1. Ne̱ni di bino̱ ná ebol’a timbise̱ bato bokwedi ye nde ebolo e masunge̱ malonge̱ e?

EBOL’A timbise̱ bato bokwedi ye nde ebolo e masunge̱ malonge̱. Ne̱ni di bino̱ nika e? O byanedi Yesu a bolino̱ o Mateo 28:19, 20, a kwali ńa: “Bińo̱ ala, . . . timbise̱ matumba me̱se̱ bokwedi . . . , lo dubise̱ babo̱.” Nje di bino̱ jombwea mweńa ma dubise̱ e? Ba bena ba mapule̱ sungabe̱ bangame̱n o dubisabe̱. Nu nu mapule̱ dubisabe̱ angame̱n dube̱ ná je nde ná di be̱ne̱ longe̱ la bwindea buka te̱ ońolana Yesu a wedi ońol’asu. Ońola nika nde ńamuloloma Paulo a kwalane̱no̱ kriste̱n ná: “Dubise̱ di mongise̱ bińo̱ tatan . . . ońola bepumbwedi ba Yesu Kristo.” (1 Pet. 3:21) Mokwe̱ Bibe̱l a dubisabe̱ te̱, e ná a be̱ne̱ dipita la be̱ longe̱ o bwindea.

2. Bupisane̱ 2 Timoteo 4:1, 2 njika pat’a balēdi jangame̱nno̱ be̱ e?

² Ná di timbise̱ bato bokwedi, jangame̱n be̱ balēdi ba bwam. (Langa 2 Timoteo 4:1, 2.) Ońola nje e? Ońolana Yesu a boli biso̱ byanedi ńa: “Bińo̱ ala, . . . timbise̱ matumba me̱se̱ bokwedi . . . , na lee̱ babo̱.” Ńamuloloma Paulo a kwali ńa di “tingame̱” o y’ebolo, ‘ebanja di mabola te̱ nika, ke̱ di me̱nde̱ jongise̱ biso̱me̱ne̱ na ba pe̱ ba masengane̱ biso̱.’ Paulo a ta so̱ a be̱ne̱ bwam o kwala ná: “No̱ngo̱ jangame̱ye̱ ońola . . . nje o malee̱no̱.” 1 Timoteo 4:16. Nika di mokwe̱le̱no̱ bato ná ba timbe bokwedi, balēdi basu bangame̱n so̱ be̱ bwam.

3. O din jokwa, nje di me̱nde̱no̱ je̱ne̱ jombwea tombise̱ la mokwa e?

³ Di mokwe̱le̱ lodun la bato mbale̱ ye o Bibe̱l ponda ye̱se̱. Nde ka nje te̱ je̱nno̱ o jokwa di se̱le̱, jangame̱n  bia ne̱ni jeno̱ ná jongwane̱ babo̱ o timba bokwedi ba dubisabe̱ ba Yesu Kristo. O din jokwa, di me̱nde̱ je̱ne̱ mambo mape̱pe̱ matanu mena mutombise̱ jokwa te̱ angame̱nno̱ bola ná ongwane̱ mokwe̱ Bibe̱l o ńaka nate̱na o dubise̱.

4. Ońola nje mutombise̱ jokwa angame̱nno̱ lee̱le̱ jalea la ńolo ke̱ a matombise̱ jokwa la Bibe̱l e? (Ombwa pe̱ maki owas’a dipapa.)

⁴ Di to̱ndi nje di mokwe̱le̱no̱ o Eyal’a Loba. Je so̱ ná di pula to̱po̱ jita jombwea nje di to̱ndino̱. Nde moto e te̱ die̱le̱ jokwa la Njongo a Betatedi, jokwa la Bibe̱l la mwemba, to̱ jokwa la Bibe̱l o mboa, a s’angame̱n to̱po̱ jita. Mudie̱le̱ jokwa angame̱n jalea ńolo ná ese̱le̱ ná Bibe̱l e lee̱, na ná a si bola beteledi be̱se̱ a bino̱ jombwea epas’a Bibe̱l ewo̱, to̱ to̱ti dipe̱pe̱. * (Yohane 16:12) Kobisane̱ nje o tano̱ o bia ke̱ o madubisabe̱ na nje o bino̱ tatan. O niponda, o ta nde o bia belēdi ba mweńa ba Bibe̱l. (Bon. 6:1) Ná wokwe nje ye̱se̱ o bino̱ we̱nge̱ nik’e no̱ngi mimbu jita, ońola nika, o si wasa so̱ lee̱ mokwe̱ Bibe̱l ńa peńa mambo me̱se̱.

