be̱ jangwa o ebol’asu ya dikalo. Mo̱ o mawe̱ ná o tombwane̱ be belongedi o mususu mao mwe̱se̱ e?

19. Ne̱ni weno̱ ná o tongwe̱le̱ o jukea o Esukul’a Bate̱ Dikalo la Janea e?

¹⁹ Belongedi bepe̱pe̱ ba bwam be nde Esukul’a Bate̱ Dikalo la Janea. Yen esukulu ye nde ońola bonasango na bonańango be o ebol’a pond’a mususu na bena ba be̱n oteten a 23 na 65 ma mbu. We ná wo̱nge̱le̱ ná o titi ná wukea oten. Nde o mulopo ma so̱nge̱le̱ njo̱m ońola nje o titino̱ ná wukea, so̱nge̱le̱ nde njo̱m ońola nje o mapulano̱ jukea oten. Denge̱ o maweka mwano mu me̱nde̱ jongwane̱ wa o be̱ ka ni dongame̱n o londe̱ dipapa. Na jongwane̱ la Yehova mwemba na miwe̱n mo̱ngo̱ ma ngińa, we ná o bola nje wo̱nge̱le̱no̱ ná o titi ná o bola.

20. Njika belēdi di mabusane̱no̱ o Roma 12:6-8 e?

²⁰ Belēdi be londe̱ belalo jeno̱ ná jokwa n’edinge̱ding’a Paulo be nde o Roma 12:6-8. (Langa.) Owan Paulo e pe̱te̱ nde lee̱ ná ba bena be o mwemba ba be̱n ńai na ńai a mabea. Nde tatan e o kika ná di bolane̱ to̱ njika jabea di be̱nno̱ o longa na jouse̱ pe̱ mwemba.

21-22. Njika belēdi myango ma Robert na Felice mi mokwe̱le̱no̱ biso̱ e?

²¹ Jombweye eyembilan a munasango nu belabe̱ ná Robert. Ombusa mo̱ bolea o mwe̱n ekombo, a ta a lomabe̱ o bolea o Bete̱l o ekombo a yabe̱no̱. To̱ná bonasango ba bolino̱ mo̱ mbaki ná di diwengisan l’eto̱ti di si po̱i ońolana a boli lambo la bobe, mo̱ ná: “Na si ta muńe̱nge̱ etum a myo̱di jita ońolana na ta nde no̱nge̱le̱ ná na si tongwe̱le̱ o ebol’am. Ponda iwo̱ na ta na pula jasumwe̱ o Bete̱l.” Ne̱ni a timbino̱ pe̱te̱ be̱ne̱ muńe̱nge̱ mao e? Mutudu mō̱ o̱nge̱le̱ mo̱ ná Yehova a longi biso̱ o eto̱ti te̱ di tano̱ di be̱ne̱ kwaṅ, o boṅsane̱ biso̱ ońola eto̱t’a peńa di be̱nno̱. Robert embi ná a ta angame̱n dimbea nje a tano̱ a bola kwaṅ ná a we̱le̱ mo̱me̱ne̱ mususu o nje eno̱ bola tatan.

 ²² Munasango Felice Episcopo a ta a be̱ne̱ mulemlem ma mitakisan. Bā na munj’ao ba busi o esukul’a Gilead o mbu 1956, ba lomabe̱ o ebol’ebondo o Bolivia. O mbu 1964, na babo̱ ba ya muna. Felice mo̱ ná: “E ta biso̱ ndutu o dia ebol’asu di tano̱ di to̱ndo̱ jita. Na memba ná na ta na ńo̱sea lambo ka mbu mō̱ ma mususu. Nde na jongwane̱ la Yehova, na tuko, na lembe̱ m’bē̱ mam ma muyedi.” Mo̱ o be̱n nde milemlem ma mitakisan ka Robert na Felice e? Mo̱ o ńo̱sedi ońolana o si be̱n pe̱ eto̱t’ebolo o tano̱ o be̱ne̱ kwaṅ e? Yete̱na e, o me̱nde̱ be̱ muńe̱nge̱ yete̱na o tuko mo̱nge̱le̱ mo̱ngo̱, o we̱le̱ wame̱ne̱ mususu o nje weno̱ bola tatan o bolea Yehova na bonaso̱ngo̱. Bola ná o walame̱ne̱, bolane̱ mabea mo̱ngo̱ na bia lo̱ngo̱ la bola o jongwane̱ bane̱, o me̱nde̱ be̱ muńe̱nge̱ ná we o longa mwemba.

23. Nje jangame̱nno̱ no̱ngo̱ ponda o bola e, nje pe̱ di me̱nde̱no̱ jombwea o jokwa di mabupe̱ e?

²³ Mō̱ ńasu te̱ e Yehova tiki. A mapula ná di so̱ṅtane̱ ná je nde belongi ba mbia mao. Di no̱ngi te̱ ponda o dutea nje jeno̱ ná di bola o longa bonasango na bonańango nde di we̱ pe̱ na ngińa o bola nika, di si me̱nde̱ je̱ne̱ ná di si be̱n epolo o mwemba. Nde ne̱ni di me̱ne̱no̱ bane̱ o mwemba e? Ne̱ni jeno̱ ná di lee̱le̱ ná di to̱ndi babo̱ di mabola pe̱ babo̱ edube e? O jokwa lasu di mabupe̱, di me̱nde̱ jombwea di to̱ti la mweńa.