5. (a) Bupisane̱ 1 Tesalonika 2:13, nje mokwe̱ Bibe̱l angame̱nno̱ so̱ṅtane̱ jombwea jokwa lao e? (b) Ne̱ni tute̱le̱ mokwe̱ Bibe̱l o langwa nje a mo̱nge̱le̱no̱ jombwea mambo eno̱ jokwa e?

⁵ Ńo̱ng’asu ńe nde ná mokwe̱ Bibe̱l a so̱ṅtane̱ ná nje eno̱ o jokwa e mawa nde o Eyal’a Loba. (Langa 1 Tesalonika 2:13.) Ne̱ni jeno̱ ná di bola nika e? Tute̱le̱ mokwe̱ Bibe̱l ná a to̱pe jombwea nje eno̱ jokwa. O mulopo ma tele̱ye̱ mokwe̱ Bibe̱l bepasi ba Bibe̱l ponda ye̱se̱, kwalane̱ mo̱ ná a tele̱ye̱ wa mo̱. Ongwane̱ mo̱ ná e̱ne̱ ne̱ni we̱le̱ nje a mokwano̱ o ebolo. Baise̱ mo̱ myuedi mi matute̱le̱ mo̱ o bola jo̱nge̱le̱ lao jombwea bepasi ba Bibe̱l a malangano̱. (Lukas 10:25-28) K’eyembilan baise̱ mo̱ ná: “Ne̱ni y’epas’a Bibe̱l e mongwane̱no̱ wa o je̱ne̱ ede̱mo a Yehova ewo̱ e?” “Ne̱ni nje o mokwano̱ o Bibe̱l e mongwane̱no̱ wa e?” “Ne̱ni o masengano̱ jombwea nje o mokwano̱ e?” (Min. 20:5) Nje ye mweńa e titi nje ye̱se̱ mokwe̱ Bibe̱l a bino̱, nde nate̱na njika dikala a to̱ndino̱ nje a mokwano̱, a mawe̱le̱no̱ pe̱ mo̱ o ebolo.

6. Ońola nje yeno̱ ná e be̱ bwam ná walane̱ mute̱ dikalo ńou o jokwa lo̱ngo̱ la Bibe̱l e?

⁶ Mo̱ o yo̱ki wala tombise̱ jokwa na bate̱ dikalo bena bou e? Yete̱na e, we ná o baise̱ babo̱ nje ba mo̱nge̱le̱no̱ jombwea mbadi o matombise̱no̱ jokwa na yete̱na  o mese̱le̱ ná Bibe̱l e lee̱. Wangame̱n pe̱ lee̱le̱ sibise̱ la ńolo yete̱na e mapula ná o po̱ngulane̱ mbad’ango̱ ńa lee̱. (Kobisane̱ Bebolo 18:24-26.) Ombusa nika, baise̱ mute̱ dikalo ńou nga a mo̱nge̱le̱ ná mokwe̱ Bibe̱l e o so̱ṅtane̱ nje eno̱ jokwa. We pe̱ ná o baise̱ mo̱ ná a tombise̱ jokwa ońola woki po̱ to̱ buka nika ke̱ o titi wa. Nik’e me̱nde̱ bola ná jokwa di si te̱me̱, na ná mokwe̱ Bibe̱l e̱ne̱ mweńa ma jokwa lao. O s’o̱nge̱le̱ to̱ buńa ná di jokwa le nde “lo̱ngo̱”, na ná moto nupe̱pe̱ a titi ná a tombise̱ mo̱. Nje ye mbaki ye nde ná o mapulea nde mokwe̱ Bibe̱l bwam, na ná a benge ńaka o jokwa lao la mbale̱.

7. Nje e me̱nde̱ bole̱ ná mokwe̱ Bibe̱l a to̱nde nje eno̱ jokwa e?

⁷ Mokwe̱ Bibe̱l angame̱n je̱ne̱ ná o to̱ndi mbale̱ ye o Bibe̱l, na ná o dube̱ pe̱ mo̱. (1 Tes. 1:5) Nik’e me̱nde̱ bola ná mo̱ pe̱ a bate to̱ndo̱ nje eno̱ o jokwa. Yen ebe we pe̱ ná o kwalane̱ mo̱ ne̱ni we̱le̱ la bete̱sedi ba Bibe̱l o ebolo longwane̱no̱ wa. Nik’e me̱nde̱ bola ná a so̱ṅtane̱ ná malea ma Bibe̱l me pe̱ ná mongwane̱ mo̱.

8. Nje epe̱pe̱ weno̱ ná o bola o bwam ba jongwane̱ mokwe̱ Bibe̱l e, ońola nje pe̱ e?

⁸ Bińo̱ le te̱ jokwa, langwea mokwe̱ Bibe̱l myango ma bato bena ba kusi milemlem ma mitakisan ka mo̱, nde ba lembe̱ pe̱ mo̱. We pe̱ ná o po̱ tombise̱ jokwa na moto ńe eyembilan a bwam ońola mokwe̱ Bibe̱l. To̱so̱ we ná o so̱ myango mi matape̱ mulema o jw.org o tema “Bibe̱l e matukwa malonge̱.” * Ni ńai a myango to̱ sinima ba me̱nde̱ jongwane̱ mokwe̱ Bibe̱l o je̱ne̱ ne̱ni yeno̱ dibie̱ o we̱le̱ bete̱sedi ba Bibe̱l o ebolo o longe̱ lao.

9. Ne̱ni weno̱ ná o tute̱le̱ mokwe̱ Bibe̱l o kwalea jombwea nje eno̱ o jokwa na mbia mao to̱ na mako̱m mao e?

⁹ Mokwe̱ Bibe̱l a bai te̱ to̱so̱ a babe̱ te̱, mo̱ mom’ao to̱ munj’ao pe̱ e o jokwa e? Yete̱na ke̱m, bele̱ mo̱ ná mo̱ pe̱ okwe na bińo̱. Ome̱le̱ mokwe̱ Bibe̱l ná a kwaleye jombwea nje eno̱ o jokwa na belongi bao ba mbia to̱ na mako̱m mao. (Yohane 1:40-45) Ne̱ni e? We ná o baise̱ mo̱ ná: “Ne̱ni o me̱nde̱no̱ tele̱ye̱ mbia mo̱ngo̱ nin mbale̱ e?” to̱ “Njik’epas’a Bibe̱l o me̱nde̱no̱ bolane̱ o tele̱ye̱  diko̱m lo̱ngo̱ nika e?” Na ni mbadi nde o me̱nde̱no̱ longa mokwe̱ Bibe̱l o be̱ mulēdi. Ponda a me̱nde̱no̱ be̱ ka ni dongame̱n, e so̱ ná a botea te̱ dikalo ka mute̱ dikalo nu si dubisabe̱. We ná o baise̱ mo̱ nga a bi moto nupe̱pe̱ nu mapule̱ jokwe̱ Bibe̱l. Yete̱na e, kwala na nu moto dibokime̱ne̱, o boteye pe̱ jokwa na mo̱. Lee̱ mo̱ sinima Ne̱ni jokwa la Bibe̱l di matombano̱ e? *

10. Ka nje te̱ 1 Tesalonika 2:7, 8 e matele̱ye̱no̱, ne̱ni mutombise̱ jokwa eno̱ ná embilane̱ Paulo e?

¹⁰ Ba ba matombise̱ mokwa ma Bibe̱l bangame̱n jombwea bokwe̱ Bibe̱l na mbale̱. E̱ne̱ babo̱ ka bato ba me̱nde̱ timbe̱ bonasango na bonańango. (Langa 1 Tesalonika 2:7, 8.) E titi babo̱ lambo di bo̱bi o jese̱le̱ mako̱m mabu, na wana pe̱ mawengisan o longe̱ labu o bwam ba bolea Yehova. Jangame̱n jongwane̱ babo̱ o be̱ne̱ mako̱m ma mbale̱ o mwemba. Be̱ diko̱m na jokwa lo̱ngo̱, tombise̱ ponda na mo̱ seto̱ buka te̱ ońola jokwa, nde ońola mambo mape̱pe̱ pe̱. Ná o lee̱ ná o mombwea mo̱ na mbale̱, we ná o bele̱ mo̱ o telefon, o lomea mo̱ mwe̱ndi to̱so̱ o pe̱pe̱le̱ mo̱ o ponda lo si be̱nno̱ ná lokwe.

11. Nje di mapulano̱ ná bokwe̱ Bibe̱l ba so̱ o mwemba e, ońola nje pe̱ e?

¹¹ Di ko̱lo̱ngo̱ne̱ o kwala ná “Muna e nde ńa bato be̱se̱.” Je pe̱ ná di kwala ná “Timbise̱ la moto mokwedi le nde ebol’a mwemba mwe̱se̱.” Ońola nika nde batombise̱ mokwa ba bwam bangame̱nno̱ bola ná bokwe̱ Bibe̱l ba ko̱lo̱ngo̱ne̱ bato bape̱pe̱ o mwemba, ná nik’e bole ná bongwane̱ babo̱ o sisea Yehova be̱be̱. Bokwe̱ Bibe̱l be so̱ ná ba bwane̱ mudenge ma tumba la Loba muńe̱nge̱, ba bonasango na bonańango pe̱ be ná bongwane̱ babo̱ o be̱ mako̱m ma Yehova, to̱ jongwane̱ babo̱ ke̱ ba be̱n mitakisan. Ńo̱ng’asu ńe nde ná mokwe̱ Bibe̱l a so̱ṅtane̱ ná e nde elong’a mwemba na ya mbia masu ma mudī. Di mapula pe̱ ná ndol’a bonasango na bonańango e dute mo̱. Nika ńe so̱ ná e bola ná a si be̱ne̱ pe̱ mulatako ma batabata na bato ba si mongwane̱ mo̱ o bolea Yehova. (Min. 13:20) Mako̱m mao ma caki te̱ mo̱, a me̱nde̱ be̱ mbaki ná e ná a so̱ mako̱m ma mbale̱ o bebokedi ba Yehova.​—Marko 10:29, 30; 1 Pet. 4:4.

12. Ońola nje jangame̱nno̱ kwalea jombwea bake̱ la ńolo na dubise̱ na jokwa lasu la Bibe̱l e?

¹² Kwalea ońola nje yeno̱ mweńa ná kriste̱n e bake̱ ńolo nde e dubisabe̱ pe̱. Janda la jokwa le nde o jongwane̱ mokwe̱ Bibe̱l ná a dubisabe̱. Ya te̱ myo̱di to̱ mininga mokwe̱ Bibe̱l eno̱ jokwa Bibe̱l, eno̱ pe̱ jukea o ndongame̱n, angame̱n so̱ṅtane̱ ná ńo̱ng’asu ńe nde ná mo̱ pe̱ a timbe Mboṅ a Yehova.

13. Njika mambo mokwe̱ Bibe̱l angame̱nno̱ bola ná a dubisabe̱ e?

¹³ Mambo mō̱ me mena mokwe̱ Bibe̱l nu mapule̱ dubisabe̱ angame̱nno̱ bola! Laboso, mokwe̱ Bibe̱l angame̱n bia, to̱ndo̱, na dube̱ pe̱ Yehova. (Yohane 3:16; 17:3) Ombusa nika, angame̱n longa mao mulatako na Yehova, name̱ne̱ pe̱ na bonasango o mwemba. (Bon. 10:24, 25; Yak. 4:8) Ye̱ke̱i te̱ angame̱n pe̱ jese̱le̱ bede̱mo ba bobe na jate̱le̱ pe̱ na myobe mao. (Bebolo 3:19) Dube̱ lao pe̱ langame̱n tute̱le̱ mo̱ o kwalane̱ bape̱pe̱ mbale̱. (2 Kor. 4:13) Ombusa nika, e so ná a bake̱ mo̱me̱ne̱ na Yehova nde a lee̱le̱ pe̱ nika tongwea na dubise̱. (1 Pet. 3:21; 4:2) Bo buńa bwe nde buńa ba muńe̱nge̱ munde̱ne̱ ońola be̱se̱! Mokwe̱ Bibe̱l e te̱ po̱ngo̱ man matanga me̱se̱, sesa mo̱ na mbale̱ ná alane̱ nika oboso.

14. Ne̱ni mutombise̱ jokwa eno̱ ná a wasa bia nga mokwe̱ Bibe̱l e o náka e?

¹⁴ Jangame̱n be̱ we̱lisane̱ niponda jeno̱ o jongwane̱ mokwe̱ Bibe̱l o ńaka. Nde jangame̱n pe̱ wasa bia nga a be̱n ńo̱ngi o bolea Yehova. Mo̱ we o je̱ne̱ mambo mō̱ ma malee̱ ná mokwe̱ Bibe̱l e o po̱ngo̱ miwe̱n o sengane̱ mambenda ma Yesu e? Nga a mapula nde buka te̱ jokwa mambo jombwea Bibe̱l e?

15. Njika mambo ma malee̱ bońaki ba mokwe̱ Bibe̱l mutombise̱ jokwa angame̱nno̱ wasa je̱ne̱ e?

¹⁵ Ombwea bońaki ba mokwe̱ Bibe̱l ponda ye̱se̱. K’eyembilan, a makwalea ońola besengedi bao ba teten jombwea Yehova e? A makane̱ Yehova e? (Mye. 116:1, 2) Mo̱ a to̱ndi langa Bibe̱l e? (Mye. 119:97) A mukea o ndongame̱n ponda ye̱se̱ e? (Mye. 22:22) Mo̱ a wan mawengisan mō̱ o longe̱ lao e? (Mye. 119:112) Mo̱ a makwalea jombwea nje a mokwano̱ na mbia mao to̱ na mako̱m mao e?  (Mye. 9:1) Di buki me̱se̱, mo̱ a mapula be̱ Mboṅ a Yehova e? (Mye. 40:8) Mokwe̱ Bibe̱l a titi te̱ ńaka o to̱ti to̱ diwo̱ la man me̱se̱, wasa bia ońola nje, nde o kwale pe̱ na mo̱ jombwea nika o mbad’a muyao nde ńe pe̱ bwē. *

16. Nje ye ná e lee̱ ná jokwa la Bibe̱l langame̱n jembe̱ e?

¹⁶ Baise̱ wame̱ne̱ ponda na ponda te̱ nga wangame̱n walane̱ jokwa oboso. Baise̱ min myuedi ná: ‘Mo̱ mokwe̱ Bibe̱l a si maboṅsane̱ jokwa lao e? A si mapula o jukea o ndongame̱n e? A dia te̱ nde a be̱n bede̱mo ba bobe e? A dia te̱ nde elong’a ebasi e kwedi e? Jalabe̱ la mi myuedi le te̱ ná e, nde o benga nde walane̱ di jokwa oboso, di masukane̱ nde be̱ ka moto ńe o jokwe̱le̱ nupe̱pe̱ ńo̱i, nde ke̱ nu moto a si mapula so̱po̱! Mokwe̱ Bibe̱l a si to̱ndi te̱ nje a mokwano̱, na ná a titi pe̱ to̱ be̱be̱ o wana mawengisan o longe̱ lao, ońola nje so̱ benga jokwa na mo̱ e?

17. Bupisane̱ 1 Timoteo 4:16, nje mutombise̱ jokwa te̱ angame̱nno̱ bola e?

¹⁷ Ebol’asu ya timbise̱ bato bokwedi ye mweńa jita, di be̱n pe̱ ńo̱ngi o jongwane̱ mokwa masu ma Bibe̱l o ńaka nate̱na o dubise̱. Ońola nika nde di me̱nde̱no̱ jese̱le̱ ná Bibe̱l nde e lee̱, biso̱ pe̱ di me̱nde̱ lee̱ na bokenju na mbaki. Di me̱nde̱ jongwane̱ mokwe̱ Bibe̱l ná a be̱ne̱ mako̱m o mwemba. Di me̱nde̱ pe̱ kwalea ońola bake̱ la ńolo na dubise̱ ponda ye̱se̱. (Ombwa edinge̱le̱ o dipapa 13, “ Nje mutombise̱ jokwa angame̱nno̱ bola ná ongwane̱ mokwe̱ Bibe̱l o ńaka nate̱na o dubise̱.”) Je muńe̱nge̱ o no̱ngo̱ dongo o y’ebolo e masunge̱ malonge̱! Di bole so̱ me̱se̱ ná di tombise̱ mokwa ma mongwane̱ mokwe̱ Bibe̱l o be̱ ka ni dongame̱n o dubisabe̱.